ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ແຂວງເຊກອງ ປາຖະກະຖາວັນແມ່ຍິງສາກົນ ຄົບຮອບ 112 ປີ

9

ວັນທີ 7 ມີນາ 2022 ນີ້ ທີ່ສະໂມສອນແຂວງ ຄະນະບໍລິຫານງານສະຫະພັນແມ່ຍິງແຂວງເຊກອງ ໄດ້ຈັດພິທີປາຖະກະຖາວັນແມ່ຍິງສາກົນ ຄົບຮອບ 112 ປີ (8 ມີນາ 1910-8 ມີນາ 2022) ພາຍໃຕ້ຄໍາຂວັນ ຄວາມສະເໝີພາບຍິງ-ຊາຍ ໃນມື້ນີ້ ເພື່ອຄວາມຍືນຍົງໃນອະນາຄົດ “ 

ໂດຍພາຍໃຕ້ການເປັນປະທານຂອງທ່ານ ນາງ ວິໄລວັນ ດາລາສິນ ກໍາມະການພັກແຂວງ, ປະທານຄະນະບໍລິຫານງານສະຫະພັນແມ່ຍິງແຂວງ, ມີທ່ານ ນາງ ວັນວິໄລ ສີວິໄລ ພັນລະຍາຂອງທ່ານເຈົ້າແຂວງເຊກອງ, ບັນດາທ່ານຫົວໜ້າ-ຮອງພະແນກ, ຫ້ອງການ, ພັນລະຍາການນໍາ ແລະ ຄະນະໜ່ວຍສະຫະພັນແມ່ຍິງຮາກຖານອ້ອມຂ້າງແຂວງເຂົ້າຮ່ວມ.

10

 

ທ່ານ ນາງ ມະໄລວອນ ສາຍນໍ້າລິນ ໄດ້ຫວນຄືນມູນເຊື້ອວັນແມ່ຍິງສາກົນວ່າ: ວັນແມ່ຍິງສາກົນໄດ້ກໍາເນີດເກີດຂຶ້ນໃນທ່າມກາງເສດຖະກິດຂອງພວກສັກດີນາແລະນາຍທຶນຂະຫຍາຍຕົວເຊິ່ງມັນໄດ້ສ້າງຄວາມຮັ່ງມີໃຫ້ແກ່ພວກນາຍທຶນ,ແຕ່ຊໍ້າພັດສ້າງຄວາມທຸກຍາກລໍາບາກໃຫ້ແກ່ຊາວຜູ້ອອກແຮງງານໂດຍສະເພາະແມ່ນແມ່ຍິງຢູ່ພາຍໃຕ້ລະບອບສັກດີນາຂອງນາຍທຶນ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງແຕ່ໄດ້ຮັບຄ່າຈ້າງນ້ອຍ, ບໍ່ມີລະບອບປົກຄອງຮັກສາສຸຂະພາບແມ່ຍິງແລະເດັກນ້ອຍ. ຕໍ່ກັບສະພາບການດັ່ງກ່າວກໍາມະກອນແມ່ຍິງໄດ້ພ້ອມກັນລຸກຮືຂຶ້ນຕໍ່ສູ້ ທວງໃຫ້ພວກນາຍທຶນແກ້ໄຂຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນ, ໃນວັນທີ8 ມີນາປີ1908 ແມ່ຍິງຈຳນວນ15.000 ຄົນຢູ່ເມືອງນິວຢອກສະຫະລັດອາເມຣິກາໄດ້ປະທ້ວງໃຫ້ພວກນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດກົດຂີ່ຂູດຮີດແຮງງານເດັກນ້ອຍແລະທວງໃຫ້ແມ່ຍິງມີສິດສະເໝີພາບ, ມີສິດໃນການອອກສຽງ, ມາຮອດປີ1910 ຂະບວນການຕໍ່ສູ້ຂອງແມ່ຍິງໄດ້ແຜ່ຂະຫຍາຍກວ້າງອອກໄປສູ່ປະເທດນາຍທຶນແລະໃນປີນີ້, ກອງປະຊຸມສາກົນກ່ຽວກັບແມ່ຍິງຄັ້ງທໍາອິດກໍໄດ້ຈັດຂຶ້ນຢູ່ປະເທດແດນມາກຊຶ່ງກອງປະຊຸມດັ່ງກ່າວ ກໍໄດ້ຮັບຮອງເອົາວັນທີ8 ມີນາຂອງທຸກໆປີເປັນວັນແມ່ຍິງສາກົນ.

ໃນໂອກາດນີ້, ທ່ານ ນາງ ວິໄລວັນ ດາລາສິນ ໄດ້ເນັ້ນໜັກໃຫ້ຄະນະໜ່ວຍສະຫະພັນແມ່ຍິງຮາກຖານ ກໍຄືສະມາຊິກແມ່ຍິງທຸກສະຫາຍ ຈົ່ງພ້ອມກັນເອົາໃຈໃສ່ຄົ້ນຄວ້າ, ເຊື່ອມຊຶມ ແລະ ກໍາແໜ້ນເນື້ອໃນເອກະສານທີ່ນໍາມາປາຖະກະຖາໃນຄັ້ງນີ້, ໃຫ້ເຂົ້າໃຈພາລະບົດບາດຂອງແມ່ຍິງ, ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ສະມາ ຊິກພາຍໃນໜ່ວຍຂອງຕົນຢ່າງເປັນປົກກະຕິຕໍ່ເນື່ອງ, ເພີ່ມທະວີຄວາມເປັນແບບຢ່າງນໍາໜ້າ, ປະຕິບັດໜ້າທີ່ວຽກງານວິຊາສະເພາະ ຕິດພັນກັບການປະຕິບັດຂໍ້ແຂ່ງຂັນ 3 ດີຂອງສູນກາງສະຫະພັນແມ່ຍິງລາວວາງອອກ ເພື່ອປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືແຂວງເຊກອງໃຫ້ນັບມື້ພັດທະນາກ້າວຂຶ້ນ.

-----

(ຂ່າວ-ພາບ: ສັນຍາ)

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates