ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງສຸມໃສ່ແກ້ໄຂຄວາມທຸກຍາກ ໃຫ້ຫຼຸດລົງເທື່ອລະກ້າວ

81

ຂ່າວ: ພຸດທະສອນ

 ວັນທີ 11 ທັນວາ 2019 ທີ່ຫ້ອງປະຊຸມພະແນກ ກະສິກຳ ແລະ ປ່າໄມ້ແຂວງ ກຳມະບານຮາກຖານ ພັດທະນາຊົນນະບົດ ແລະສະຫະກອນໄດ້ໄຂກອງ ປະຊຸມໃຫຍ່ຄັ້ງທີ I ຂອງຕົນຂຶ້ນ  ແລະ ສໍາເລັດລົງ ໃນວັນດຽວກັນ  ໂດຍການເຂົ້າຮ່ວມຂອງທ່ານ ຄໍາ ຫວາງ ຈັນທະວົງ   ຄະນະບໍລິຫານງານສະຫະພັນ ກຳມະບານແຂວງ, ຮອງປະທານສະຫະພັນ ກຳມະ ບານພະແນກກະສິກຳ ແລະ ປ່າໄມ້ແຂວງ, ມີທ່ານ ຄໍາແດງ ໄຊຍະສິງ ປະທານກວດກາຫນ່ວຍພັກພັດ ທະນາຊົນນະບົດ ແລະ ສະຫະກອນ, ມີຄະນະປະ ທານກຳມະບານຮາກຖານດັ່ງກ່າວ,ພ້ອມດ້ວຍແຂກ ຖືກເຊີນ ແລະສະມາຊິກກຳມະບານເຂົ້າຮ່ວມ.

82

ທ່ານ ນ. ສໍາລານ ອິນທະວົງສອນ ປະທານກຳມະບານຮາກຖານພັດທະນາຊົນນະບົດ ແລະສະຫະກອນ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານກຳມະບານໃນໄລຍະ 5 ປີຜ່ານມາ ( 2015-2019 ) ແລະ ທິດທາງແຜນການຈັດຕັ້ງປະຕິບັດວຽກງານກຳມະບານໃນ 5 ປີຕໍ່ໜ້າ ( 2020-2024 ), ຊຶ່ງໃຫ້ຮູ້ວ່າ ພາຍໃນກຳມະບານຮາກຖານຂອງຕົນ ມີສະມາຊິກທັງຫມົດ 20 ສະຫາຍ, ຍິງ 7 ສະຫາຍ, ໄລຍະ 5 ປີຜ່ານມາ ໄດ້ເອົາໃຈໃສ່ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ, ເປັນເຈົ້າການຈັດຕັ້ງປະຕິບັດວຽກງານວິຊາສະເພາະຂອງຕົນ ຕິດພັນກັບການສ້າງຂະບວນການຮັກຊາດ ແລະພັດທະນາ ດ້ວຍການຜັນຂະຫຍາຍບັນດາມະຕິຕ່າງໆຂອງພັກ, ແຜນພັດທະນາເສດຖະກິດ-ສັງຄົມຂອງລັດ,ແຜນການເຄື່ອນໄຫວວຽກງານພັດທະນາຊົນນະບົດແລະລຶບລ້າງຄວາມທຸກຍາກ ປະຈຳແຕ່ລະປີເຂົ້າໃນວຽກງານຕົວຈິງຂອງຂະແໜງການຕົນ ໂດຍໄດ້ສຸມໃສ່ການກໍ່ສ້າງ ແລະຂະຫຍາຍພື້ນຖານໂຄງລ່າງໄປສູ່ເຂດຊົນນະບົດຫ່າງໄກສອກຫຼີກໃຫ້ທົ່ວເຖິງ ເພື່ອປັບປຸງ, ກໍ່ສ້າງ, ສ້ອມແປງ ແລະຂະຫຍາຍໂຄງລ່າງພື້ນຖານສາທາລະນະ, ຈັດສັນເຕົ້າໂຮມບ້ານນ້ອຍເຂົ້າເປັນບ້ານໃຫຍ່ ແລະຈັດສັນພູມລຳເນົາຄົງທີ່, ທຳມາຫາກິນຖາວອນ, ອາຊີບທີ່ໝັ້ນທ່ຽງໃຫ້ແກ່ປະຊາຊົນ, ສ້າງເງື່ອນໄຂແລະສົ່ງເສີມການຜະລິດເປັນສິນຄ້າ ສ້າງລາຍໄດ້ໃຫ້ແກ່ຄອບຄົວ ເພື່ອປັບປຸງແລະຍົກລະດັບຊີວິດການເປັນຢູ່ໃຫ້ດີຂື້ນ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ ຊຶ່ງໃນທົ່ວແຂວງ ມີ 197 ບ້ານ, 4 ເມືອງ, 24.713 ຄອບຄົວ, ທຽບໃສ່ປີ 2015 ເພີ່ມຂຶ້ນ 4.590 ຄອບຄົວ,

84

ປະຈຸບັນມີບ້ານທຸກຍາກ 51 ບ້ານ, ເທົ່າກັບ 25,89%ຂອງບ້ານທັງໝັດ, ທຽບໃສ່ປີ 2015 ຫຼຸດລົງ 10 ບ້ານ, ຄອບຄົວທຸກຍາກ 2.077 ຄອບຄົວ ເທົ່າກັບ 8,4%ຂອງຄອບຄົວທັງໝັດ, ທຽບໃສ່ປີ 2015 ຫຼຸດລົງ 335 ຄອບຄົວ, ບ້ານພັດທະນາ ມີ 66 ບ້ານ ເທົ່າກັບ 33,50% ທຽບໃສ່ປີ 2015 ເພີ່ມຂຶ້ນ 10 ບ້ານ, ຄອບຄົວພັດທະນາ ມີ 14.816 ຄອບຄົວ, ເທົ່າກັບ 59,95%.

ຜ່ານການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຕິດພັນກັບວຽກງານວິຊາສະເພາະ ສາມາດຍາດໄດ້ກົມກອງດີເດັ່ນ ຊຶ່ງໄດ້ຮັບໃບຍ້ອງຍໍຈາກປະທານສະຫະພັນກຳມະບານແຂວງ 1 ໃບ, ຮັບໃບຢັ້ງຢືນ 5 ເປັນເຈົ້າ 1 ໃບ, ໃບຮັບຮອງ 5 ເປັນເຈົ້າ 1 ໃບ, ບຸກຄົນດີເດັ່ນໄດ້ຮັບຍ້ອງຍໍຈາກສະຫະພັນກຳມະບານແຂວງ ປະເພດ I ມີ 19 ສະຫາຍ, ຍິງ 7 ສະຫາຍ, ປະເພດ II ມີ 1 ສະຫາຍ, ໄດ້ຮັບຍ້ອງຍໍຂັ້ນເຈົ້າແຂວງ ປະເພດ I ມີ 18 ສະຫາຍ, ຍິງ 6 ສະຫາຍ, ປະເພດ II ມີ 2 ສະຫາຍ, ຍິງ 1 ສະຫາຍ.

84

ຈາກນັ້ນ, ຜູ້ແທນສົມບູນ ຍັງໄດ້ໃຊ້ສິດປ່ອນບັດຄັດເລືອກເອົາຄະນະປະທານກຳມະບານຮາກຖານພັດທະນາຊົນນະບົດ ແລະສະຫະກອນ ຊຸດໃໝ່ ມີຈຳນວນ 3 ສະຫາຍ, ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາສະຫາຍ ແສງວົງສາ ລາດທະວີໄຊ ເປັນປະທານ, ສະຫາຍ ດາໂບ ກັນວິໃສ ເປັນຮອງປະທານ ແລະ ສະຫາຍ ນ.ບົວພຽນ ສີຫາວົງ ເປັນຮອງປະທານ, ທັງເປັນປະທານກວດກາ ໃຫ້ມີຄວາມເຂັ້ມແຂງໜັກແໜ້ນ ເພື່ອຕອບສະໜອງຕາມຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃຫມ່ຢ່າງມີປະສິດທິຜົນ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates