ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ການນໍາແຂວງເຊກອງ ຕ້ອນຮັບ ການນໍາຂັ້ນສູງແຂວງກວ້າງຈີ້ ສສ ຫວຽດນາມ

58

ຄະນະພັກ-ຄະນະຜູ້ແທນຂັ້ນສູງແຂວງເຊກອງ ເຊິ່ງນໍາໂດຍສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆເຊກອງ ໄດ້ຕ້ອນຮັບຄະນະພັກ-ຄະນະຜູ້ແທນຂັ້ນສູງແຂວງກວ້າງຈີ້ ແຫ່ງ ສສ ຫວຽດນາມ 

61

ໂດຍມີສະຫາຍ ເລ ກວາງ ຕຸງ ກໍາມະການສູນກາງພັກກອມມູຍນິດຫວຽດນາມ, ເລຂາຄະນະບໍລິຫານງານພັກແຂວງ, ຫົວໜ້າຄະນະຜູ້ແທນສະມາຊິກສະພາແຫ່ງຊາດແຂວງກວ້າງຈີ້ ພ້ອມຄະນະ ໃນໂອກາດມາຢ້ຽມຢາມແຂວງເຊກອງໃນວັນທີ 19 ກຸມພາ 2022 ນີ້.

59

          ໂອກາດນີ້, ສະຫາຍ ເຫຼັກໄຫຼ ສີວິໄລ ໄດ້ກ່າວສະແດງຄວາມຕ້ອນຮັບ, ລາຍງານຫຍໍ້ກ່ຽວກັບຜົນສໍາເລັດການພັດທະນາເສດຖະກິດ-ສັງຄົມຂອງແຂວງເຊກອງໃນປີ 2021 ຜ່ານມາ, ສະເໜີບາງບັນຫາສໍາຄັນແລກປ່ຽນໃນການພົວພັນຮ່ວມຂອງສອງແຂວງໃນອະນາຄົດ ແລະ ຕີລາຄາສູງຕໍ່ການມາຢ້ຽມຢາມຂອງສະຫາຍ ເລ ກວາງ ຕຸງ ພ້ອມຄະນະຜູ້ແທນຂັ້ນສູງແຂວງກວ້າງຈີ້ ແຫ່ງ ສສ ຫວຽດນາມ ຊຶ່ງເປັນແຂວງທໍາອິດຂອງ ສສ ຫວຽດນາມ ທີ່ເດີນທາງມາຢ້ຽມຢາມແຂວງເຊກອງ ນັບແຕ່ມີການລະບາດຂອງພະຍາດໂຄວິດ-19 ແລະ ເປັນຂີດໝາຍສໍາຄັນໃຫ້ແກ່ການເສີມຂະຫຍາຍສາຍພົວພັນມິດຕະພາບ, ການຮ່ວມມືແບບພິເສດຂອງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມເວົ້າລວມ, ເວົ້າສະເພາະລະຫວ່າງແຂວງເຊກອງ ກັບ ແຂວງກວ້າງຈີ້ ສສ ຫວຽດນາມໃຫ້ນັບມື້ເຂົ້າສູ່ລວງເລິກ ແລະ ມີປະສິດທິຜົນຫຼາຍຂຶ້ນ.

60

          ໂອກາດດຽວກັນນີ້, ສະຫາຍ ເລ ກວາງ ຕຸງ ໄດ້ສະແດງຄວາມຂອບໃຈມາຍັງຄະນະພັກ-ຄະນະຜູ້ແທນຂັ້ນສູງແຂວງເຊກອງ ທີ່ໃຫ້ການຕ້ອນຮັບຢ່າງອົບອຸ່ນ, ຈິງໃຈ ແລະ ສະຫາຍກໍໄດ້ຍ້ອງຍໍຊົມເຊີຍຕໍ່ຜົນງານການນໍາພາ-ຊີ້ນໍາຂອງຄະນະພັກ-ອົງການປົກຄອງແຂວງເຊກອງຕໍ່ການພັດທະນາເສດຖະກິດ-ສັງຄົມໃນປີ 2021 ຜ່ານມາ ຊຶ່ງການມາຢ້ຽມ ຢາມແຂວງເຊກອງຄັ້ງນີ້ ເປັນການປະກອບສ່ວນສໍາຄັນ ເຂົ້າໃນການພົວພັນ ແລະ ການຮ່ວມມືແບບພິເສດຂອງສອງຊາດລາວ-ຫວຽດນາມໃຫ້ກ້າວເຂົ້າສູ່ລວງເລິກ, ທັງເປັນການຊົມເຊີຍປີມິດຕະພາບລາວ-ຫວຽດນາມ, ຫວຽດນາມ-ລາວ ປີ 2022 ເພື່ອເປັນສັນຍາລັກໃນການຮ່ວມມື ແລະ ນໍາເອົາຜົນປະໂຫຍດການພັດທະນາມາສູ່ປະຊາຊົນສອງແຂວງໃນຕໍ່ໜ້າ.

-----

ຂ່າວ-ພາບ: ສັນຍາ

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates