ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ກະລຶມ ສະເຫຼີມສະຫຼອງວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍປະຈຳປີ 2017

12

(ເມືອງກະລຶມ) ໃນວັນທີ 24 ພະຈິກ 2017 ນີ້ ຢູ່ທີ່ສະໜາມກິລາ ເມືອງກະລຶມ ແຂວງເຊກອງ ໄດ້ມີງານສະເຫຼີມສະຫຼອງວັນ ສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ (ວັນທີ 25 ພະຈິກ) ໂດຍມີ ທ່ານ ຖາວອນ ພົມມະໄລລຸນ ກຳມະການປະ ຈຳພັກແຂວງ, ຮອງເຈົ້າແຂວງເຊກອງ, ພ້ອມດ້ວຍອຳນາດການປົກຄອງທຸກຂັ້ນພາຍໃນເມືອງ, ແຂກຖືກເຊີນຈາກບັນດາພະແນກການ ພາຍໃນແຂວງ, 4 ຕົວເມືອງ, ພະນັກງານລັດຖະກອນ, ພໍ່ແມ່ປະຊາຊົນ ແລະ ນ້ອງນັກຮຽນເທສະບານເມືອງກະລຶມເຂົ້າຮ່ວມຢ່າງຫຼວງ ຫຼາຍ.13

ທ່ານ ສາຍຄຳ ແກ້ວບຸນປານ ກຳມະການປະຈຳພັກເມືອງ, ຮອງເຈົ້າເມືອງກະລຶມໄດ້ຂຶ້ນເລົ່າຄືນປະຫວັດຄວາມເປັນມາຂອງວັນ ດັ່ງກ່າວວ່າ: ການໃຊ້ຄວາມຮຸນແຮງຕໍ່ແມ່ຍິງມີຫຼາຍຮູບການທີ່ພາໃຫ້ເກີດຜົນກະທົບອັນຍາວນານຕໍ່ແມ່ຍິງ ແລະ ລູກເຕົ້າຂອງເຂົາເຈົ້າຕະ ຫຼອດຮອດ ບັນຫາເຊື້ອຊາດ, ຊົນເຜົ່າ ແລະ ທົ່ວສັງຄົມ ໂດຍມີຮູບການຕ່າງໆທີ່ມັກເກີດເປັນຕົ້ນ ແມ່ນການທຸບຕີ, ກັກຂັງທໍລະມານ, ດູ ໝິ່ນກຽດສັກສີ, ປ້ອຍດ່າ, ເມີນເສີຍ, ການຂົ່ມຂືນກະທຳຊຳເລົາ, ການລວນລາມລວງລະເມີດທາງເພດ ແລະ ປະຕິເສດບໍ່ໃຫ້ແມ່ຍິງມີ ສ່ວນຮ່ວມໃນການຄຸ້ມຄອງການເງິນ ແລະ ບໍໃຫ້ເຂົ້າເຖິງຂໍ້ມູນ-ຂ່າວສານກ່ຽວກັບແຫຼ່ງທຶນ, ມູນມໍລະດົກ ໃນນັ້ນແມ່ຍິງທີ່ເປັນກຸ່ມສ່ຽງ ກົ່ວໝູ່ ແມ່ນແມ່ຍິງທຸກຍາກ, ແມ່ຍິງຊົນນະບົດ, ຊົນເຜົ່າ, ຜູ້ລີ້ໄພ, ແຮງງານເຄື່ອນຍ້າຍ, ແມ່ຍິງທີ່ຖືກກັກຂັງ, ເດັກຍິງ, ແມ່ຍິງສູງອາຍຸ ແລະ ແມ່ຍິງພິການ ເຊີ່ງຄວາມຮຸນແຮງດັງກ່າວໄດ້ກາຍເປັນປະເດັນໜຶ່ງຢູ່ເວທີສາກົນທີ່ຖືກຍົກຂື້ນຢ່າງແຂງແຮງໃນຂະບວນການເຄື່ອນ ໄຫວເພື່ອສິດທິຂອງແມ່ຍິງໃນໂລກນັບແຕ່ປີ 1967, ຮອດປີ 1995 ກອງປະຊຸມໂລກຄັ້ງທີ 4 ກ່ຽວກັບແມ່ຍິງໄດ້ຮັບຮອງເອົາຢ່າງເປັນ ທາງການ ແລະ ຖະແຫຼງການຢັ້ງຢືນວ່າ ຄວາມຮຸນແຮງຕໍ່ແມ່ຍິງເປັນການລ່ວງລະເມີດສິດທິມະນຸດ ແລະ ເປັນອຸປະສັກທີ່ກີດຂວາງບໍ່ ໃຫ້ແມ່ຍິງໄດ້ຊົມໃຊ້ສິດທິມະນຸດຂອງຕົນຢ່າງເຕັມສ່ວນ ຜ່ານການທົບທວນ 5 ປີຂອງການຈັດຕັ້ງປະຕິບັດງານປັກກິ່ງໃນປີ 2000 ຈຶ່ງ ໄດ້ຮຽກຮ້ອງໃຫ້ລັດຖະບານປະເທດຕ່າງໆ ໃຊ້ມາດຕະການຢ່າງເໝາະສົມ ເພື່ອລຶບລ້າງການຈຳແນກ ແລະ ຄວາມຮຸນແຮງຕໍ່ແມ່ຍິງ ໂດຍຖືເອົາທຸກການກະທຳຄວາມຮຸນແຮງຕໍ່ແມ່ຍິງ ແລະ ເດັກຍິງເປັນຄວາມຜິດທາງອາຍາ.14

ພ້ອມດຽວກັນນີ້ ທ່ານ ບຸນໄຫຼ ບຸດຕະວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງກະລຶມ ກໍໄດ້ຂຶ້ນເຜີຍແຜ່ ເນື້ອໃນເອກະສານຂອງທ່ານປະທານຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ວ່າດ້ວຍລະນຶກເຖິງ ວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ ໃຫ້ຮູ້ວ່າ: ລັດຖະບານ ແຫ່ງ ສປປລາວ ຍາມໃດກໍໃຫ້ຄວາມເປັນຫ່ວງເປັນໄຍທຸ້ມເທ ທາງດ້ານທຶນຮອນ, ດ້ານນະໂຍບາຍ, ຍຸດທະສາດ, ນິຕິກຳ, ສ້າງກົນໄກຂອງຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ແຕ່ລະດັບຊາດ, ລະດັບກະຊວງ, ອົງການ, ແຂວງ, ເມືອງ, ບ້ານຢ່າງທົ່ວເຖິງ ພ້ອມທັງສ້າງກົດໝາຍວ່າດ້ວຍການພັດທະນາ, ການປົກປ້ອງແມ່ຍິງ, ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເພື່ອສົ່ງເສີມການພັດທະ ນາຄວາມສະເໝີພາບຍິງ-ຊາຍ ແລະ ລຶບລ້າງສິ່ງຫຍໍ້ທໍ້ອື່ນໆໃນສັງຄົມລາວໃຫ້ໝົດໄປປເທື່ອລະກ້າວ.15

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates