ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ລະມາມ ສະຫຼຸບຕີລາຄາວຽກງານກວດກາລັດປະຈຳປີ2017 ແລະວາງທິດທາງແຜນການປີ2018

0132

#ຂ່າວ-ພາບ:ດາວສະຫວັນ

ກອງປະຊຸມສະຫຼຸບຕີລາຄາວຽກງານກວດກາລັດຂອງເມືອງລະມາມໄດ້ຈັດຂຶ້ນໃນຕອນເຊົ້າຂອງວັນທີ 15 ມີນາ 2018 ທີ່ສະໂມສອນຫ້ອງວ່າການເມືອງດັ່ງກ່າວ, ພາຍໄຕ້ການເຂົ້າຮ່ວມເປັນປະທານຂອງທ່ານ ປອ ແພງສີ ສີລາວີ ກຳມະການພັກແຂວງ ເລຂາພັກເມືອງ-ເຈົ້າເມືອງໆລະມາມ ມີບັນດາຄະນະປະຈຳພັກ, ກຳມະການພັກ, ຫົວໜ້າ, ຮອງຫ້ອງການພ້ອມດ້ວຍພະນັກງານ ວິຊາການ ແລະ ພາກສວ່ນທີ່ກ່ຽວຂ້ອງເຂົ້າຮວ່ມຢ່າວພ້ອມພຽງ.

0133

ທ່ານ ສຸວັນຄຳ ແກ້ວປະເສີດ ຮອງປະທານກວດກາລັດເມືອງລະມາມເວົ້າວ່າ: ຄະນະພັກແຕ່ລະຂັ້ນໄດ້ເອົາໃຈໃສ່ປະຕິບັດ ພາລະບົດບາດ, ສິດແລະໜ້າທີ່ຂອງຕົນເຊິ່ງຜ່ານມາໄດ້ມີການເຜີຍແຜ່ເຊື່ອມຊຶມບັນດາມະຕິ, ຄຳສັ່ງໃຫ້ພະນັກງານຮັບຮູ້ຢ່າງທົ່ວເຖິງ, ເອົາໃຈໃສ່ຕິດຕາມກວດກາປະຕິບັດກົດລະບຽບຂອງພັກ, ການຄົ້ນຄ້ວາເຊື່ອມຊຶມກົດລະບຽບພັກ, ການຮ່ວມຊີວິດປະຈຳເດືອນຂອງ ແຕ່ລະໜ່ວຍພັກທົ່ວເມືອງຢ່າງປົກະຕິ, ຊຸກຍູ້ແຕ່ລະໜ່ວຍພັກເອົາໃຈໃສ່ດຳເນີນຊີວິດການເມືອງເສຍເງິນສະຕິພັກ ແລະສົ່ງບົດສະຫລຸບ ລາຍງານພາຍໃນໜ່ວຍຂອງຕົນໃຫ້ເປັນປົກະຕິໃນທຸກເດືອນ, ທົ່ວເມືອງມີທັງໝົດ 72 ໜ່ວຍພັກ, ມີໜ່ວຍພັກແຂງຮູ້ນຳພາຮອບດ້ານ 54 ໜ່ວຍ, ປະເພດກາງ 17 ໜ່ວຍ, ໜ່ວຍພັກແຂງບາງດ້ານ 1 ໜ່ວຍ, ມີສະມາຊິກພັກທັງໝົດ 1.639 ສະຫາຍ, ຍິງ 493 ສະຫາຍ, (ທຽບໃສ່ປີ2016 ເພີ່ມຂຶ້ນ 106 ສະຫາຍ),ໃນນີ້ມີສະມາຊິກແຂງ 1.332 ສະຫາຍ, ຍິງ 425 ສະຫາຍ, ສະມາຊິກພັກກາງ 283 ສະຫາຍ, ຍິງ 66 ສະຫາຍ, ອ່ອນ 24 ສະຫາຍ, ຍິງ 2 ສະຫາຍ, ໄດ້ອອກບັດ-ມອບບັດແດງໃຫ້ສະມາຊິກພັກແຂງ-ຮູ້ນຳພາຮອບດ້ານເລີ່ມແຕ່ສົກປີ 2013-2014 ມອບແລ້ວ 4 ຄັ້ງມີຈຳນວນສະມາຊິກພັກ 391 ສະຫາຍ, ຍິງ 116 ສະຫາຍ, ປີ 2016 ມອບແລ້ວຈໍານວນ 275 ສະຫາຍ,ຍິງ 36 ສະຫາຍ, ສຳລັບປີ 2017 ສະເໜີອອກບັດໃຫ້ສະມາຊິກພັກ ຍັງບໍທັນອະນຸມັດ ຈຳນວນທັງໝົດ 286 ສະຫາຍ, ຍິງ 99 ສະຫາຍ, ພ້ອມນີ້ກໍໄດ້ຕິດຕາມກວດກາການປະຕິບັດວິໃນຕໍ່ສະມາຊິກພັກທີ່ຜິດຕໍ່ກົດ ລະບຽບຂອງພັກລຶບຊື່ອອກຈາກພັກມີທັງໝົດ 3 ສະຫາຍ, ຍິງ 1 ສະຫາຍ; ວຽກງານຕິດຕາມກວດກາລັດກໍໄດ້ເອົາໃຈໃສ່ຕິດຕາມ ກວດກາ, ຊຸກຍູ້ ແລະ ປັບປຸງລະບົບບໍລິຫານລັດແຕ່ຂັ້ນເມືອງຮອດຂັ້ນຮາກຖານບ້ານ, ຕິດຕາມກວດກາການຈັດຕັ້ງປະຕິບັດບັນດາ ໂຄງການລົງທຶນຂອງລັດທີ່ມີມູນຄ່າ 5 ຕື້ລົງມາທີ່ເມືອງຄຸ້ມຄອງໃນປີ 2017 ມີທັງໝົດ 59 ໂຄງການລວມມູນຄ່າທັງໝົດ 119 ຕື້ 55 ລ້ານກວ່າກີບ. ສຳລັບທິດທາງແຜນການເຄື່ອນໄຫວໃນປີ 2018 ຫ້ອງການກວດກາລັດເມືອງຈະເປັນຫຼັກແຫຼ່ງໃນການປັບປຸງລະບົບ ອົງການຈັດຕັ້ງກວດກາຂັ້ນເມືອງຮອດຮາກຖານບ້ານຢ່າງຄົບຖ້ວນ, ເອົາໃຈໃສ່ສຶກສາອົບຮົມການເມືອງແນວຄິດເປັນກົກ ແລະ ວິຊາສະ ເພາະເປັນສຳຄັນໃຫ້ພະນັກງານກວດກາແຕ່ລະຂັ້ນໃຫ້ໜັກແໜ້ນ ແລະ ທົ່ວເຖິງເພື່ອເຮັດໃຫ້ການຈັດຕັ້ງປະຕິບັດວຽກງານກວດກາໃນ ແຕ່ລະດ້ານໃຫ້ມີຜົນສຳເລັດ.0134

ກອງປະຊຸມຄັ້ງນີ້, ກໍໄດ້ຮັບຟັງການໂລ້ລົມຂອງທ່ານ ປອ ແພງສີ ສີລາວີ ກຳມະການພັກແຂວງ ເລຂາພັກເມືອງ ເຈົ້າເມືອງ ລະມາມ ເຊິ່ງກ່ອນອື່ນທ່ານກໍ່ໄດ້ຊົມເຊີຍຕໍ່ຜົນງານທີ່ຫ້ອງການກວດກາລັດເມືອງຍາດມາໄດ້ໃນໄລຍະຜ່ານມາ ພ້ອມທັງເນັ້ນໃຫ້ຄະນະ ກວດກາລັດເມືອງຕ້ອງເອົາໃຈໃສ່ເຜີຍແຜ່ກົດໝາຍວ່າດ້ວຍພະນັກງານລັດຖະກອນ, ເຜີຍແຜ່ຄຳສັ່ງເລກທີ 15/ນຍ ລົງວັນທີ 15/5/2016 ວ່າດ້ວຍຢຸດຕິການລັກລອບຂຸດຄົ້ນ, ເຄື່ອນຍ້າຍ ແລະຊື້-ຂາຍໄມ້ຢູ່ຂັ້ນຮາກຖານບ້ານ, ເອົາໃຈໃສ່ລົງຕິດຕາມກວດກາການ ຊີ້ນຳໆພາຂອງຄະນະພັກຮາກຖານ, ຄະນະໜ່ວຍພັກທົ່ວເມືອງໃຫ້ເປັນປົກກະຕິ ນອກຈາກນີ້ແລ້ວຕ້ອງເອົາໃຈໃສ່ຈັດຕັ້ງປະຕິບັດບັນດາ ທິດທາງແຜນການເຄື່ອນໄຫວວຽກງານແຕ່ລະດ້ານປະຈຳປີ2018 ໃຫ້ມີຜົນສຳເລັດໂດຍດີ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates