ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງ ມອບ-ຮັບ ໂຄງການກໍ່ສ້າງສູນການຄ້າ

1Y3A2222

  ພິທີ ມອບ-ຮັບ (ຖາວອນ) ໂຄງການກໍ່ສ້າງສູນການຄ້າ ແຂວງເຊກອງ ລະຫວ່າງ ບໍລິສັດ ສອນກໍ່ສ້າງ ແລະສອມແປງເຄຫາສະຖານ ຈໍາກັດຜູ້ດຽວ ແລະ ພະແນກອຸດສາຫະກຳ ແລະການຄ້າແຂວງ ໄດ້ຈັດຂຶ້ນໃນຕອນບ່າຍວັນທີ 4 ສິງຫາ 2021 ນີ້ 

 

3c836eec-a385-4ee7-9866-9f710edbb9d8

     ທີ່ສູນການຄ້າແຂວງເຊກອງ ໂດຍການເຂົ້າຮ່ວມມີທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ມີທ່ານ ດາວວີ ສວຍທະລັງສີ ຫົວໜ້າພະແນກອຸດສາຫະກຳ ແລະການຄ້າແຂວງ, ມີຮອງເຈົ້າເມືອງລະມາມ, ບັນດາທ່ານຄະນະອໍານວຍການບໍລິສັດ, ຄະນະກຳມະການຈາກສູນກາງ ແລະຂັ້ນແຂວງ ພ້ອມດ້ວຍພະນັກງານຂະແໜງການທີ່ກ່ຽວຂ້ອງທັງສອງພາກສ່ວນເຂົ້າຮ່ວມ.

    ທ່ານ ອຸດົມ ສີຈັນທາ ຮອງອຳນວຍກາຍບໍລິສັດ ສອນກໍ່ສ້າງ ແລະສ້ອມແປງເຄຫາສະຖານ ຈໍາກັດຜູ້ດຽວ ໄດ້ລາຍງານໂດຍຫຍໍ້ກ່ຽວກັບສະພາບການຈັດຕັ້ງປະຕິບັດໂຄງການກໍ່ສ້າງສູນການຄ້າ ແລະໄລຍະຄໍ້າປະກັນໂຄງການ (1 ປີ) ວ່າ: ໂຄງການກໍ່ສ້າງສູນການຄ້າແຂວງເຊກອງ ຕັ້ງຢູ່ເທສະບານຂອງແຂວງ, ໄດ້ຮັບທຶນສະໜັບສະໜູນການກໍ່ສ້າງຈາກກະຊວງອຸດສາຫະກຳ ແລະການຄ້າ ເຊິ່ງມີມູນຄ່າການກໍ່ສ້າງທັງໝົດ 93,54 ຕື້ກີບ, ເປັນອາຄານ 4 ຊັ້ນ, ມີຂະໜາດ 57,60 ແມັດx36,00ແມັດ, ມຸງດ້ວຍແຜ່ນມຸງຫຼັງຄາ VXP, ເຊິ່ງມີໄລຍະປະຕິບັດໂຄງການຕາມສັນຍາເບື້ອງຕົ້ນ 48 ເດືອນ ( ປີ 2014-2017 ), ແຕ່ການປະຕິບັດຕົວຈິງແມ່ນພົບຂໍ້ຫຍຸ້ງຍາກ ອັນເນື່ອງມາຈາກຫຼາຍປັດໃຈ ຫຼາຍສາຍເຫດ ເປັນຕົ້ນດ້ານສະໜອງງົບປະມານ, ການນໍາເຂົ້າວັດສະດຸ ກໍ່ສ້າງຈາກຕ່າງປະເທດຈໍານວນໜຶ່ງແມ່ນຕ້ອງໄດ້ຖອກເງິນສົດ, ຈິ່ງເຮັດໃຫ້ການນໍາເຂົ້າວັດສະດຸມີຄວາມຫຼ້າຊ້າ, ບໍ່ໄປຕາມແຜນທີ່ທາງບໍລິສັດຮັບເໝົາ ແລະບໍລິສັດທີ່ປຶກສາໄດ້ວາງໄວ້, ແຕ່ເຖິງຢ່າງໃດກໍດີ ທາງບໍລິສັດຜູ້ຮັບເໝົາ ກໍໄດ້ເຮັດທຸກວິທີທາງເພື່ອຊອກ ແລະຈັດຫາແຫຼ່ງທຶນ ເພື່ອມາສຸມໃສ່ໜ້າວຽກໃນການປະຕິບັດໂຄງການກໍ່ສ້າງໃຫ້ສາມາດສໍາເລັດຕາມແຜນການ, ຈາກສະພາບດັ່ງກ່າວຈຶ່ງໄດ້ເພີ່ມເວລາການກໍ່ສ້າງຕື່ມອີກ 24 ເດືອນ, ທາງບໍລິສັດຮັບເໝົາກໍ່ສ້າງຂອງພວກເຮົາກໍໄດ້ຈັດຕັ້ງປະຕິບັດບັນດາໜ້າວຽກຂອງໂຄງການສໍາເລັດ 100% ໃນປີ 2019, ເຊິ່ງມີບັນດາໜ້າວຽກໃຫຍ່ຄື: 1. ວຽກໂຄງສ້າງອາຄານ, 2. ວຽກສະຖາປັດອາຄານ, 3. ເທເບຕົງເດີ່ນຈອດລົດ, 4. ວຽກສະຖາປັດພາຍນອກອາຄານ, 5.ວຽກລະບົບນໍ້າໃຊ້ ແລະນໍ້າເສຍ ພ້ອມອ່າງເກັບນໍ້າໃຕ້ດິນ, 6.ວຽກລະບົບກົນຈັກ, ລະບົບໄຟຟ້າ ແລະລະບົບສື່ສານ; ສໍາລັບຊ່ວງໄລຍະຄໍ້າປະກັນ ໄລຍະ 1 ປີ (ເລີ່ມແຕ່ວັນທີ 17 ມີນາ 2020 ຫາ 17 ມີນາ 2021) ບໍລິສັດ ໄດ້ເອົາໃຈໃສ່ຕິດຕາມຄວາມປອດໄພ ມີເວນຍາມ 24 ຊົ່ວໂມງ, ມີການກວດເຊັກລະບົບໄຟຟ້າ, ແອ, ລະບົບລິບ ແລະຂັ້ນໃດເລື່ອນ ຢ່າງເປັນປະຈໍາ ແລະເຫັນວ່າທຸກຢ່າງທໍາງານປົກກະຕິດີ.

      ຈາກນັ້ນ ໄດ້ມີພິທີເຊັນບົດບັນທຶກ ມອບ-ຮັບ (ຖາວອນ) ລະຫວ່າງ ບໍລິສັດ ສອນກໍ່ສ້າງ ແລະສອມແປງເຄຫາສະຖານ ຈໍາກັດຜູ້ດຽວ ແລະ ພະແນກອຸດສາຫະກຳ ແລະການຄ້າແຂວງ ຢ່າງເປັນທາງການ ໂດຍມີບັນດາຂະແໜງການທັງສອງຝ່າຍເຂົ້າຮ່ວມເປັນສັກຂີພິຍານ.

      ໂອກາດນີ້ ທ່ານ ຂັນຕີ ສີລະວົງສາ ໄດ້ຮຽກຮ້ອງໃຫ້ທຸກພາກສ່ວນເລັ່ງດຶງດູດເອົາແມ່ຄ້າຊາວຂາຍ, ນັກລົງທຶນ ທັງພາຍໃນ ແລະຕ່າງປະເທດເຂົ້າມາຈັບຈ່ອງຊື້-ຂາຍ ຢ່າງກວ້າງຂວາງ ເພື່ອໃຫ້ກາຍເປັນບ່ອນຮອງຮັບການບໍລິການ ຊື້-ຂາຍຢ່າງເປັນຂະບວນຟົດຟື້ນ ເພື່ອສົ່ງເສີມ ແລະດຶງດູດການລົງທຶນຈາກພາຍໃນ ແລະຕ່າງປະເທດເຂົ້າໃນວຽກງານການຄ້າ-ການບໍລິການ ໂດຍອີງໃສ່ທ່າແຮງຂອງແຂວງ ທີ່ເປັນທາງຜ່ານ ມີດ່ານສາກົນອອກສູ່ ສສ ຫວຽດນາມ ແລະທັງເປັນການປະກອບສ່ວນໃນການພັດທະນາເສດຖະກິດ-ສັງຄົມຂອງແຂວງຕື່ມອີກ.

          ຂ່າວ:ພຸດທະສອນ

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates