ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ທ່ານ ປອ ວິໄລວົງ ບຸດດາຄຳ ເຄື່ອນໄຫວຕິດຕາມກວດກາ ແລະຊຸກຍູ້ວຽກງານຢູ່ແຂວງເຊກອງ

ທ່ານ ປອ ວິໄລວົງ ບຸດດາຄຳ ເຄື່ອນໄຫວຕິດຕາມກວດກາ ແລະຊຸກຍູ້ວຽກງານຢູ່ແຂວງເຊກອງ

-------**-------

#ພາບ:ຂ່າວ: ພຸດທະສອນ

     ໃນວັນທີ23 ພຶດສະພານີ້ທ່ານປອວິໄລວົງບຸດດາຄໍາປະທານກຳມາທິການແຜນການ, ການເງິນແລະການກວດສອບ, ສະມາຊິກສະພາແຫ່ງຊາດ ເຂດເລືອກຕັ້ງທີ 16 ແຂວງເຊກອງພ້ອມຄະນະໄດ້ລົງເຄື່ອນໄຫວຕິດຕາມກວດກາແລະຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປີ2018 ທີ່ຕິດພັນກັບວຽກງານພັດທະນາຊົນນະບົດແລະລຶບລ້າງຄວາມທຸກຍາກ, ການລົງທຶນຂອງລັດ, ການຈັດສັນງົບປະມານຂອງຂະແໜງການສຶກສາທິການ-ກິລາ, ສາທາລະນະສຸກແລະການຄຸ້ມຄອງດ່ານຢູ່ແຂວງເຊກອງ, ໂດຍມີ ທ່ານພອນເພັດຄິວລະວົງຮອງເລຂາພັກແຂວງ, ສະມາຊິກສະພາແຫ່ງຊາດ ເຂດເລືອກຕັ້ງທີ 16, ປະທານສະພາປະຊາຊົນແຂວງພ້ອມດ້ວຍຄະນະແລະຫົວໜ້າພະແນກການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.IMG 0008

IMG 0020

 

   ໃນນີ້ ທ່ານ ທອງຄໍາ ມະນີວົງ ຫົວໜ້າພະແນກແຜນການ ແລະການລົງທຶນ ແຂວງໄດ້ລາຍງານໃຫ້ຮູ້ວ່າ ໃນປີ 2018 ຄາດຄະເນເບື້ອງຕົ້ນອັດຕາການເຕີບໂຕເສດຖະກິດ ( GDP )ຈະເພີ່ມຂຶ້ນ 9,3% ເຫັນວ່າມີທ່າອ່ຽງຂະຫຍາຍຕົວໄປຕາມທິດທາງແຜນການ 5 ປີ ທີ່ວາງໄວ້, ໂຄງປະກອບເສດຖະກິດກໍຄ່ອຍໆຫັນໄປຕາມທິດທາງນະໂຍບາຍເທື່ອລະກ້າວ, ສໍາລັບມູນຄ່າ GDP ສະເລ່ຍຕໍ່ຫົວຄົນຄາດຄະເນຈະບັນລຸ 1.632 ໂດລາ ໃນປີ 2018,ຄາດຄະເນຮອດປີ 2020 ຈະບັນລຸຄາດໝາຍທີ່ວາງໄວ້(ແຜນ 5 ປີ 2.100 ໂດລາ), ຜົນສໍາເລັດດ້ານການພັດທະນາເສດຖະກິດ-ສັງຄົມ ໃນປີ 2018 ສະພາແຫ່ງຊາດ ແລະສະພາປະຊາຊົນແຂວງເຊກອງອະນຸມັດໂຄງການລົງທຶນຂອງລັດໃຫ້ແຂວງເຊກອງລວມທັງໝົດ 302 ໂຄງການ, ມີມູນຄ່າລວມ 4.588,27 ຕື້ກີບ, ອະນຸມັດປີ 2018 ມູນຄ່າ 101,63 ຕື້ກີບ ໃນນັ້ນ :ໂຄງການທີ່ສະພາແຫ່ງຊາດຮັບຮອງມີ 29 ໂຄງການ ,ມີມູນຄ່າ 3.923,71 ຕື້ກີບ,ອະນຸມັດປີ 2018 ມູນຄ່າ 75,86ຕື້ກີບ,ໂຄງການທີ່ສະພາປະຊາຊົນແຂວງຮັບຮອງມີ 273 ໂຄງການ ,ມີມູນຄ່າ 664,55 ຕື້ກີບ,ອະນຸມັດປີ 2018 ມູນຄ່າ 25,77 ຕື້ກີບ, ໃນຈໍານວນໂຄງການທີ່ສະພາອະນຸມັດທັງໝົດໃນປີ 2018 ຈໍານວນ 302 ໂຄງການ ພະແນກ ຜທ ແຂວງໄດ້ມອບໃຫ້ພະແນກການຂັ້ນແຂວງ 154 ໂຄງການ,ມີມູນຄ່າລວມ 4.272,35 ຕື້ກີບ ແລະຫ້ອງການຂັ້ນເມືອງ 148 ໂຄງການ, ມີມູນຄ່າລວມ 315,92 ຕື້ກີບ, ສາມາດຂະຫຍາຍເນື້ອທີ່ນາປີໄດ້10.253 ເຮັດຕາ ລື່ນແຜນ 708 ເຮັກຕາ ແລະນາແຊງໄດ້ 1.120 ເຮັກຕາ, ຄາດວ່າຈະບັນລຸຕາມແຜນ 5 ປີທີ່ວາງໄວ້ໃນປີ 2020, ຂະຫຍາຍເນື້ອທີ່ປູກພືດຜັກຕ່າງໆເປັນສິນຄ້າໄດ້ 603,4 ເຮັກຕາ ເທົ່າກັບ 70% ຂອງແຜນການ 5 ປີວາງໄວ້, ບັນດາອັດຕາການລ້ຽງສັດທີ່ວາງໄວ້ແມ່ນສາມາດປະຕິບັດໄດ້ສໍາເລັດໂດຍພື້ນຖານ, ສວ່ນການຫຼຸດຜ່ອນຄວາມທຸກຍາກມາຮອດປະຈຸບັນບ້ານທຸກຍາກຫຼຸດລົງຍັງເຫຼືອ 54 ບ້ານ ກວມເອົາ 30,5% ຂອງຈໍານວນບ້ານທັງໝົດ, ຄອບຄົວທຸກຍາກຫຼຸດລົງຍັງເຫຼືອ 1.811 ຄອບຄົວ ກວມເອົາ 9% ຂອງຈໍານວນຄອບຄົວທັງໝົດ, ການຂະຫຍາຍຕາຂ່າຍໄຟຟ້າ 22 KV, 0,4 KV ມາຮອດປະຈຸບັນສາມາດປະຕິບັດໄດ້ 129 ບ້ານ ລື່ນແຜນ 47 ບ້ານ ເທົ່າກັບ 64,5% ຂອງແຜນ 5 ປີທີ່ວາງໄວ້ຮອດປີ 2020, ການປັບປຸງເສັ້ນທາງຄົມມະນາຄົມ ແລະຂົນສົ່ງ ປະຕິບັດໄດ້ 2.028,9 ກິໂລແມັດ ເພີ່ມຂຶ້ນ128 ເສັ້ນ,ຍາວ 732,6 ກິໂລແມັດ,ທຽບໃສ່ແຜນ 5 ປີປະຕິບັດໄດ້ 76,55%; ໃນນີ້ ມີບ້ານທີ່ມີເສັ້ນທາງເຂົ້າເຖິງ 196 ບ້ານ ກວມເອົາ 99,49%ຂອງຈໍານວນບ້ານທັງໝົດ, ພິເສດການກໍ່ສ້າງເສັ້ນທາງ 16B ສາມາດຈັດຕັ້ງປະຕິບັດມີຜົນສໍາເລັດສໍາເລັດ 80,10% ທຽບໃສ່ໜ້າວຽກທັງໝົດ ແລະຂົວຂ້າມນໍ້າເຊກອງສາມາດປະຕິບັດໄດ້ 100% ແລະໄດ້ເປີດນໍາໃຊ້ແລ້ວ; ນອກນີ້ ແຕ່ລະຂະແໜງການ ກໍໄດ້ລາຍງານສະພາບການຈັດຕັ້ງປະຕິບັດວຽກງານເຊິ່ງໄດ້ຍົກໃຫ້ເຫັນດ້ານດີ, ຂໍ້ຄົງຄ້າງ ໃນການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ຈຸດສຸມ 6 ເດືອນທ້າຍປີ 2018 .

     ໃນໂອກາດນີ້ທ່ານປອວິໄລວົງບຸດດາຄຳກໍໄດ້ໂອ້ລົມໃຫ້ທິດຊີ້ນຳຫຼາຍບັນຫາພ້ອມທັງໄດ້ຮຽກຮ້ອງໃຫ້ບັນດາຂະແໜງການຮີບຮ້ອນໃນການສົ່ງເສີມບັນຫາການລົງທຶນພາຍໃນແລະຕ່າງປະເທດເປັນບັນຫາສໍາຄັນ, ສືບຕໍ່ສຸມໃສ່ບັນດາໂຄງການ, ການຮ່ວມມື, ການຊ່ວຍເຫຼືອລ້າ, ເປັນເຈົ້າການໃນຄວາມເປັນເອກະພາບກວດກາ,ປັບປຸງຄືນກ່ຽວກັບນິຕິກຳໃຫ້ມີຄວາມສອດຄ່ອງ, ປັບປຸງເສດຖະກິດມະຫາພາກ, ປັບປຸງກົນໄກການປະສານງານກັບສູນກາງຢ່າງເປັນປົກກະຕິຕໍ່ເນື່ອງ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates