ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ພະແນກສຶກສາ ສ້າງແຜນກໍານົດພະນັກງານນໍາພາ-ຄຸ້ມຄອງ

DSC02606

   ໃນວັນທີ 9 ສິງຫາ 2021 ນີ້ ພະແນກສຶກສາທິການ ແລະກິລາ (ສສກ) ແຂວງເຊກອງ ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງ ຂຶ້ນ ໂດຍການເຂົ້າຮ່ວມຂອງທ່ານ ນາງ ຈັນຫອມ ມະຫາໄຊ ຮອງເລຂາພັກແຂວງ, 

DSC02610

 

    ມີທ່ານ ປອ ຕຸດາວັນ ໜໍ່ເມືອງເສດ ຄະນະພັກກະຊວງ, ຮອງຫົວໜ້າກົມຈັດຕັ້ງ ແລະພະນັກງານ ກະຊວງສຶກສາທິການ ແລະກິລາ, ມີຄະນະຊີ້ນໍາຂັ້ນແຂວງ, ພ້ອມດ້ວຍຄະນະພັກ-ຄະນະພະແນກ, ສະມາຊິກພັກຈາກ 6 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກ ສສກ ແລະພະນັກງານ-ລັດຖະກອນພາຍໃນພະແນກເຂົ້າຮ່ວມ; ຊຶ່ງກອງປະຊຸມດັ່ງກ່າວແມ່ນຈະໄດ້ດໍາເນີນເປັນເວລາ 4 ວັນ ( 9-12 ສິງຫາ ຈຶ່ງຈະສໍາເລັດ).

     ໃນກອງປະຊຸມທ່ານ ນາງ ວັນເພັງ ທອງສີ ຮອງຫົວໜ້າພະແນກ ສສກ ແຂວງ ໄດ້ລາຍງານການຈັດຕັ້ງປະຕິບັດແຜນກໍານົດພະນັກງານນໍາພາ-ຄຸ້ມຄອງ ໃນໄລຍະ 5 ປີ (2016-2020) ໂດຍຕີລາຄາດ້ານດີ, ດ້ານອ່ອນ ແລະຂໍ້ຄົງຄ້າງ ເພື່ອຮັບປະກັນໃຫ້ແກ່ວຽກງານຄຸ້ມຄອງພະນັກງານເຂົ້າສູ່ລະບອບ ລະບຽບ, ເປັນເຈົ້າການຕອບສະໜອງໜ້າທີ່ການເມືອງໃນສະເພາະໜ້າ ແລະຍາວນານ, ມີລັກສະນະວິທະຍາສາດ ແລະຮັບປະກັນດ້ານຫຼັກການໃນການຄຸ້ມຄອງພະນັກງານໃຫ້ເປັນລະບົບຄົບຊຸດໃນຂະແໜງສຶກສາໃນໄລຍະຊຸມປີຜ່ານມາ ເພື່ອເປັນບົດຮຽນທີ່ດີໃຫ້ແກ່ການສ້າງຄວາມເປັນເອກະພາບໃນການກໍານົດສ້າງພະນັກງານນໍາພາ-ຄຸ້ມຄອງ, ພະນັກງານສືບທອດປ່ຽນແທນໃນ 5 ປີຕໍ່ໜ້າ (2021-2025).

   ຈາກນັ້ນ ຄະນະຮັບຜິດຊອບຂັ້ນແຂວງ ໄດ້ຜ່ານຄໍສັ່ງແນະນໍາ ຂອງຄະນະປະຈໍາພັກແຂວງ ວ່າດ້ວຍການສ້າງແຜນກໍານົດພະນັກງານນໍາພາ-ຄຸ້ມຄອງຂັ້ນແຂວງ, ແຈ້ງການແນະນໍາ ຂອງຄະນະຈັດຕັ້ງແຂວງ ສ່າດ້ວຍການຈັດຕັ້ງປະຕິບັດວຽກງານການສ້າງແຜນກໍານົດພະນັກງານນໍາພາ-ຄຸ້ມຄອງໄລຍະ 5 ປີ (2021-2025), ດໍາລັດ ວ່າດ້ວຍມາດຕະຖານຕໍາແໜ້ງບໍລິຫານຂອງພະນັກງານ ແລະຜ່ານມະຕິກົມການເມືອງສູນກາງພັກ ວ່າດ້ວຍມາດຖະຖານຂອງພະນັກງານການນໍາ.

     ໂອກາດນີ ທ່ານ ນາງຈັນຫອມ ມະຫາໄຊ ໄດ້ມີຄໍາເຫັນຊີ້ນໍາ ໃຫ້ທຸກຄົນມີຄວາມຮັບຜິດຊອບສູງໃນການເລືອກເຟັ້ນເອົາພະນັກງານທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີທັດສະນະຫຼັກໝັ້ນ, ເບິ່ງກວ້າງເຫັນໄກ, ມີແບບແຜນການນໍາພາ-ຊີ້ນໍາທີ່ດີ ແລະມີຄວາມຮູ້ຄວາມສາມາດ ເພື່ອກໍານົດສ້າງເຂົ້າໃນຕໍາແໜ່ງງານສໍາຄັນຕ່າງໆ ທີ່ເໝາະສົມ ທີ່ສາມາດສ້າງເປັນພະນັກງານສືບທອດ ໃຫ້ໄດ້ຕາມຫຼັກການນໍາພາຂອງພັກຢ່າງແທ້ຈິງ; ຫຼັງຈາກນັ້ນ ກໍໄດ້ດໍາເນີນການປ່ອນບັດລົງຄະແນນທາບທາມຢ່າງເປັນທາງການ.

                                                     ຂ່າວ-ພາບ:ພຸດທະສອນ   

 

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates