ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ປາຖະກະຖາວັນສ້າງຕັ້ງແຂວງ ເຊກອງ ຄົບຮອບ 38 ປີ

29

ວັນທີ8ເມສາ2022ແຂວງເຊກອງໄດ້ຈັດພິທີປາຖະກະຖາວັນສ້າງຕັ້ງແຂວງເຊກອງ ຄົບຮອບ38ປີ (14ເມສາ1984ຫາ 14ເມສາ2022) ໂດຍພາຍໃຕ້ການເປັນປະທານ

ແລະ ໃຫ້ກຽດປາຖະກະຖາຂອງທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ມີຮອງເລຂາພັກແຂວງ, ຄະນະປະຈຳພັກແຂວງ,ກຳມະການພັກແຂວງ, ເລຂາພັກເມືອງ-ເຈົ້າເມືອງ, ຫົວໜ້າ-ຮອງພະແນກ ແລະ ພະນັກງານອາວຸໂສບໍນານເຂົ້າຮ່ວມຮັບຟັງ.

30

 

ໃນພິທີ ທ່ານເຫຼັກໄຫຼສີວິໄລໄດ້ຍົກໃຫ້ເຫັນປະຫວັດຄວາມເປັນມາ ໂດຍແຂວງເຊກອງໄດ້ຮັບການສ້າງຕັ້ງຂຶ້ນນໃນວັນທີ 14 ເມສາ 1984 ແຍກອອກຈາກແຂວງສາລະວັນຕາມດຳລັດສະບັບເລກທີ041/ປສລ ເຊິ່ງກ່ອນໜ້ານີ້ 38 ປີ ແມ່ນເປັນເຂດພູດອຍຫ່າງໄກສອກຫຼີກທີ່ສຸດຂອງປະເທດ, ປະຊາຊົນຍັງມີແນວຄິດຄອງເດີມ, ການເຊື່ອຖືງົມງວາຍຍັງແຜ່ຫຼາຍ, ພະນັກງານຍັງຂາດເຂີນດ້ານປະລິມານ ແລະ ຄຸນນະພາບ, ພື້ນຖານໂຄງລ່າງດ້ານເສດຖະກິດເປັນຕົ້ນ ແມ່ນເສັ້ນທາງຄົມມະນາຄົມຫຍຸ້ງຍາກທຸລະກັນດານ, ເຮືອນຊານ, ສຳນັກງານຂອງແຂວງແມ່ນມຸງຫຍ້າ, ແອ້ມຝາກະຕີ, ຊີວິດການເປັນຢູ່ຂອງພະນັກງານມີຄວາມຫຍຸ້ງຍາກຝຶດເຄືອງແລະຂຶ້ນກັບທໍາມະຊາດ.ແຕ່ດ້ວຍຈິດໃຈຟົດຟື້ນປະຕິວັດແລະປະຊາຊົນມີຄວາມຮັກຊາດຮັກລະບອບໃຫມ່ພາຍໃຕ້ການນໍາພາຂອງຄະນະພັກ-ອໍານາດການປົກຄອງແຂວງແຕ່ລະສະໄໝ ບວກກັບຄວາມສາມັກຄີເປັນຈິດຫນຶ່ງໃຈດຽວຂອງປະຊາຊົນ, ສູ້ຊົນຜ່ານຜ່າຄວາມຫຍຸ້ງ ຍາກກັບອຸປະສັກນາໆປະການແລະທັງເປັນການທົດສອບອັນຂ້ຽວຂາດສັບສົນນັບບໍ່ຖ້ວນເຮັດໃຫ້ແຂວງເຊກອງພວກເຮົາໄດ້ຮັບການສ້າງສາພັດທະນາ ແລະ ມີການປ່ຽນແປງອັນໃຫຍ່ຫຼວງຫຼາຍດ້ານທີ່ພົ້ນເດັ່ນຄື: ດ້ານວຽກງານປ້ອງກັນຊາດ-ປ້ອງກັນຄວາມສະຫງົບໄດ້ຮັບການປັບປຸງ, ພັດທະນາທາງດ້ານປະລິມານ ແລະ ຄຸນນະພາບ, ເຮັດໃຫ້ແຂວງມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ; ການພັດທະນາທົ່ວສັງຄົມມີຄວາມຕັ້ງໜ້າຟົດຟື້ນ, ກໍາລັງແຮງບົ່ມຊ້ອນຂອງພາກສ່ວນເສດຖະກິດໄດ້ຮັບການຂຸດຄົ້ນ ແລະ ເສີມຂະຫຍາຍຢ່າງແຂງແຮງເຂົ້າໃນກໍາລັງການຜະລິດ, ຫັນປ່ຽນຈາກການທໍາມາຫາກິນຈາກທໍາມະຊາດໄປສູ່ການຜິລິດສິນຄ້າເທື່ອລະກ້າວ, ເຮັດໃຫ້ເສດຖະກິດນັບມື້ຂະຫຍາຍຕົວ, ຊີວິດການເປັນຢູ່ປະຊາຊົນດີຂຶ້ນເປັນກ້າວໆ; ການຜະລິດສະບຽງອາຫານ ແລະ ການຜະລິດເປັນສິນຄ້າກໍ່ເພີ່ມຂຶ້ນເປັນຕົ້ນ ແມ່ນຂະບວນການປູກກາເຟ, ໝາກແໜ່ງ, ສາລີອາຫານສັດ, ມັນຕົ້ນທາດແປ້ງ ແລະ ການລ້ຽງສັດປະເພດຕ່າງໆ.

29

ທ່ານເຈົ້າແຂວງເຊກອງ ກ່າວຕື່ມວ່າ: ໄລຍະ 38 ປີຂອງການພັດທະນາແຂວງເຊກອງ, ເປັນໄລຍະທາງທີ່ສະຫງ່າລາສີດ້ວຍມູນເຊື້ອອັນປະເສີດແລະຜົນງານທີ່ຍາດມາໄດ້ກາຍເປັນກໍາລັງແຮງອັນມະຫາສານເຮັດໃຫ້ເສັ້ນທາງກ້າວເດີນຂອງແຂວງເຊກອງພວກເຮົາສືບຕໍ່ດໍາເນີນໄປດ້ວຍຄວາມໜັກແໜ້ນ ແລະ ມີການຫັນປ່ຽນທີ່ແຂງແຮງ, ເລິກເຊິ່ງ, ຮອບດ້ານ. ຄະນະພັກ-ຄະນະນໍາແຕ່ລະສະໄໝໄດ້ເຮັດທຸກສິ່ງທຸກຢ່າງເພື່ອຄວາມສົມບູນພູນສຸກຂອງປະຊາຊົນບັນດາເຜົ່າຊາວແຂວງເຊກອງ, ເຮັດໃຫ້ຈຸດໝາຍປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມສາມັກຄີເປັນປຶກແຜ່ນ, ປະຊາທິປະໄຕ, ຍຸຕິທໍາ ແລະສີວິໄລປະກົດຜົນເປັນຈິງ.

-----

(ຂ່າວ-ພາບ: ສັນຍາ)

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates