ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງ ປາຖະກະຖາ ວັນໂທລະຄົມມະນາຄົມສາກົນ ຄົບຮອບ157ປີ

55

ພະແນກເຕັກໂນໂລຊີ ແລະ ການສື່ສານແຂວງເຊກອງ ໄດ້ຈັດພິທີປາຖະກະຖາວັນໂທລະຄົມມະນາຄົມສາກົນ ຄົບຮອບ 157 ປີ (17/5/1865-17/5/2022) ຕິດພັນກັບການເຜີຍແຜ່ມະ​ຕິ​ສໍ​າ​ຄັນ​ຕ່າງໆ​ຂອງ​ພັກ-ລັດ

ໃນວັນທີ 24 ພຶດສະພາ 2022 ທີ່ພະແນກດັ່ງກ່າວ ໂດຍມີທ່ານ ສຸດສະນະ ສີຫາວົງ ກຳມະການພັກແຂວງ, ເລຂາຄະນະພັກ, ຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ມີຄະນະພັກຮາກຖານ, ຄະນະໜ່ວຍພັກ, ຮອງຫົວໜ້າພະແນກ, ຄະນະອຳນວຍການບໍລິສັດຜູ້ໃຫ້ບໍລິການທາງດ້ານໂທລະຄົມມະນາຄົມ ແລະ ພະນັກງານ-ລັດຖະກອນເຂົ້າຮ່ວມ.

55

ໂອກາດນີ້ ທ່ານ ສຸດສະນະ ສີຫາວົງ ໄດ້ຍົກໃຫ້ເຫັນເຖິງສະພາບການພັດທະນາເຕັກໂນໂລຊີ, ໂທລະຄົມມະນາຄົມ ຕະຫຼອດໄລຍະ 157 ປີ ເຊິ່ງໄດ້ມີການຂະຫຍາຍຕົວຢ່າງໄວວາ ແລະ ໄດ້ກາຍເປັນປັດໄຈທີ່ຂາດບໍ່ໄດ້ ໃນການດຳລົງຊີວິດ ແລະ ໃນອະນາຄົດວຽກງານໂທລະຄົມມະນາຄົມ ຍັງຈະສືບຕໍ່ ພັດທະນາຢ່າງຕໍ່ເນື່ອງ ເພື່ອຕອບສະໜອງຄວາມຮຽກຮ້ອງຕ້ອງການຂອງການດຳລົງຊີວິດ ແລະ ພັດທະນາ ເສດຖະກິດ-ສັງຄົມ. ສະເພາະໃນ ສປປ ລາວ ໃນນາມເປັນສະມາຊິກ ສະຫະພາບໂທລະຄົມມະນາຄົມສາກົນ ໄດ້ຈັດຕັ້ງສະເຫຼີມສະຫຼອງວັນໂທລະຄົມມະນາຄົມສາກົນ ພາຍໃຕ້ວິໄສທັດການພັດທະນາເສດຖະກິດດີຈິຕອນຮອດປີ 2040 ຄື: ນຳໃຊ້ເຕັກໂນໂລຊີດີຈິຕອນ ເປັນເຄື່ອງມືສຳຄັນໃນການຂັບເຄື່ອນທຸກຂະແໜງການ ເພື່ອສ້າງເສດຖະກິດດີຈິຕອນ ແນໃສ່ປະກອບສ່ວນເຂົ້າໃນການສ້າງເສດຖະກິດຂອງປະເທດ ໃຫ້ມີການຂະຫຍາຍຕົວຢ່າງເຂັ້ມແຂງ, ໝັ້ນທ່ຽງ ແລະ ຍືນຍົງ . ສປປ ລາວ ແມ່ນໄດ້ກໍານົດເອົາວັນທີ 13 ມີນາ 1965 ເປັນວັນສ້າງຕັ້ງໂທລະຄົມມະນາຄົມແຫ່ງຊາດ ຕາມມາດຕາ 53 ຂອງກົດໝາຍວ່າດ້ວຍໂທລະຄົມມະນາຄົມ.

56

ໂດຍການປາຖະກະຖາຄັ້ງນີ້ ແມ່ນການສ້າງຈິດສຳນຶກ ແລະ ສ້າງຄວາມຮັບຮູ້ເຂົ້າໃຈໃຫ້ແກ່ທຸກຄົນໃນສັງຄົມເວົ້າລວມ, ເວົ້າສະເພາະພະນັກງານ-ລັດຖະກອນພາຍໃນພະແນກ ໃຫ້ເຂົ້າໃຈຢ່າງເລິກເຊິ່ງ ເຖິງບົດບາດ ແລະ ຄວາມສຳຄັນຂອງວຽກງານໂທລະຄົມມະນາຄົມຕໍ່ການພັດທະນາເສດຖະກິດ-ສັງຄົມ ແລະ ເພື່ອພັດທະນາວຽກງານໂທລະຄົມມະນາຄົມ, ໃຫ້ມີການຊຸກຍູ້ສົ່ງເສີມການຄ້າແບບອອນລາຍ, ການຜະລິດອຸດສາຫະກຳໃນຍຸກດີຈິຕອນ ແລະ ການຖ່າຍທອດເຕັກໂນໂລຊີດີຈິຕອນທີ່ກ້າວໜ້າຂອງໂລກເຂົ້າມາໃນປະເທດ ເພື່ອປະກອບສ່ວນໃນການຈັດຕັ້ງຜັນຂະຫຍາຍແຜນພັດທະນາເສດຖະກິດດີຈິຕອນພາຍໃນປະເທດໃຫ້ມີຄວາມກ້າວໜ້າ.

ຂະນະດຽວກັນ ຍັງໄດ້ເຜີຍແຜ່ຜົນສຳເລັດມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ, ມະຕິກອງປະຊຸມຂອງສະພາແຫ່ງຊາດ ວ່າດ້ວຍການຮັບຮອງເອົາວິໄສທັດການພັດທະນາເສດຖະກິດດີຈິຕອນແຫ່ງຊາດໄລຍະ 20 ປີ, ຍຸດທະສາດການພັດທະນາເສດຖະກິດແຫ່ງຊາດ ໄລຍະ 10 ປີ, ແຜນພັດທະນາເສດຖະກິດດີຈິຕອນແຫ່ງຊາດ ໄລຍະ 5 ປີ ໃນຕໍ່ໜ້າ ແລະ ມອບໃບຍ້ອງຍໍໃຫ້ພະນັກງານທີ່ມີຜົນງານດີເດັ່ນ ປະກອບສ່ວນເຂົ້າໃນການຈັດຕັ້ງປະຕິບັດໜ້າທີ່ວຽກງານໃນໄລຍະ 1 ປີ (2021) ຜ່ານມາ.


ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates