ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເມືອງກະລຶມຂຸ້ນຂ້ຽວເກັບລາຍຮັບ ໃຫ້ບັນລຸແຜນ, ດຽວນີ້ໄດ້ 68%

59

ຂ່າວ : ສັນຍາ

  ຜ່ານໄປ 3 ໄຕມາດ ເມືອງກະລຶມ ສາມາດ ຈັດຕັ້ງປະຕິບັດການເກັບລາຍຮັບໄດ້ແລ້ວເກືອບ 3 ຕື້ກວ່າກີບ, ຮອດຂະນະນີ້ຍັງເຫຼືອເວລາອີກ 3 ເດືອນແຕ່ເມືອງຈະເອົາໃຈໃສ່ເກັບໃຫ້ບັນລຸໄດ້ຕາມ ຕົວເລກແຜນປີ 4,3 ຕື້ກວ່າກີບ.

 

   ທ່ານ ສີບັງອອນ ດາລາວົງ ກໍາມະການພັກເມືອງ, ຫົວໜ້າຫ້ອງການ-ການເງິນເມືອງກະລຶມໃຫ້ຮູ້ວ່າ: ການຈັດຕັ້ງປະຕິບັດ ໜ້າທີ່ວຽກງານວິຊາສະເພາະ ໂດຍສເພາະແມ່ນການເກັບລາຍຮັບເຂົ້າງົບປະມານຂອງຫ້ອງການໆເງິນເມືອງກະລຶມໃນໄລ ຍະຜ່ານມາ ແມ່ນໄດ້ນໍາເອົາແນວທາງນະໂຍບາຍຂອງພັກ, ຂໍ້ກໍານົດ, ກົດໝາຍຂອງລັດເປັນບ່ອນອີງ ແລະໄດ້ສຶກສາອົບ ຮົມການເມືອງນໍາພາແນວຄິດໃຫ້ພະນັກງານທຸກຄົນເອົາໃຈໃສ່ເຮັດໜ້າທີ່ຕາມພາລະບົດບາດ ເພື່ອຕ້ານ ແລະສະກັດກັ້ນ ການຮົ່ວໄຫຼຂອງລາຍຮັບງົບປະມານ.

 ເມືອງກະລຶມໄດ້ຮັບມອບໝາຍຕົວເລກການເກັບລາຍຮັບຈາກແຂວງທັງໝົດ 4,3 ຕື້ກວ່າກີບທຽບໃສ່ປີຜ່ານ ມາເພີ່ມ ຂຶ້ນເທົ່າຕົວ, ແຕ່ຜ່ານການປະຕິບັດມາຮອດວັນທີ 17 ຕຸລາ 2019 ເມືອງສາມາດເກັບໄດ້ 2,9 ຕື້ກວ່າກີບທຽບ ໃສ່ແຜນປີເທົ່າກັບ 68,03% ໃນນີ້ລາຍຮັບຈາກອາກອນປົກກະຕິ 2,68 ຕື້ກີບເທົ່າກັບ 72,60%; ລາຍຮັບພາສີທີ່ດິນ 49 ລ້ານກວ່າກີບເທົ່າກັບ 98,74%; ລາຍຮັບຄ່າທໍານຽມ 16 ລ້ານກວ່າກີບເທົ່າກັບ 27,63%; ລາຍຮັບວິຊາການ 37,8 ລ້ານກີບເທົ່າກັບ 8,88% ແລະລາຍຮັບຄຸ້ມຄອງຊັບສິນຂອງລັດ 193,7 ລ້ານກີບເທົ່າກັບ 129,13% ຂອງແຜນການປີ.

  ສໍາລັບລາຍຈ່າຍປະຕິບັດໄດ້ 25,9 ຕື້ກວ່າກີບເທົ່າກັບ 50,54% ຂອງແຜນການປີໃນນັ້ນຈ່າຍເງິນເດືອນ 10,5 ຕື້ກວ່າກີບເທົ່າກັບ 64,61%; ເງິນອຸດໜູນ 3,7 ຕື້ກວ່າກີບເທົ່າກັບ 74,70%; ເງິນບໍລິຫານ 1,6 ຕື້ກວ່າກີບເທົ່າກັບ 68,50%; ເງິນດັດສົມສົ່ງເສີມ 755 ລ້ານກວ່າກີບເທົ່າກັບ 82,56%; ເງິນການລົງທຶນ 9,2 ຕື້ກວ່າກີບເທົ່າກັບ 34,78% ແລະເງິນອື່ນໆເກືອບ 8 ລ້ານກີບເທົ່າກັບ 41,46%.

 ແນວໃດກໍດີ ເພື່ອເຮັດໃຫ້ຍອດລາຍຮັບບັນລຸຄາດໝາຍແຜນການ 4,3 ຕື້ກວ່າກີບເມືອງກະລຶມຈະຂຸດຄົ້ນທຸກແຫຼ່ງ ທີ່ບໍ່ເກີດລາຍຮັບເຂົ້າງົບປະມານ, ປົກປັກຮັກສາ ແລະຄຸ້ມຄອງລາຍຈ່າຍປະຕິບັດຕາມລະບຽບກົດໝາຍຢ່າງເຂັ້ມງວດ, ເມືອງຈະຕ້ອງເອົາໃຈໃສ່ຝຶກອົບຮົມພະນັກງານວິຊາການ ແລະສຶກສາອົບຮົມການເມືອງແນວຄິດ ເພື່ອນໍາເອົາແນວທາງນະ ໂຍບາຍຂອງພັກ, ນິຕິກໍາ, ກົດໝາຍຕ່າງໆທາງດ້ານການເງິນລົງເຜີຍແຜ່ໃຫ້ປະຊາຊົນ ແລະຜູ້ປະກອບການຮັບຮູ້ຕື່ນຕົວ ໃນການເສຍພັນທະໃຫ້ລັດ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates