ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງ ເລັ່ງຮັບມືກັບກໍລະນີຜູ້ຕິດ ເຊື້ອໂຄວິດຢ່າງຮີບດ່ວນ

174

      ກອງປະຊຸມປຶກສາຫາລື ເພື່ອລະດົມແນວຄວາມຄິດ ແລະກຽມຄວາມພ້ອມດ້ານບຸກຄະລາກອນ-ອຸປະກອນການແພດ, ມາດຕະການຄຸ້ມຄອງ ແລະປິ່ນປົວກໍລະນີຜູ້ຕິດເຊື້ອພະຍາດໂຄວິດ-19

ໄດ້ໄຂຂຶ້ນໃນວັນທີ 13 ສິງຫາ 2021 ທີ່ສະໂມສອນຫ້ອງວ່າການແຂວງ ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ; ພ້ອມນີ້ ກໍມີຮອງເລຂາພັກແຂວງ, ຄະນະປະຈໍາພັກແຂວງ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ແລະຂະແໜງການກ່ຽວຂ້ອງເຂົ້າຮ່ວມ.

175

            ໃນກອງປະຊຸມ ທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ປະທານຄະນະສະເພາະກິດຂັ້ນແຂວງ ໄດ້ລາຍງານສະພາບການແຜ່ລະບາດ, ການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ຢູ່ແຂວງເຊກອງໃນໄລຍະຜ່ານມາ, ຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດຕົວຈິງ ແລະປຶກສາຫາລືແຜນຮັບມືໃນຕໍ່ໜ້າ ໂດຍສະເພາະແມ່ນອັນທີ່ຈໍາເປັນ ແລະຮີບດ່ວນທີ່ສຸດ ແມ່ນຊອກຫາຜູ້ສໍາຜັດໃກ້ຊິດກັບກໍລະນີຜູ້ຕິດເຊື້ອທີ 1 ແລະທີ 2 ຂອງແຂວງ ເພື່ອນໍາມາກັກບໍລິເວນ ແລະກວດຫາເຊື້ອພະຍາດໂຄວິດ-19 ເພື່ອບໍ່ໃຫ້ມີການລະບາດເປັນວົງກວ້າງຢູ່ໃນສັງຄົມ, ພ້ອມນັ້ນ ກໍໄດ້ກໍານົດວິທີການ ແລະມາດຕະການປະຕິບັດຕ່າງໆ ເຮັດໃຫ້ການຈັດຕັ້ງປະຕິບັດວຽກງານປ້ອງກັນ, ຄວບຄຸມ, ແກ້ໄຂການລະບາດ, ການຄຸ້ມຄອງ ແລະການປິ່ນປົວກໍລະນີຜູ້ຕິດເຊື້ອພະຍາດດັ່ງກ່າວ ມີຄວາມໂລ່ງລ່ຽນ, ວ່ອງໄວທັນສະພາບການ, ມີປະສິດທິພາບ ແລະປະສິດທິຜົນສູງ.

            ຫຼັງຈາກນັ້ນ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ສະຫຼຸບສັງລວມເນື້ອໃນກອງປະຊຸມ, ພ້ອມທັງມີຄໍາເຫັນເນັ້ນໜັກໃຫ້ຄະນະສະເພາະກິດປັບປຸງແບບແຜນວິທີເຮັດວຽກ, ກົນໄກການປະສານງານ ແລະລະບົບປະຈໍາການ ຕິດພັນກັບການປະຕິບັດໜ້າທີ່ວຽກງານຂອງຕົນໃຫ້ສູງຂຶ້ນ, ເອົາໃຈໃສ່ໂຄສະນາໃຫ້ຄວາມຮູ້ແກ່ປະຊາຊົນກ່ຽວກັບພະ ຍາດໂຄວິດ-19 ແລະການປ້ອງກັນຕົນເອງ ເພື່ອບໍ່ໃຫ້ຕິດເຊື້ອພະຍາດດັ່ງກ່າວ. ສໍາລັບແຜນຮັບມື ແລະການປິ່ນປົວກໍລະ ນີຜູ້ຕິດເຊື້ອພະຍາດໂຄວິດ-19 ທີ່ກັບມາຈາກການໄປຮ່ວມກອງປະຊຸມຝຶກອົບຮົມຢູ່ແຂວງສະຫວັນນະເຂດໃນລະ ຫວ່າງວັນທີ 2-6 ສິງຫາຜ່ານມາ ແມ່ນໃຫ້ເອົາໃຈໃສ່ມາດຕະການສະເພາະໜ້າທີ່ເລັ່ງດ່ວນ ໂດຍສະເພາະການກະກຽມດ້ານບຸກຄະລາກອນ, ອຸປະກອນການແພດ ແລະກະກຽມສູນຈໍາກັດບໍລິເວນ, ໂຮງໝໍພາກສະໝາມ ເພື່ອຮອງຮັບຫາກມີກໍລະນີຜູ້ຕິດເຊື້ອເພີ່ມຂຶ້ນ, ພ້ອມທັງປຸກລະດົມປະຊາຊົນຜູ້ທີ່ມີອາຍຸ 18 ປີຂຶ້ນໄປ ກໍຄືກຸ່ມເປົ້າໝາຍໃຫ້ເຂົ້າມາຮັບການສັກວັກຊິນປ້ອງກັນໂຄວິດ-19 ໃຫ້ໄດ້ຕາມແຜນທີ່ວາງໄວ້.

------------------------------

(ຂ່າວ-ພາບ: ແກ້ວໄຊຍະວົງ)

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates