ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ແຂວງເຊກອງ ສະເຫຼີມສະຫຼອງວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດ

71

ໃນວັນທີ 6 ມິຖຸນາ 2022 ຢູ່ທີ່ພະແນກຊັບພະຍາກອນທໍາມະຊາດ ແລະສິ່ງແວດລ້ອມ (ພຊກ) ແຂວງເຊກອງ ໄດ້ຈັດພິທີສະເຫຼີມສະຫຼອງວັນສິ່ງແວດລ້ອມໂລກ, ວັນສິ່ງແວດລ້ອມແຫ່ງຊາດ, ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ, ໂດຍການເປັນກຽດເຂົ້າຮ່ວມມີທ່ານ ນາງ ຈັນຫອມ ມະຫາໄຊ ຮອງເລຂາພັກແຂວງ,

ທ່ານ ບຸນລິດ ສັກບົວວົງ ວ່າການຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມ, ມີບັນດາຄະນະພະແນກ, ຄະນະຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມເມືອງລະມາມ ພ້ອມດ້ວຍພະນັກງານວິຊາການພາຍໃນພະແນກ ແລະຫ້ອງການຂັ້ນເມືອງ, ຕະຫຼອດຮອດລູກຫຼານພະນັກງານ ກໍ່ໄດ້ເຂົ້າຮ່ວມກັນຢ່າງພ້ອມພຽງ.

72

ທ່ານ ນາງ ຈັນຫອມ ມະຫາໄຊ ໄດ້ກ່າວໃນພິທີໃນຄັ້ງນີ້ວ່າ: ເນື່ອງໃນໂອກາດພິທີສະເຫຼີມສະຫຼອງ ວັນສິ່ງແວດລ້ອມແຫ່ງຊາດ ແລະ ວັນສິ່ງແວດລ້ອມໂລກວັນທີ 5 ມິຖຸນາ, ສຳລັບແຂວງເຊກອງ ຂໍໃຫ້ຖືເອົາໂອກາດນີ້ ດຳເນີນການໂຄສະນາ, ປູກຈິດສຳນຶກ ແລະ ສ້າງຂະບວນການ ໃຫ້ສອດຄ່ອງຕາມຄຳຂວັນຂອງປີ 2022 ທີ່ວ່າໂລກມີໜ່ວຍດຽວ ONLY ONE EARTH’’ ສະເພາະປີນີ້ ແລະ ພ້ອມກັນຫັນປ່ຽນຈິນຕະນາການ ໄປພ້ອມໆກັບການເພີ່ມທະວີ ການຄຸ້ມຄອງຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມ ຕາມທິດສີຂຽວ ແລະ ຍືນຍົງ ຕາມລະບຽບການ ແລະ ກົດໝາຍຢ່າງເຂັ້ມງວດ ໃຫ້ບັນລຸຕາມວິໄສທັດ, ຕາມຍຸດທະສາດ ແລະ ແຜນ 5 ປີ ຂອງຂະແໜງການ ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມ ໃຫ້ມີຄວາມຍືນຍົງ.

73

ໃນໂອກາດນີ້ ທ່ານຈຶ່ງຮຽກຮ້ອງມາຍັງທຸກການຈັດຕັ້ງພັກ-ລັດ, ອຳນາດການປົກຄອງທຸກຂັ້ນ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ອົງການຈັດຕັ້ງສາກົນ ແລະ ຫົວໜ່ວຍທຸລະກິດຕ່າງໆ ຕະຫຼອດເຖິງປະຊາຊົນທຸກທົ່ວໜ້າ ຈົ່ງພ້ອມກັນຈັດຕັ້ງປະຕິບັດພັນທະຂອງຕົນເຂົ້າໃນການຈັດຕັ້ງປະຕິບັດຄໍາຂວັນ ຂອງປີ 2022 ເພື່ອ ໃຫ້ປະກົດຜົນເປັນຈິງ. ຈົ່ງພ້ອມກັນມີຈິນຕະນາການວ່າ ພວກເຮົາທຳລາຍສິ່ງແວດລ້ອມກໍ່ຄືພວກເຮົາ ທຳລາຍຕົນເອງ.

ໃນພິທີ ທ່ານ ອໍາໄພວັນ ຊະນິພົນ ຮອງຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມໄດ້ຍົກໃຫ້ເຫັນຫວັດຄວາມເປັນມາຂອງວັນສິ່ງແວດລ້ອມໂລກຄົບຮອບ 50 ປີ , ວັນສິ່ງແວດລ້ອມແຫ່ງຊາດ ວັນທີ 5 ມິຖຸນາ ຄົບຮອບ 23 ປີ, ເຊິ່ງຍາມໃດ ພັກ ແລະ ລັດຖະບານ ແຫ່ງ ສປປ ລາວ ແມ່ນໄດ້ເອົາໃຈໃສ່ສົ່ງເສີມການປົກປັກຮັກສາ, ບູລະນະຟື້ນຟູ ສິ່ງແວດລ້ອມ, ສ້າງຈິດສຳນຶກຄວາມຮູ້ ພ້ອມທັງປຸກລະດົມບຸກຄົນ, ການຈັດຕັ້ງພາຍໃນ ແລະ ຕ່າງປະເທດ ໃຫ້ເຫັນໄດ້ຄວາມສຳຄັນຂອງສິ່ງແວດລ້ອມ ຂຽວ, ສະອາດ, ງາມຕາ ປາສະຈາກມົນລະພິດ ໂດຍອີງຕາມກົດໝາຍ ວ່າດ້ວຍການປົກປັກຮັກສາສິ່ງແວດລ້ອມ ສະບັບປັບປຸງ ເພື່ອສົ່ງເສີມ, ສ້າງຈິດສຳນຶກແລະຍົກລະດັບຄວາມຕື່ນຕົວ ໃນການປົກປັກຮັກສາສິ່ງແວດລ້ອມ ໃຫ້ແກ່ປະຊາຊົນ.

ນອກຈາກນີ້ ໄດ້ເລົ່າຄືນປະຫວັດຄວາມເປັນມາຂອງວັນປູກຕົ້ນໄມ້ແຫ່ງຊາດຮອບ 42 ປີ ແລະວັນເດັກນ້ອຍສາກົນຄົບຮອບ 97 ປີ; ຊຶ່ງໃນການຈັດງານສະເຫຼີມສະຫຼອງຄັ້ງນີ້ ຍັງໄດ້ກິດຈະກຳປູກຕົ້ນໄມ້ອ້ອມຮອບ ພຊກ ຕື່ມອີກ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates