ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ຮອງເຈົ້າອະທິການວັດບ້ານດ່ານມອບ ເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມ

0002ຂ່າວ : ສັນຍາ

ພຣະອາຈານ ກໍລະກັນ ເຊື້ອໂຊດ ຮອງເຈົ້າອາທິ ການວັດໂພນດູ່ທະນາຣາມບ້ານດ່ານເມືອງລະມາມ, ພ້ອມດ້ວຍພຣະສົງ, ອົງການປົກຄອງບ້ານ, ເຖົ້າແກ່ແນວໂຮມ ແລະປະຊາຊົນບ້ານດ່ານໄດ້ລົງ ມອບເຄື່ອງຊ່ວຍເຫຼືອບັນເທົ່າທຸກໃຫ້ແກ່ຜູ້ປະສົບໄພ ນ້ຳຖ້ວມຢູ່ເມືອງດາກຈຶງ ໂດຍສະເພາະປະຊາຊົນ ບ້ານຕັງໂບຣງ ທີ່ປະສົບໄພນໍ້າຖ້ວມໃນຕົ້ນເດືອນ ກັນຍາ ຜ່ານມາ.

 

          ພິທີດັ່ງກ່າວໄດ້ມີຂຶ້ນໃນວັນທີ 19 ກັນຍາ 2019 ທີບ້ານຕັງໂບຣງ ໂດຍມີທ່ານ ອຸ່ຄໍາ ຫຼ້າທະຈັກ ຄະນະປະຈໍາພັກເມືອງ, ປະທານກວດກາພັກເມືອງດາກຈຶງ, ທ່ານ ແສງນາວັນ ໄຊພອນເຮືອງ ຫົວໜ້າຫ້ອງການ ຮສສ ເມືອງ, ທ່ານ ຄໍາຊ່ອງ ເລຂາພັກ-ນາຍບ້ານໆດ່ານ; ພ້ອມນີ້ ກໍມີຜູ້ຕາງໜ້າພະແນກ ຮສສ ແຂວງ, ຂະແໜງການກ່ຽວຂ້ອງ, ຄະນະພັກ-ອົງການປົກຄອງ ແລະປະຊາຊົນບ້ານຕັງໂບຣງເຂົ້າຮ່ວມຢ່າງຫຼວງຫຼາຍ.

ໂດຍເຄື່ອງທີ່ນຳໄປມອບໃນຄັ້ງນີ້ ປະກອບມີເຂົ້າສານໜຽວ, ໝີ່ໄວໆ, ນໍ້າດື່ມ, ເກືອ, ແປ້ງນົວ, ປາກະປ໋ອງ, ຜ້າຫົ່ມ, ເຄື່ອງນຸ່ງ-ຫົ່ມ, ໝອນ ແລະເຄື່ອງອຸປະໂພກ-ບໍລິໂພກອື່ນໆລວມມູນຄ່າທັງໜົດ 16 ລ້ານກວ່າກີບ ຊຶ່ງໄດ້ມາຈາກການປະກອບສ່ວນຂອງອອກຕົນຍາດໂຍມພໍ່ແມ່ປະຊາຊົນ, ນັກທຸລະກິດ, ພໍ່ຄ້າຊາວຂາຍຢູ່ທັງໃກ້ ແລະໄກຮ່ວມບໍລິຈາກ, ທັງນີ້ ກໍ່ເພື່ອເປັນແບ່ງເບົາບັນເທົາທຸກໃຫ້ພໍ່ແມ່ປະຊາຊົນຜູ້ປະສົບໄພນ້ຳຖ້ວມໄດ້ຮັບແຮງໃຈ ແລະເປັນຂວັນກໍາລັງໃຈໃຫ້ແກ່ເຂົາເຈົ້າສູ້ຕໍ່ໄປໄດ້.

0002

ໂອກາດດັ່ງກ່າວ ທ່ານ ອຸ່ນຄໍາ ຫຼ້າທະຈັກ ກໍໄດ້ກ່າວສະແດງຄວາມຂອບໃຈມາຍັງພຣະອາຈານ ກໍລະກັນ ເຊື້ອໂຊດ ພ້ອມດ້ວຍຄະນະພັກ-ອົງການປົກຄອງ, ເຖົ້າແກ່ແນວໂຮມບ້ານດ່ານ, ອອກຕົນຍາດໂຍມ ແລະອົງການຈັດຕັ້ງທຸກພາກສ່ວນທີ່ເຫັນຄວາມສໍາຄັນ ແລະຈໍາເປັນປະກອບສ່ວນຊ່ວຍເຫຼືອບັນເທົາທຸກແກ່ປະຊາຊົນ ແລະການຊ່ວຍເຫຼືອຂອງພວກທ່ານໃນເທື່ອນີ້, ທາງຄະນະພັກ-ອົງການປົກຄອງເມືອງ ກໍຄືບ້ານຕັງໂບຣງຈະໄດ້ນໍາໄປມອບຕໍ່ໃຫ້ກັບບັນດາຄອບຄົວຜູ້ປະສົບໄພ ເພື່ອເປັນການແບ່ງເບົາຄວາມທຸກໃຫ້ແກ່ເຂົາເຈົ້າສູ້ຕໍ່ໄປ.

ບ້ານຕັງໂບຣງ ປະກອບມີ 143 ຫຼັງຄາເຮືອນ 265 ຄອບຄົວ, ມີພົນລະເມືອງ 1.441 ຄົນ, ຍິງ 705 ຄົນ ໃນນີ້ມີຜູ້ໄດ້ຮັບຜົນກະທົບຈາກນໍ້າຖວ້ມໜັກກວ່າໝູ່ 9 ຫຼັງຄາເຮືອນ 12 ຄອບຄົວ, ພົນລະເມືອງ 88 ຄົນ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates