ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ຄະນະພັກຮາກຖານກຸ່ມ 5 ປາກປູນປິດບັ້ນດຳເນີນຊີວິດການເມືອງປັບປຸງປົວແປງພັກ

27

#ຂ່າວ:ດາວສະຫວັນ ລາຍງານ

ຕອນບ່າຍຂອງວັນທີ 22 ທັນວາ 2017, ຄະນະພັກຮາກຖານກຸ່ມ 5 ປາກປູນໄດ້ສຳເລັດກອງປະຊຸມບັ້ນດຳເນີນຊີວິດ ປັບປຸງປົວແປງພັກ ທົ່ວໜ່ວຍພັກພາຍຫຼັງດຳເນີນເປັນເວລາ3ວັນ, ເລີ່ມແຕ່ວັນທີ 20-22 ທັນວາຜ່ານມາ.

ພິທີດັ່ງກ່າວໄດ້ຈັດຂຶ້ນທີ່ໂຮງຮຽນປະຖົມປາກປູນໂດຍພາຍໄຕ້ການເຂົ້າຮ່ວມເປັນປະທານຂອງສະຫາຍຄຳໄລ ປັນຍາຄູນ ຮອງ ເຈົ້າເມືອງລະມາມ ຄະນະຊີ້ນຳບັ້ນດຳເນີນຊີວິດການເມືອງກຸ່ມ5 ປາກປູນ,ມີສະຫາຍ ບຸນເສົາ ອໍລະມອນ ກຳມະການພັກ ເລຂາຄະນະ ພັກຮາກຖານກຸ່ມປາກປູນ ພ້ອມດ້ວຍເລຂາໜ່ວຍພັກ,ສະມາຊິກພັກມາຈາກ 7 ບ້ານເຂົ້າຮ່ວມຢ່າງພ້ອມພຽງ.28

ສະຫາຍ ບຸນເສົາ ອໍລະມອນ ເລຂາຄະນະພັກຮາກຖານກຸ່ມ 5 ປາກປູນໄດ້ຂຶ້ນຜ່ານບົດລາຍງານຜົນສຳເລັດບັ້ນດຳເນີນຊີ ວິດການເມືອງປັບປຸງປົວແປງພັກທົ່ວຄະນະພັກຮາກຖານກຸ່ມ 5 ປາກປູນ ເຊີ່ງສະມາຊິກພັກ-ພະນັກງານໄດ້ເຊື່ອມຊຶມ, ຮັບຮູ້ ແລະ ເຂົ້າໃຈເອກະສານເດັດດຽວປັບປຸງປົວແປງພັກໃຫ້ປອດໃສ, ເຂັ້ມແຂງ,ໜັກແໜ້ນ ແລະ ບົດສະຫຼຸບຕີລາຄາການຊີ້ນຳໆພາຂອງຄະນະ ພັກຮາກຖານໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງຄະນະພັກຮາກຖານໄລຍະ 3 ປີຜ່ານມາ, ແກ້ໄຂດ້ານອ່ອນ, ຂໍ້ຄົງຄ້າງ, ສິ່ງທ້າທາຍໃນໄລຍະຜ່ານມາເພື່ອເສີມຂະຫຍາຍຈຸດດີພ້ອມກັນຊອກຫາວິທີແກ້ໄຂຈຸດອ່ອນ, ຂໍ້ຄົງຄ້າງໄປພ້ອມກັບການແກ້ໄຂປະກົດ ການຫຍໍ້ທໍ້ຕ່າງໆທີ່ອາດຈະເກີດຂຶ້ນພາຍໃນພັກໃຫ້ຫຼຸດໜ້ອຍຖອຍລົງເທືອບະກ້າວ. ຈາກນັ້ນບັນດາຄະນພັກ, ສະມາຊິກພັກໄດ້ພ້ອມ ກັນປະກອບຄຳຄິດຄຳເຫັນ, ຕຳນິ, ສົ່ງຂ່າວເຊິງກັນແລະກັນເພື່ອຕີລາຄາດ້ານດີ-ດ້ານອ່ອນ, ບົດຮຽນທີ່ຖອດຖອນໄດ້ໃນສະເພາະໜ້າ ແລະຍາວນານ, ພ້ອມທັງລົງຄະແນນສ່ຽງເພື່ອຄວາມໄວ້ວາງໃຈພາຍໃນພັກ. ຜ່ານການດຳເນີນຊີວິດປັບປຸງປົວແປງພັກທົ່ວຄະນະພັກ ຮາກຖານກຸ່ມ 5 ປາກປູນແມ່ນດຳເນີນໄປດ້ວຍບັນຍາກາດຟົດຟື້ນ, ມີຄວາມເປັນເອກະພາບສູງສາມາດບັນລຸຕາມຈຸດປະສົງ ແລະເປົ້າ ໝາຍທີ່ວາງໄວ້ ເຊິ່ງເປັນໝາກຜົນລວມແຫ່ງຄວາມສາມັກຄີເປັນເອກະພາບຂອງບັນດາຄະນະພັກ, ສະມາຊິກພັກ ທຸກສະຫາຍໄດ້ເສີມ ຂະຫຍາຍລະບອບປະຊາທິປະໄຕຢ່າງກ້ວາງຂວາງ, ມີນໍ້າໃຈຮັກຊາດ ຮັກລະບອບໃໝ່ ມີຄວາມຮັບຜິດຊອບສູງຕໍ່ໜ້າທີ່ວຽກງານສາມາດ ຈັດຕັ້ງປະຕິບັດບັນດາແນວທາງ ແລະ ທິດທາງແຜນການລວມຢ່າງມີຜົນສຳເລັດຫຼາຍດ້ານ.

   ໃນຕອນທ້າຍພິທີ, ກໍ່ໄດ້ຮັບຟັງການໂອ້ລົມຈາກ ສະຫາຍຄຳໄລ ປັນຍາຄູນ ຄະນະປະຈຳພັກ ຮອງເຈົ້າເມືອງລະມາມ ເຊິ່ງກ່ອນອື່ນທ່ານກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ສຳເລັດໃນການຈັດຕັ້ງປະຕິບັດວຽກງານໄລຍະຜ່ານມາ ໂດຍສະເພາະແມ່ນບັ້ນດຳ ເນີນ ຊີວິດການເມືອງປັບປຸງປົວແປງພັກໃນຄັ້ງນີ້, ເຊີ່ງສະແດງໃຫ້ເຫັນທຸກສະຫາຍມີຄວາມເປັນເຈົ້າການໃນການຈັດຕັ້ງປະຕິບັດທຸກມະ ຕິຄຳສັ່ງຂອງຂັ້ນເທິງວາງອອກຍົກສູງສະຕິເປັນເຈົ້າກ້າເຮັດກ້າຮັບຜິດຊອບທຸກວຽກງານທີ່ໄດ້ຮັບການມອບໝາຍເປັນຢ່າງດີສາມາດບັນລຸ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates