ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

6 ເດືອນ ເຊກອງ ມ້າງຄະດີຢາເສບຕິດໄດ້ 46 ເລື່ອງ

23

ຕາມການລາຍງານຂອງທ່ານ ພົ.ວ ສົມໄຊ ພູລະຄໍາມະນີ ຫົວໜ້າກອງບັນຊາການປ້ອງກັນຄວາມສະຫງົບ (ປກສ) ແຂວງເຊກອງໃຫ້ຮູ້ວ່າ: ພາຍຫຼັງພັກ-ລັດຖະບານ ໄດ້ກໍານົດເອົາການແກ້ໄຂບັນຫາ

ຢາເສບຕິດ ເປັນໜຶ່ງໃນສອງວາລະແຫ່ງຊາດ ຄະນະພັກ-ຄະນະບັນຊາກອງບັນຊາການ ປກສ ແຂວງ ກໍ່ໄດ້ເອົາໃຈໃສ່ນໍາພາ-ຊີ້ນໍາເຈົ້າໜ້າທີ່ ປກສ ແຂວງ, ປກສ ເມືອງ ແລະ ປກສ ກຸ່ມບ້ານປະຕິບັດວາລະດັ່ງກ່າວ ດ້ວຍຄວາມຮັບຜິດຊອບສູງ ແລະ ສາມາດຍາດໄດ້ຜົນສໍາເລັດ.

23

ໃນ 6 ເດືອນປີ 2022 ສາມາດເລີກຮື້ ແລະມ້າງລາຍຄະດີຢາເສບຕິດໄດ້ 46 ເລື່ອງ, ຈັບຜູ້ຖືກຫາໄດ້ 54 ຄົນ, ຍຶດຂອງກາງຢາບ້າໄດ້ 68.615 ເມັດ, ລົດໃຫຍ່ (ຍີຫໍ້ຮຸນໃດ) 1 ຄັນ, ລົດຈັກ 24 ຄັນ, ໂທລະສັບ 35 ໜ່ວຍ, ໂມງ 1 ໜ່ວຍ, ປືນດັດແປງ 2 ກະບອກ, ປືນແກັບ 2 ກະບອກ, ເງິນກີບ 14 ລ້ານກວ່າກີບ, ເງິນໂດລາ 5 ໂດລາ, ເງິນດົ້ງ 3.000 ດົ້ງ ແລະ ວັດຖຸສາຍຄໍຄ້າຍຄືຄໍາ 1 ເສັ້ນ. ພ້ອມນີ້ ກໍ່ເອົາໃຈໃສ່ເຄື່ອນໄຫວເກັບກໍາຂໍ້ມູນ ແລະ ຂຶ້ນບັນຊີເປົ້າໝາຍຄ້າ-ຂາຍຢາເສບຕິດມີ 212 ຄົນ, ຍິງ 8 ຄົນ; ຂຶ້ນບັນຊີເປົ້າໝາຍເສບຢາເສບຕິດ 992 ຄົນ, ຍິງ 19 ຄົນ; ສຶກສາອົບຮົມຜູ້ເສບ ແລະ ມົ້ວສຸມຢາເສບຕິດ 148 ຄົນ, ຍິງ 6 ຄົນ; ກວດນໍ້າປັດສະວະຊອກຫາສານເສບຕິດໄດ້ 463 ຄົນ, ຍິງ 47 ຄົນ ໃນນີ້ພົບສານເສບຕິດ 3 ຄົນ ແລະ ນໍາສົ່ງຜູ້ຕິດຢາເສບຕິດໄປປິ່ນປົວບໍາບັດ-ຟື້ນຟູສຸຂະພາບຕາມສູນຕ່າງໆຈໍານວນ 6 ຄົນ, ຍິງ 2 ຄົນ.

ທ່ານ ພົ.ວ ສົມໄຊ ພູລະຄໍາມະນີ ໃຫ້ຮູ້ຕື່ມວ່າ: ປັດຈຸບັນນີ້ ບັນຫາຢາເສບຕິດຢູ່ແຂວງເຊກອງພວກເຮົາເຫັນວ່າ ຍັງສືບຕໍ່ເພີ່ມທະວີແຜ່ຂະຫຍາຍຫຼາຍຂຶ້ນ ເຊິ່ງໄດ້ເບື່ອເມົາທຸກຊັ້ນຄົນໃນສັງຄົມ ແລະ ກໍ່ໃຫ້ເກີດມີປະກົດການຫຍໍ້ທໍ້ຕ່າງໆໃນສັງຄົມເຊັ່ນ: ບັນຫາຂີ້ລັກງັດແງະ, ຄ້າ-ຂາຍເຖື່ອນ, ຂົ່ມຂືນທໍາສໍາເລົາ ແລະ ອື່ນໆ ອັນສົ່ງຜົນສະທ້ອນໂດຍກົງຕໍ່ຄວາມບໍ່ສະຫງົບຂອງສະຖາບັນຄອບຄົວ, ຄວາມບໍ່ເປັນລະບຽບຮຽບຮ້ອຍຂອງສັງຄົມ ແລະ ການພັດທະນາເສດຖະ ກິດ-ສັງຄົມ. ແຕ່ແນວໃດກໍດີ ຫາກວ່າບັນດາຂະແໜງການຕ່າງໆຂັ້ນແຂວງ, ເມືອງ, ອົງການປົກຄອງບ້ານ ແລະ ສະຖາບັນຄອບຄົວ ເປັນເຈົ້າການພ້ອມກັນຈັດຕັ້ງປະຕິບັດ ວາລະແຫ່ງຊາດ ວ່າດ້ວຍແກ້ໄຂບັນຫາຢາເສບຕິດຮ່ວມກັບເຈົ້າໜ້າທີ່ ປກສ ບັນຫາປະກົດການຫຍໍ້ທໍ້ຕ່າງໆເຫຼົ່ານີ້ກໍຈະນັບມື້ຫຼຸດໜ້ອຍຖອຍລົງເປັນກ້າວໆ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates