ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ໜ່ວຍຊາວໝຸ່ມຮາກຖານພະແນກຍຸຕິທຳຮັບຮອງ ເປັນຕົວແບບ 4 ບຸກ

0014

    ເມື່ອວັນທີ 2 ສິງຫາ 2017 ນີ້ ແຂວງເຊກອງໄດ້ຈັດພິທີຮັບຮອງເອົາຊາວໜຸ່ມຮາກຖານ ພະແນກ ຍຸຕິທຳແຂວງເປັນຕົວແບບ 4 ບຸກຄັ້ງທີ II ປະຈຳປີ 2017 ໂດຍການເຂົ້າຮ່ວມຂອງທ່ານ ແຜນວັນທອງ ຈະເລີນເພັດ ຮອງເລຂາຄະນະບໍລິຫານງານຊາວໝຸ່ມແຂວງ, ທ່ານ ຄຳບາງ ພະສະແຫວງ ເລຂາໜ່ວຍພັກ, ຫົວໜ້າພະແນກຍຸຕິທຳແຂວງ, ມີແຂກຖືກເຊີນຈາກຂະແໜງການກ່ຽວຂ້ອງ ແລະ ສະມາຊິກເຂົ້າຮ່ວມ.

    ໃນພິທີດັ່ງກ່າວ ທ່ານ ນາງ ເທວັນ ແສງສະຫວ່າງ ເລຂາຄະນະບໍລິຫານງານຊາວໝຸ່ມຮາກຖານ, ພະແນກ ຍຸຕິທຳແຂວງ ໄດ້ກ່າວວ່າ: ຮາກຖານຊາວໝຸ່ມພະແນກຍຸຕິທຳແຂວງມີສອງໜ່ວຍຂຶ້ນກັບ, ມີສະມາຊິກທັງໝົດ 27 ສະຫາຍ, ຍິງ 13 ສະຫາຍ ຊຶ່ງໃນໄລຍະຜ່ານມາ ຄະນະບໍລິຫານງານຮາກຖານ ແລະ ຄະນະໜ່ວຍ ກໍຄືສະມາຊິກໄດ້ພ້ອມກັນຄົ້ນຄວ້າ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ VII ຂອງຜູ້ແທນຊາວໝຸ່ມ ທົ່ວປະເທດ, ມະຕິ V ຂອງຄະນະບໍລິຫານງານຊາວໝຸ່ມແຂວງ ແລະ ແຜນພັດທະນາເສດຖະກິດ-ສັງຄົມ ຂອງລັດ ໂດຍຖືເອົາເນື້ອໃນຈິດໃຈ 4 ບຸກທະລຸຂອງພັກຕິດພັນກັບຂໍ້ແຂ່ງຂັນ 4 ບຸກຂອງສູນກາງຊາວໝຸ່ມ ແລະ ເນື້ອໃນ 6 ຮັກ 3 ຊັງຂອງເຍົາວະຊົນທັນວາ ໂດຍຜ່ານການຈັດຕັ້ງປະຕິບັດຕົວຈິງໃນແຕ່ລະດ້ານຄື: ດ້ານການເມືອງແນວຄິດ, ດ້ານການຝຶກຝົນຫຼໍ່ຫຼອມຮໍ່າຮຽນ, ດ້ານວຽກງານການຈັດຕັ້ງ ແລະ ດ້ານວິຊາຊີບ ສ້າງວຽກເຮັດງານທຳສາມາດປະຕິບັດໄດ້ 95% ຈັດປະເພດຂອງສະມາຊິກຕາມມາດຖານ ແລະ ເງື່ອນໄຂຂອງ ສູນກາງຊາວໝຸ່ມ ປປລ ກໍຄືຄະນະບໍລິຫານງານຊາວໝຸ່ມແຂວງວາງອອກ.

     ແນວໃດກໍດີ ເພື່ອສືບຕໍ່ຮັກສາມູນເຊື້ອ ແລະ ນາມມະຍົດໜ່ວຍຕົວແບບ 4 ບຸກໃນປີຕໍ່ໄປນີ້ ທ່ານ ນາງ ເທວັນ ແສງສະຫວ່າງ ກ່າວວ່າ: ຄະນະບໍລິຫານງານຮາກຖານ, ຄະນະໜ່ວຍ ແລະ ສະມາຊິກຈະໄດ້ ພ້ອມກັນສຸມໃສ່ບາງວຽກທີ່ສຳຄັນ ໂດຍສະເພາະແມ່ນວຽກສຶກສາອົບຮົມການເມືອງ-ນຳພາແນວຄິດ, ແບບ ແຜນວິທີນຳພາ-ວິທີເຮັດວຽກ ແລະ ວຽກງານພັດທະນາຊີວິດການເປັນຢູ່ຂອງສະມາຊິກ ທັງນີ້ ກໍເພື່ອປັບປຸງ ການຈັດຕັ້ງໃຫ້ເຕີບໃຫຍ່ເຂັ້ມແຂງ, ສະມາຊິກມີຄວາມສາມັກຄີ, ມີຄຸນສົມບັດສິນທຳປະຕິວັດ, ມີຄວາມຮູ້ ຄວາມສາມາດ ປະກອບສ່ວນເຂົ້າໃນການປະຕິບັດແນວທາງການເມືອງຂອງພັກ, ລັດ ໂດຍສະເພາະການພັດ ທະນາເສດຖະກິດ-ສັງຄົມໃຫ້ບັນລຸຕາມຄາດໝາຍທີ່ກຳນົດໄວ້.

    ພ້ອມດຽວກັນນັ້ນ ທ່ານ ອິດທິພົນ ຈະເລີນສຸກ ຫົວໜ້າຂະແໜງຂະບວນການຊາວໝຸ່ມແຂວງ ກໍໄດ້ຂຶ້ນ ຜ່ານຂໍ້ຕົກລົງຂອງຄະນະບໍລິຫານງານຊາວໝຸ່ມແຂວງສະບັບເລກທີ 589 ລົງວັນທີ 20 ກໍລະກົດ 2017 ວ່າດ້ວຍການຮັບຮອງເອົາຄະນະບໍລິຫານງານຊາວໝຸ່ມຮາກຖານພະແນກຍຸຕິທຳແຂວງເປັນໜ່ວຍຕົວແບບ 4 ບຸກ. ຫຼັງຈາກນັ້ນ ທ່ານ ແຜນວັນທອງ ຈະເລີນເພັດ ຮອງເລຂາຄະນະບໍລິຫານງານຊາວໝຸ່ມແຂວງເຊກອງ ກໍໄດ້ໃຫ້ກຽດຂຶ້ນມອບໃບຢັ້ງຢືນ ແລະ ມີຄຳເຫັນໂອ້ລົມໜ່ວຍຊາວໜຸ່ມຮາກຖານພະແນກຍຸຕິທຳແຂວງ ຕື່ມອີກ.

( ຂ່າວ-ພາບ : ສັນຍາ ແກ້ວໄຊຍະວົງ )

0015 0016 0017

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates