ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງ ສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປີ 2017 ແລະ ວາງແຜນການປີ 2018

0099

#ພາບ-ຂ່າວ: ພຸດທະສອນ

ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ​ແລະແຜນການທິດທາງປີ 2018ໄດ້ໄຂຂຶ້ນ ໃນຕອນບ່າຍວັນທີ 17 ມັງກອນ ນີ້ ຢູ່ທີ່ສະໂມສອນສະພາແຂວງ ໂດຍການເປັນປະທານຂອງທ່ານ ທອນສົມມັກ ຈັນທະສີດາ ຫົວໜ້າພະແນກ ການເງິນແຂວງເຊກອງ, ມີທ່ານຮອງເຈົ້າເມືອງ, ຜູ້ຊີ້ນຳວຽກງານເສດຖະກິດ ແລະ ຫົວໜ້າ ຫຼື ຮອງຫົວໜ້າຫ້ອງການການເງິນຈາກ 4 ເມືອງ, ພ້ອມດ້ວຍບັນດາພະແນກການ, ຂະແໜງການອ້ອມ​ຂ້າງ​ແຂວງ ເຂົ້າຮ່ວມ.

ທ່ານ ຄໍາຮູ້ ອ່ອນມະນີ ຮອງຫົວໜ້າພະແນກການເງິນແຂວງເຊກອງໄດ້ສະຫຼຸບ ລາຍ​ງານ ການຈັດຕັ້ງປະຕິບັດວຽກງານລາຍຮັບ-ລາຍຈ່າຍ ງົບປະມານແຫ່ງລັດປະຈຳປີ 2017 ໃຫ້ຮູ້ວ່າ: ໃນໄລຍະ 1 ປີ ຜ່ານມາໄດ້ສູ້ຊົນເກັບລາຍຮັບມອບເຂົ້າງົບປະມານ ​ໄດ້ທັງໝົດ 103,37 ຕື້ກີບ ທຽບໃສ່ແຜນການປີ ປະຕິບັດໄດ້ລື່ນແຜນ 39% ໃນນັ້ນປະກອບມີ: ລາຍຮັບພູດສູນກາງ 0,09 ຕື້ກີບ ທຽບໃສ່ແຜນປີ ລື່ນແຜນ 50 %, ລາຍຮັບພາຍໃນແຂວງ(ທ້ອງຖິ່ນ) 95,28 ຕື້ກີບ ທຽບໃສ່ແຜນການປີ ລື່ນແຜນ 38%, ຂັ້ນແຂວງປະຕິບັດໄດ້ລື່ນແຜນ, ຂັ້ນພະແນກລື່ນແຜນປີ 0,25 ຕື້ກີບ ແລະ ຂັ້ນເມືອງປະຕິບັດໄດ້ລື່ນແຜນ 1,29 ຕື້ກີບ,​ໂດຍ​ໄດ້​ຕີ​ລາຄາການຈັດຕັ້ງປະຕິບັດງົບປະມານປີ 2017 ຂອງຂະແໜງຄັງເງິນ-ງົບປະມານ ເຫັນວ່າມີຄວາມ​ເຂັ້ມ​ງວດ ຮັດກຸມ ແລະ ຖືກຕ້ອງສອດຄ່ອງກັບລະບຽບກົດໝາຍ ​ແລະ ມີທ່ວງທ່າຂະຫຍາຍຕົວ ດີຂຶ້ນເລື້ອຍໆ ສະແດງອອກໃນການກວດກາປິດບັນຊີງົບປະມານ-ຄັງເງິນ ສາມາດເບີກຈ່າຍເງິນເດືອນ-ເງິນນະໂຍບາຍຕ່າງໆໃນທົ່ວແຂວງໄດ້ສຳເລັດ 100% ແລະ ເງິນບໍລິຫານ, ດັດສົມ ປະຕິບັດ​ການ​ເບີກ​ຈ່າຍໄດ້ດີພໍສົມຄວນ, ສາມາດ​ເຮັດ​ໃຫ້ການເຄື່ອນໄຫວວຽກງານວິຊາສະເພາະຂອງບັນດາ​ຂະ​ແໜງ​ການ ເປັນປົກຫະຕິດີ, ສາມາດຕອບສະໜອງລາຍຈ່າຍໃຫ້ບັນດາພະແນກການ ແລະ 4 ຕົວເມືອງໄດ້ສຳເລັດ 100% ພ້ອມທັງ​ໄດ້ກວດກາຕົວເລກຍອດເຫຼືອ ໃນບັນຊີຄັງເງິນສົດ ແລະ ເງິນຝາກທະນາຄານ ພາຍຫຼັງປິດສູນໂມງ ຍອດເຫຼືອງົບປະມານແມ່ນ 13,34 ຕື້ກີບ.

ທ່ານຮອງຫົວໜ້າພະແນກການເງິນແຂວງໃຫ້ຮູ້ຕື່ມວ່າ: ສຳລັບທິດທາງແຜນການງົບປະມານແຫ່ງລັດປີ 2018 ພວກເຮົາຕ້ອງໄດ້ສູ້ຊົນປະຕິບັດຄາດໝາຍໃນການຈັດເກັບລາຍຮັບ​ໃຫ້​ໄດ້ຢ່າງ​ຄົບ​ຖ້ວນ​ຕາມ​ທ່າ​ແຮງທີ່ບົ່ມຊ້ອນໃນທ້ອງຖິ່ນ, ຮັບປະກັນ​ການຈັດຕັ້ງປະຕິບັດງົບປະມານລວມສູນຢູ່ຄັງເງິນໃຫ້ສອດຄ່ອງຖືກຕ້ອງຕາມລະບຽບກົດໝາຍທີ່ວາງອອກ, ເຊິ່ງ​​ໄດ້​ວາງຄາດໝາຍ​ສູ້​ຊົນ​ຊອກລາຍຮັບ ​ໃຫ້​ໄດ້ທັງໝົດລວມທັງເງິນດຸ່ນດ່ຽງຈາກ​ສູນ​ກາງ 369,48 ຕື້ກີບ, ໃນນີ້ມີລາຍຮັບພາຍໃນບວກລາຍຮັບວິຊາການ​ໃຫ້​ໄດ້ 84,34 ຕື້ກີບ ເພີ່ມຂຶ້ນ 5%, ລາຍຮັບຈາກສູນກາງດຸ່ນດ່ຽງ 290,06 ຕື້ກີບ ຫຼຸດລົງ 4%, ຍອດລາຍຈ່າຍງົບປະມານ 369,48 ຕື້ກີບ ທຽບໃສ່ແຜນດັດແກ້ຫຼຸດລົງ 8%.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates