ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ໂຮງຮຽນການເມືອງ-ການປົກຄອງ ແຂວງເຊກອງ ເປີດຊຸດຮຽນພາກປົກກະຕິ ຮຸ່ນທີ X

0100

#ຂ່າວ-ພາບ: ນາລີວັນ

         ໂຮງຮຽນການເມືອງ-ການປົກຄອງ ແຂວງເຊກອງ ໄດ້ຈັດພິທີ  ເປີດຊຸດຮຽນໃໝ່ ທິດສະດີການເມືອງ-ການປົກຄອງ ລະບົບຊັ້ນກາງ (15 ເດືອນ) ພາກປົກກະຕິ ຮຸ່ນທີ  X  ຂຶ້ນໃນວັນທີ  22  ມັງກອນ  2018,  ໂດຍການເຂົ້າຮ່ວມຂອງ  ທ່ານ ປທ.ບຸນທັນ ຈູມຈັນທະວົງ ຫົວໜ້າໂຮງຮຽນການເມືອງ-ການປົກຄອງ ແຂວງເຊກອງມີຕາງໜ້າຈາກພະແນກການອ້ອມຂ້າງແຂວງ, ມີຄະນະພັກ-ຄະນະຫ້ອງ ຮຸ່ນທີ X,  ຄູ-ອາຈານ ພ້ອມດ້ວຍນັກສຶກສາ ຮຸ່ນທີ X ເຂົ້າຮ່ວມ.

0101

         ທ່ານ ປທ ສຸດທິໂສມ ໄຊຍະແສງ ຮອງຫົວໜ້າໂຮງຮຽນການເມືອງ-ການປົກຄອງ ແຂວງເຊກອງ ກ່າວວ່າ: ການເປີດສົກຮຽນຄັ້ງ ນີ້ ກໍເພື່ອເປັນການປັບປຸງກໍ່ສ້າງພະນັກງານຄຸ້ມຄອງ-ນໍາພາ ຮຸ່ນສືບທອດ ຢູ່ບັນດາກົງຈັກການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ ແລະສອງກໍາລັງປະກອບອາວຸດ ຢູ່ພາຍໃນແຂວງນັ້ນ ມີລະດັບທິດສະດີໃຫ້ນັບມື້ເພີ່ມຂຶ້ນ ທັງມີປະລິມານ ແລະ ຄຸນນະພາບ, ມີຄວາມຮູ້ຄວາມສາມາດທາງດ້ານທິດສະດີການເມືອງ-ການປົກຄອງ ກໍຄືແນວທາງການນໍາພາຂອງພັກ, ນະໂຍບາຍ ແລະ ການຄຸ້ມຄອງຂອງລັດ ເຮັດໃຫ້ພະນັກງານມີແນວຄິດຫຼັກໝັ້ນຊົນຊັ້ນກໍາມະກອນ, ມີແນວຄິດເຊື່ອໝັ້ນຕໍ່ການນໍາພາຂອງພັກ, ເຊື່ອໝັ້ນ ຕໍ່ອຸດົມການກໍຄືພາລະກິດປຽ່ນແປງໃໝ່ຢ່າງມີຫຼັກການຂອງພັກ, ມີຄວາມຈົ່ງຮັກພັກດີຕໍ່ປະເທດຊາດ, ມີຄວາມຫ້າວຫັນ ແລະຄວາມ ເປັນແບບຢ່າງໃນການປະຕິບັດໜ້າທີ່ວຽກງານໃຫ້ສູງຂຶ້ນ. ພ້ອມດຽວກັນນັ້ນກໍເພື່ອເຮັດໃຫ້ຜູ້ຮຽນຮູ້ສົມທຽບລະຫວ່າງທິດສະດີໃສ່ພຶດ ຕິກໍາ ແລະຮູ້ໝູນໃຊ້ເຂົ້າໃນການປະຕິບັດໜ້າທີ່ວຽກງານທີ່ຕົນຮັບຜິດຊອບໃຫ້ມີຄຸນນະພາບທີ່ສູງຂຶ້ນ.0102

       ພິທີເປີດຊຸດຮຽນທິດສະດີການເມືອງ-ການປົກຄອງ ໃນລະດັບຊັ້ນກາງ ຊຸດທີ X ນີ້ ມີນັກ  ສຶກສາເຂົ້າຮຽນທັງໝົດ 45 ທ່ານຍິງ 12 ທ່ານເຊິ່ງຈະໃຊ້ເວລາທັງໝົດ 15 ເດືອນ ແລະຈະໄດ້ແບ່ງອອກເປັນ 3 ພາກຮຽນຄື: 5 ເດືອນ/1 ພາກຮຽນ ເຊິ່ງຈະມີເວລາໃນການພັກຮຽນ 2 ອາທິດ ແລະພັກປະຈໍາປີ 1ເດືອນ. ໃນນີ້, ພາກຮຽນທີ 1 ແມ່ນເລີ່ມດໍາເນີນການຮຽນ-ການສອນ ແຕ່ວັນທີ 4/1/2018 - 8/6/ 2018ຈາກນັ້ນຈະໄດ້ພັກພາກ 2 ອາທິດ; ພາກຮຽນທີ 2 ແມ່ນຈະເລີ່ມແຕ່ວັນທີ 25/6/2018 - 23/11/2018ຈາກນັ້ນຈະໄດ້ພັກປະຈໍາປີ 1 ເດືອນ ແລະພາກຮຽນທີ 3 ເລີ່ມແຕ່ວັນທີ 31/12/2018-31/5/2019ແມ່ນສໍາເລັດການສຶກສາ ( ຮັບໃບປະກາສະນິຍະບັດ ແລະປິດຊຸດຮຽນຢ່າງເປັນທາງການ).

        ສໍາລັບຫຼັກສູດການຮຽນ-ການສອນ ປະກອບມີ 3 ໝວດວິຊາຫຼັກ 29 ວິຊາຮຽນຄື:  ໝວດວິຊາຄວາມຮູ້ທົ່ວໄປ ປະກອບມີ 14 ວິຊາຮຽນຄື: ພາສາອັງກິດ, ຄັອມພິວເຕີ, ປະຫວັດສາດພັກ, ປະຫວັດສາດລາວ, ພູມສາດການເມືອງໂລກ, ປະຊາກອນສາດ, ວັດທະນະທໍາ, ຄຸນສົມບັດ, ພົວພັນສາກົນ, ກົດໝາຍລັດຖະທໍາມະນູນ, ທິດສະດີລັດ ແລະກົດໝາຍ, ກົດໝາຍອາຍາ, ກົດໝາຍແພ່ງ ແລະການເມືອງວິທະຍາ; ໝວດວິຊາເຕັກນິກທົ່ວໄປ ປະກອບມີ 7 ວິຊາຮຽນຄື: ປກສ-ປກຊ, ເສດຖະສາດພັດທະນາ, ການບໍລິຫານອົງການ, ເຕັກນິກບໍລິຫານ, ຈິດຕະສາດສັງຄົມ, ຄຸ້ມຄອງບຸກຄະລາກອນ ແລະຄຸ້ມຄອງເສດຖະສາດ; ໝວດວິຊາສະເພາະ ປະກອບມີ 6 ວິຊາຮຽນ ແລະມີ 1 ພາກຈັດຕັ້ງປະຕິບັດຕົວຈິງຄື: ວິຊາປັດຊະຍາມາກ-ເລນິນ, ເສດຖະສາດການເມືອງມາກ-ເລນິນ, ລັດທິສັງຄົມນິຍົມວິທະຍາສາດ, ການປົກຄອງ, ກໍ່ສ້າງພັກ, ວຽກງານຂົນຂວາຍ ແລະກໍ່ສ້າງຮາກຖານ ແລະລົງເກັບກໍາຂໍ້ມູນ, ຂຽນ ແລະປ້ອງກັນບົດທົບທວນ (ພາກຈັດຕັ້ງປະຕິບັດຕົວຈິງ). ເຊິ່ງໃນນັ້ນ, ລວມທັງໝົດມີ 82 ໜ່ວຍກິດ.

        ໂອກາດຽວກັນນີ້ ທ່ານ ປທບຸນທັນ ຈູມຈັນທະວົງ ຫົວໜ້າໂຮງຮຽນການເມືອງ-ການປົກຄອງແຂວງເຊກອງ ໄດ້ໃຫ້ກຽດໂອ້ລົມຕໍ່ນັກສຶກສາທີ່ຈະເຂົ້າຮຽນໃນຊຸດໃໝ່ນີ້ໂດຍໄດ້ເນັ້ນໜັກໃຫ້ນັກສຶກສາທຸກສະຫາຍຈົ່ງເອົາໃຈໃສ່ສຶກສາຮໍ່າຮຽນເກັບ ກ່ຽວເອົາຄວາມຮູ້-ຄວາມສາມາດຈາກຄູ-ອາຈານທີ່ຖ່າຍທອດໃຫ້ພ້ອມທັງເອົາໃຈໃສ່ປະຕິບັດລະບຽບວິໄນຂອງໂຮງຮຽນວາງອອກໃຫ້ ເຂັ້ມງວດມີຄວາມສາມັກຄີຊ່ວຍເຫຼືອເຊິ່ງກັນ ແລະກັນ, ຈໍາແນກໃຫ້ໄດ້ມິດ-ສັດຕູອັນຖືກອັນຜິດຢ່າງຈະແຈ້ງ ເພື່ອສ້າງຕົນເອງແຕ່ ດຽວນີ້ໃຫ້ກາຍເປັນພະນັກງານທີ່ດີໃນພາຍໜ້າ, ເຊີ່ງທັງນີ້ເພື່ອເປັນການຍົກສູງທາງດ້ານລະດັບທິດສະດີການເມືອງການປົກຄອງໃຫ້ແກ່ ພະນັກງານ-ລັດຖະກອນໃຫ້ສູງຂຶ້ນ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates