ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງ ສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ

18

ກອງປະຊຸມສະຫລຸບຕີລາຄາຄືນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ທົ່ວແຂວງເຊກອງປະຈໍາ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ຈັດຂຶ້ນວັນທີ 16 ມິຖຸນານີ້ທີ່ສະໂມສອນແຂວງເຊກອງ ໂດຍການເປັນປະທານຂອງສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ,

ເລຂາພັກແຂວງ, ປະທານຄະນະກໍາມະການ ປກຊ-ປກສ ແຂວງ, ເຈົ້າແຂວງເຊກອງ; ມີຄະນະປະຈຳພັກແຂວງ, ກໍາມະການພັກແຂວງ, ຄະນກໍາມະການ ປກຊ-ປກສ, ຄະນະພັກ-ຄະນະບັນຊາ 2 ກໍາລັງປະກອບອາວຸດຂັ້ນແຂວງ ແລະ4 ເມືອງເຂົ້າຮ່ວມ.

19

ສະຫາຍ ພົນຈັດຕະວັາ ສົມທອງ ດອນກັນນ້ອຍ ຮອງປະທານ, ຜູ້ປະຈໍາການຄະນະກໍາມະການ ປກຊ-ປກສ ແຂວງ, ຫົວໜ້າການເມືອງກອງບັນຊາການທະຫານແຂວງເຊກອງ ໄດ້ຜ່ານບົດສະຫຼຸບຕີລາຄາສະພາບການເຄື່ອນໄຫວ ວຽກງານ ປກຊ-ປກສ ໂດຍພາຍໃຕ້ການນໍາພາ-ຊີ້ນໍາຂອງຄະພັກ-ອົງການປົກຄອງແຂວງ ກໍຄືຄະນະກໍາມະການ ປກຊ-ປກສ ແຕ່ລະຂັ້ນ, ຄະນະພັກ-ຄະນະບັນຊາ 2 ກໍາລັງປະກອບອາວຸດ ໄດ້ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ X ຂອງອົງຄະນະພັກແຂວງ ຕາມ 4 ໜ້າທີ່ໃຫຍ່ 26 ໂຄງການ ຂອງກະຊວງປ້ອງກັນປະເທດ ແລະ 4 ແຜນງານ 41 ໂຄງການຂອງກະຊວງປ້ອງກັນຄວາມສະຫງົບວາງອອກ ໃນ 6 ເດືອນຜ່ານມາເຊິ່ງສາມາດຍາດໄດ້ຜົນງານຫຼາຍດ້ານເປັນຕົ້ນແມ່ນພວກເຮົາສາມາດຮັກສາໄດ້ສະຖຽນລະພາບ, ຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ລະບົບການຈັດຕັ້ງນັບແຕ່ຂັ້ນຮາກຖານ, ເມືອງ ແລະ ແຂວງ ໄດ້ມີການປັບປຸງ, ຊີວິດການເປັນຢູ່ຂອງພະນັກງານ-ນັກຮົບກໍາລັງ ປກຊ-ປກສ ແລະ ປະຊາຊົນບັນດາເຜົ່ານັບມື້ດີຂຶ້ນ, ກຳລັງ ປກຊ-ປກສ ໄດ້ມີການເຕີບໃຫຍ່ເຂັ້ມແຂງຂຶ້ນເປັນກ້າວໆ. ສັງລວມແລ້ວ ກໍາລັງ ປກຊ-ປກສ ສາມາດປະຕິບັດໜ້າທີ່ອັນມີກຽດຂອງຕົນທີ່ພັກ-ລັດ ແລະ ປະຊາຊົນມອບໝາຍໃຫ້ມີຜົນສໍາເລັດ.

ໃນກອງປະຊຸມ ບັນດາຜູ້ເຂົ້າຮ່ວມ ໄດ້ພ້ອມກັນປະກອບຄໍາຄິດຄໍາເຫັນ ແລະ ປຶກສາຫາລືບັນຫາຕ່າງໆທີ່ເກີດຂຶ້ນໃນໄລຍະຜ່ານມາ ຢູ່ບັນດາເມືອງ, ຍົກໃຫ້ເຫັນສະພາບການລວມ, ຜົນງານ ແລະ ຂໍ້ຫຍຸ້ງຍາກຕ່າງໆ ໂດຍສະເພາະບັນຫາທີ່ຍັງເປັນຈຸດອ່ອນ ແລະ ຂໍ້ຄົງຄ້າງ ເພື່ອສືບຕໍ່ປັບປຸງແກ້ໄຂໃຫ້ດີຂຶ້ນ.

18

ໂອກາດດັ່ງກ່າວ ສະຫາຍ ເຫຼັກໄຫຼ ສີວິໄລ ໄດ້ມີຄໍາເຫັນໂອ້ລົມ ແລະໃຫ້ທິດຊີ້ນໍາຄະນະພັກ-ຄະນະບັນຊາ, ບັນ ດາກົມກອງ ໃຫ້ເພີ່ມທະວີຄວາມເປັນເຈົ້າການນໍາພາ-ຊີ້ນໍາຕໍ່ຂົງເຂດວຽກງານດັ່ງກ່າວໃຫ້ແຂງແຮງ, ມີຈຸດສຸມຕາມທິດຊີ້ນໍາຂອງຂັ້ນເທິງ,ເຄື່ອນໄຫວຕາມພາລະບົດບາດຂອງຕົນຢ່າງແຂງແຮງກວ່າເກົ່າ, ກໍາແໜ້ນ, ຕິດຕາມກວດກາແກ້ໄຂສະພາບຄວາມບໍ່ສະຫງົບໃຫ້ຂາດຕົວ, ປັບປຸງ ແລະ ກໍ່ສ້າງກໍາລັງໃຫ້ເຕີບໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບ, ຖືເອົາການສຶກສາອົບຮົມການເມືອງ-ນໍາພາແນວຄິດເປັນວຽກສໍາຄັນ, ກໍານົດລະອຽດຈະແຈ້ງບັນດາວຽກງານຈຸດສຸມທີ່ຕ້ອງໄດ້ປະຕິບັດໃນແຕ່ລະໄລຍະໂດຍສະເພາະບັນຫາຄົງຄ້າງເຮັດບໍ່ທັນສໍາເລັດ, ມີການປະສານສົມທົບຢ່າງກົມກຽວກັບຂະແໜງການຕ່າງໆອ້ອມຂ້າງແຂວງ ເພື່ອຮັບປະກັນການປະຕິບັດແຜນການໃຫ້ມີຄຸນນະພາບ.

-----

(ຂ່າວ-ພາບ: ສັນຍາ)

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates