ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

9 ເດືອນ ແຂວງເຊກອງເກັບຄ່າທໍາ ນຽມທາງໄດ້ເກືອບ 70%

51

ຂ່າວ : ສັນຍາ

ການເກັບລາຍຮັບຄ່າທໍານຽມທາງປະຈໍາປີ 2019 ຢູ່ ແຂວງເຊກອງໃນ 9 ເດືອນຜ່ານມາສາມາດເກັບ ໄດ້ແລ້ວເກືອບ 70% ຈາກຕົວເລກແຜນໝົດປີທີ່ ໄດ້ຮັບມອບໝາຍຈາກກະຊວງການເງິນ ກໍຄືກົມ ສ່ວຍສາອາກອນຈໍານວນທັງໝົດ 564,36 ລ້ານ ກີບ.

52

  ທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນປະຈໍາແຂວງເຊກອງໃຫ້ສໍາພາດຫວ່າງບໍ່ດົນນີ້ວ່າ: ການເກັບລາຍຮັບ ຄ່າທໍານຽມທາງເປັນລາຍຮັບທີ່ສໍາຄັນໜຶ່ງຂອງງົບປະມານ ໂດຍຕາມສະຖິຕິການມາຂຶ້ນທະບຽນຍານພາຫະນະທົ່ວແຂວງທີ່ ພະແນກໂຍທາທິການ ແລະຂົນສົ່ງປະຈໍາແຂວງເຊກອງ ມີຈໍານວນພາຫະນະທັງໝົດ 10.326 ຄັນ, ໃນນີ້ລົດຈັກຄວາມ ແຮງ 110 CC-200 CC ຈໍານວນ 8.568 ຄັນ; ລົດຕູ້ຈິບຄວາມແຮງ 1.000 CC-4.000 CC ຈໍານວນ 1.654 ຄັນ; ລົດບັນທຸກຂົນສົ່ງສິນຄ້າຄວາມແຮງ 2.500 CC-5.000 CC ຈໍານວນ 452 ຄັນ ແລະລົດໂດຍສານຄວາມແຮງ 2.500 CC-5.000 CC ຈໍານວນ 65 ຄັນ, ຖ້າຫາກວ່າຈໍານວນພາຫະນະທີ່ຂຶ້ນທະບຽນມາເສຍຄ່າທໍານຽມທາງປະຈໍາປີ ຄາດໝົດປີ 2019 ຈະສ້າງລາຍຮັບໃຫ້ແກ່ຂະແໜງສ່ວຍສາອາກອນແຂວງຢ່າງຕໍ່າ 600 ລ້ານກີບ.

     ສະນັ້ນ ເພື່ອເປັນການປະຕິບັດຕາມລັດຖະບັນຍັດຂອງປະທານປະເທດ ສະບັບເລກທີ 001/ປປທ, ລົງວັນທີ 20 ກັນຍາ 2017 ວ່າດ້ວຍຄ່າທໍານຽມທາງ; ບົດແນະນໍາຂອງກະຊວງການເງິນ ສະບັບເລກທີ 3445/ກງ, ລົງວັນທີ 10 ຕຸລາ 2017 ແລະນິຕິກໍອື່ນໆ, ໃນໄລຍະຜ່ານມາ ຂະແໜງສ່ວຍສາອາກອນປະຈໍາແຂວງເຊກອງໄດ້ປະສານສົມທົບກັບພາກ ສ່ວນກ່ຽວຂ້ອງ ໂດຍສະເພາະແມ່ນເຈົ້າໜ້າທີ່ຕໍາຫຼວດຈາລະຈອນ ແລະທະນາຄານການຄ້າຕ່າງປະເທດລາວມະຫາຊົນ ສາຂາເຊກອງໄດ້ລົງເຄື່ອນໄຫວເປີດຂະບວນການຊຸກຍູ້ການເສຍຄ່າທໍານຽມທາງຜ່ານລະບົບທະນາຄານໃນຂອບເຂດທົ່ວແຂວງທັງໝົດ 6 ຄັ້ງ ລວມມີ 9 ຈຸດ, ທັງນີ້ ກໍເພື່ອເປັນການປຸກລະດົມ, ກະຕຸກຊຸກຍູ້ ແລະອໍານວຍຄວາມສະດວກໃຫ້ແກ່ອົງການ ຈັດຕັ້ງພັກ-ລັດ, ບັນດາຫົວໜ່ວຍທຸລະກິດ ແລະປະຊາຊົນບັນດາເຜົ່າໄດ້ມາເສຍຄ່າທໍານຽມທາງປະຈໍາປີ 2019 ໃຫ້ເປັນຂະ ບວນຟົດຟື້ນ, ຊຶ່ງຜ່ານການປະຕິບັດເຫັນວ່າ ມາຮອດປະຈຸບັນແຂວງເຊກອງສາມາດເກັບລາຍຮັບຈາກຄ່າທໍານຽມທາງໄດ້ ທັງໝົດ 369,93 ລ້ານກີບ, ທຽບໃສ່ແຜນປະຕິບັດໄດ້ 69,31%.

53

    ທ່ານ ສົມບູນ ພັນຈັນ ໃຫ້ຮູ້ຕື່ມວ່າ: ການເສຍຄ່າທໍານຽມທາງ ແມ່ນເສຍຕາມຄວາມແຮງຂອງລົດ ເຊິ່ງໃນກໍລະນີບຸກຄົນ, ນິຕິບຸກຄົນ ຫຼື ການຈັດຕັ້ງທີ່ມີຍານພາຫະນະຢູ່ໃນການຄຸ້ມຄອງຂອງຕົນ, ແຕ່ບໍ່ເສຍ ຄ່າທໍານຽມທາງໃນປີຜ່ານມາ, ນອກຈາກ ຈະໄດ້ເສຍຄ່າທໍານຽມທາງຕາມອັດຕາທີ່ໄດ້ກໍານົດໄວ້ໃນລັດຖະບັນຍັດຂອງປະ ທານປະເທດແລ້ວ, ຍັງຈະຖືກປະຕິບັດມາດຕະການປັບໃໝຕື່ມອີກຄື: ກໍລະນີບໍ່ໄດ້ເສຍຄ່າທໍານຽມທາງຕາມເວລາທີ່ກໍານົດ ໄວ້ຈະຖືກປັບໃໝ 0,1% ຕໍ່ມື້ຂອງມູນຄ່າທີ່ຕ້ອງເສຍຄ່າທໍານຽມທາງປະຈໍາປີ 2019; ກໍລະນີບໍ່ໄດ້ເສຍຄ່າທໍານຽມທາງ ນັບແຕ່ປີ 2017 ຄືນຫຼັງຈະຖືກປັບໃໝ 60% ແລະກໍລະນີບໍ່ໄດ້ເສຍຄ່າທໍານຽມທາງປະຈໍາປີ 2018 ຈະຖືກປັບໃໝ 40% ຂອງມູນຄ່າທີ່ຕ້ອງເສຍປະຈໍາປີຕື່ມອີກ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates