ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ສໍາເລັດຝຶກອົບຮົມຍົກລະດັບຄຸນນະພາບການບໍລິການທ່ອງທ່ຽວ ແລະທັກສະເອົາໃຈໃສ່ລູກຄ້າທັງພາກລັດ ແລະ ພາກເອກະຊົນ

23

#ຂ່າວ: ພອນ ບຸນອຸທິດ

ຝືກອົບຮົມໃນຫົວຂໍ້ຍົກລະດັບຄຸນນະພາບການບໍລິການ,ການທ່ອງທ່ຽວ ແລະ ທັກສະການເອົາໃຈໃສ່ລູກຄ້າ ໃຫ້ແກ່ຜູ້ປະກອບ ການທຸລະກິດໂຮງແຮມ, ເຮືອນພັກແລະຮ້ານອາຫານ ທີ່ເມືອງທ່າແຕງ ແຂວງ ເຊກອງ ໄດ້ສໍາເລັດໃນວັນທີ 20 ທັນວາ 2017 ນີ້ ພາຍຫຼັງທີ່ໄດ້ດໍາເນີນມາເປັນເວລາ 3 ວັນ, ເຊິ່ງແມ່ນສະຖາບັນສື່ມວນຊົນ, ວັດທະນະທໍາ ແລະ ທ່ອງທ່ຽວ ຮ່ວມກັບພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ເຊກອງ ເປັນຜູ້ຈັດຂື້ນ ໂດຍການເປັນປະທານຂອງທ່ານ ສຸບັນ ເດສົມພອງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງເຊກອງ, ເປັນກຽດເຂົ້າຮ່ວມຂອງທ່ານ ພູວົງ ກອງຊັບ ກໍາມະການພັກເມືອງ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ, ມີນັກວິທິຍາກອນ ແລະ ສຳມະນາ ກອນຈາກພາກລັດ ແລະ ພາກທຸລະກິດອ້ອມຂ້າງເມືອງ 42 ທ່ານ, ຍິງ 17 ທ່ານເຂົ້າຮ່ວມ.

24

ທ່ານ ອຸໄທ ນິນດາສັກ ຫົວໜ້າສະຖານີ-ວິທະຍຸໂທລະພາບແຂວງ ເຊກອງກ່າວວ່າ: ການຝຶກອົບຮົມຄັ້ງນີ້ ປະກອບມີຫຼາຍ ຫົວຂໍ້ທີ່ສໍາຄັນຄື: ຄວາມຮູ້ພື້ນຖານກ່ຽວກັບການທ່ອງທ່ຽວ, ການເປັນເຈົ້າພາບທີ່ດີ ແລະ ການຕ້ອນຮັບທີ່ປະທັບໃຈ, ການຍົກລະດັບ ຄຸນນະພາບການບໍລິການ, ການເອົາໃຈໃສ່ລູກຄ້າ, ບົດບາດຂອງພະນັກງານຕ້ອນຮັບ, ບົດບາດຂອງພະນັກງານບໍລິການອາຫານ ແລະ ເຄື່ອງດື່ມ, ຈັນຍາບັນ ແລະ ມາລະຍາດການຕ້ອນຮັບແຂກຂອງຄົນລາວ, ອົງປະກອບຂອງວຽກງານການບໍລິການ-ຕ້ອນຮັບ, ສິ່ງທີ່ຄວນ ເອົາໃຈໃສ່ໃນການບໍລິການແຂກ, ການບໍລິການອາຫານ ແລະ ເຄື່ອງດື່ມແບບສາກົນ, ສິລະປະການຕົບແຕ່ງ ສະຖານທີ່ບໍລິການເຊັ່ນ: ການຈັດອາຫານ, ການຈັດດອກໄມ້, ການຫຍິບລະໄບຂອບໂຕະ ແລະ ອື່ນໆ, ບັນຍາກາດການຝຶກອົບຮົມຄັ້ງນີ້ ໄດ້ມີການແລກປ່ຽນຄໍາ ຄິດຄໍາເຫັນ ລະຫວ່າງຄູຝຶກກັບນັກວິທະຍາກອນ, ນັກສໍາມະນາກອນ ທາງດ້ານຂໍ້ມູນພາກທິດສະດີ ແລະ ພາກປະຕິບັດຕົວຈິງ, ສາມາດ ປະເມີນຄວາມເຂົ້າໃຈຕໍ່ເນື້ອໃນບົດຮຽນໄດ້ 50-80 ສວນຮ້ອຍ. ໂດຍໄດ້ສ້າງຄວາມເຂົ້າໃຈດ້ານວຽກງານການບໍລິການ, ການທ່ອງ ທ່ຽວ ແລະ ທັກສະການເອົາໃຈໃສ່ລູກຄ້າ ໃຫ້ແກ່ຜູ້ປະກອບການທຸລະກິດໂຮງແຮມ, ເຮືອນພັກແລະຮ້ານອາຫານ ເຂົ້າໃນວຽກງານ ຂະແໜງການຂອງຕົນ ໃຫ້ແກ່ພະນັກງານພາກລັດ ແລະ ພາກທຸລະກິດພາຍໃນເມືອງທ່າແຕງ ຫົວຂໍ້ທີ່ນໍາມາຝືກອົບຮົມແມ່ນທຸກຄົນ ໃຫ້ຄວາມສົນໃຈ ແລະຮັບຮູ້ເຂົ້າໃຈໃນລະດັບດີຫຼາຍທີ່ສຸດ. ຈາກນັ້ນທ່ານນາງ ດາລານີ ພົມມະວົງສາ ຮອງຫົວໜ້າສະຖາບັນສື່ມວນຊົນ, ວັດທະນະທໍາແລະທ່ອງທ່ຽວ ໄດ້ໃຫ້ກຽດມອບໃບຢັ້ງຢືນໃຫ້ແກ່ນັກສໍາມະນາກອນ.

ໂອກາດນີ້ທ່ານ ສຸບັນ ເດສົມພອງ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງເຊກອງ ໄດ້ສະ ແດງຍ້ອງຍໍຊົມເຊີຍມາຍັງສະຖາບັນສື່ມວນຊົນ, ວັດທະນະທໍາ ແລະ ທ່ອງທ່ຽວ ທີ່ໄດ້ນໍາເອົາທືນຈໍານວນໜຶ່ງ ບວກກັບຄວາມຮູ້ຄວາມ ສາມາດຫຼາຍດ້ານນໍາມາຝຶກອົບຮົມໃຫ້ນັກວິທິຍາກອນ ແລະ ສຳມະນາກອນຈາກພາກລັດ ແລະ ພາກທຸລະກິດອ້ອມຂ້າງເມືອງທ່າແຕງ. ພ້ອມຮຽກຮ້ອງໃຫ້ນັກສໍາມະນາກອນທັງໝົດ ຈົ່ງນໍາເອົາຄວາມຮູ້ໃນການຝຶກອົບຮົມຄັ້ງນີ້ ໄປໜູນໃຊ້ເຂົ້າໃນວຽກງານທີ່ຕົນຮັບຜິດຊອບ ໃຫ້ເກີດຜົນປະໂຫຍດສູງສຸດ. ທັງນີ້ ເພື່ອກະກຽມໃຫ້ແກ່ການເປີດປີທ່ອງທ່ຽວລາວ 2018 ໃຫ້ຕິດພັນກັບການບໍລິການ, ແນ່ໃສ່ດຶງ ດູດເອົາ ນັກທ່ອງທ່ຽວໃຫ້ເຂົ້າມາເມືອງ ທ່າແຕງໃຫ້ນັບມື້ນັບຫຼາຍຂຶ້ນ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates