ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ສາທາລະນະສຸກ ແຂວງເຊກອງ ສະຫຼຸບວຽກງານປະຈໍາປີ 2021

4

ກອງປະຊຸມສະຫຼຸບການຈັດຕັ້ງປະຕິບັດວຽກງານສາທາລະນະສຸກທົ່ວແຂວງເຊກອງປະຈໍາປີ 2021ແລະ ວາງທິດທາງແຜນການປີ 2022 ໄດ້ຈັດຂຶ້ນໃນວັນທີ 3 ມີນາ 2022 ນີ້ ທີ່ສະໂມສອນສະພາປະຊາຊົນແຂວງ

ພາຍໃຕ້ການເປັນປະທານຂອງທ່ານ ດຣ. ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງ, ມີທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ, ທ່ານ ນາງ ຈັນຫອມ ມະຫາໄຊ ຮອງເລຂາພັກແຂວງເຊກອງ, ບັນດາຫົວໜ້າກົມ-ຮອງກົມ, ທ່ານຮອງເຈົ້າເມືອງ, ຫົວໜ້າ-ຮອງພະແນກ, ພະແນກສາທາລະນະສຸກແຂວງອັດຕະປື, ຈໍາປາສັກ, ສາລະວັນ ແລະ ຫ້ອງການສາທາລະນະສຸກເມືອງ 4 ຕົວເມືອງພາຍໃນແຂວງເຂົ້າຮ່ວມ.

5

          ທ່ານ ດຣ. ຄໍາໄຫຼ ສັນຕິພູມ ກ່າວວ່າ: ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ທີ່ຖືເອົາວຽກງານກັນພະຍາດ-ສົ່ງເສີມຂະພາບເປັນຕົ້ນຕໍ ແລະ ຖືເອົາການບໍລິການປິ່ນປົວທີ່ມີຄຸນນະພາບທົ່ວເຖິງ ແລະ ເປັນທໍາເປັນວຽກສໍາຄັນ ກໍຄືສູ້ຊົນປະຕິບັດ 11 ຕົວຊີ້ວັດທີ່ສະພາແຫ່ງຊາດຮັບຮອງໃຫ້ສາມາດບັນລຸໄດ້ຕາມແຜນການທີ່ວາງໄວ້ ແລະ ຮັບປະກັນໃຫ້ປະຊາຊົນບັນດາເຜົ່າໄດ້ໃນທົ່ວແຂວງສາມາດເຂົ້າເຖິງການບໍລິການທີ່ມີຄຸນນະພາບ ເຊິ່ງໃນປີ 2021 ຜ່ານມາ ຂະແໜງສາທາລະນະສຸກໄດ້ຜັນຂະຫຍາຍ ແລະ ຈັດຕັ້ງປະຕິບັດແຜນພັດທະນາສາທາລະນະສຸກຕາມ 8 ແຜນງານໃຫຍ່ 49 ແຜນງານຍ່ອຍ ແລະ 133 ໂຄງການ, ພ້ອມທັງປະຕິບັດຫຼາຍມາດຕະການນະໂຍບາຍ ອັນເຮັດໃຫ້ການຈັດຕັ້ງປະຕິບັດ 11 ຕົວຊີ້ວັດ ມີຄວາມຄືບໜ້າເປັນທີ່ພໍໃຈ, ແຕ່ກໍຍັງມີບາງຕົວຊີ້ວັດທີ່ບໍ່ສາມາດບັນລຸຕາມແຜນການ.

6

          ໂອກາດດັ່ງກ່າວ ທ່ານ ດຣ. ພູຂັນ ຈັນທະວົງ ຮອງຫົວໜ້າພະແນກສາທາລະນະສຸກແຂວງໄດ້ຂຶ້ນຜ່ານບົດສະ ຫຼຸບການຈັດຕັ້ງປະຕິບັດວຽກງານສາທາລະນະສຸກປະຈໍາປີ 2021 ແລະ ວາງທິດທາງແຜນການປີ 2022 ໃຫ້ຮູ້ວ່າ: ສໍາລັບອັດຕາສ່ວນຕົວຊີ້ວັດທີ່ສາມາດບັນລຸຕາມແຜນມີ 7 ຕົວຊີ້ວັດຄື: ອັດຕາສ່ວນເດັກລຸ່ມ 5 ປີທີ່ມີນໍ້າໜັກຕໍ່າກວ່າມາດຖານ, ອັດຕາສ່ວນເດັກລຸ່ມ 5 ປີທີ່ມີລວງສູງຕໍ່າກວ່າມາດຖານ, ອັດຕາສ່ວນອັດຕາການຕາຍຂອງເດັກນ້ອຍລຸ່ມ 1 ປີ, ອັດຕາສ່ວນອັດຕາການຕາຍຂອງເດັກນ້ອຍລຸ່ມ 5 ປີ, ອັດຕາສ່ວນອັດຕາການຕາຍຂອງແມ່, ຕົວຊີ້ວັດການເກີດລູກມີແພດຊ່ວຍ ແລະ ອັດຕາປົກຄຸມປະກັນສຸຂະພາບທົ່ວປວງຊົນ. ສໍາລັບວຽກງານທິດທາງປີ 2022 ຈະສືບຕໍ່ປັບປຸງສະຖານທີ່ບໍລິການຕ່າງໆໃຫ້ໄດ້ມາດຕະຖານສາມາດນໍາໃຊ້ອຸປະກອນເຕັກໂນໂລຊີທັນສະໄໝ, ປະຕິບັດຕົວເລກຄາດໝາຍຕົວຊີ້ວັດທີ່ຍັງບໍ່ທັນບັນລຸແຜນການໃຫ້ໄດ້ຕາມແຜນການ, ຍົກລະດັບຄຸນນະພາບການການຈັດຕັ້ງປະຕິບັດວຽກງານ ໂດຍສະເພາະການບໍລິການປິ່ນປົວສຸຂະພາບໃຫ້ດີຂຶ້ນ, ຈັດຕັ້ງປະເມີນນະໂຍບາຍ 5 ດີ 1 ພໍໃຈ ແລະ ປຸກລະດົມທົ່ວປວງຊົນໃຫ້ເຂົ້າຮ່ວມເປັນເຈົ້າການຮັກສາສຸຂະພາບຂອງຕົນ ແລະ ໂຄສະນາສຶກສາອົບຮົມວຽກງານອື່ນໆ.

-----

(ຂ່າວ-ພາບ: ສັນຍາ)

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates