ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ຖວທ ເຊກອງ ປາຖະກະຖາວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ

0094

#ຂ່າວ-ພາບ: ນາລີວັນ

          ຕອນເຊົ້າວັນທີ 12 ມັງກອນ 2017 ນີ້, ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງເຊກອງ ໄດ້ຈັດພິທີປາຖະກະຖາເລົ່າຄືນມູນເຊື້ອວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ (9 ທັນວາ 2003-9 ທັນວາ 2017) ໃຫ້ກຽດປາຖະກະຖາໂດຍທ່ານ ສຸບັນ ເດສົມຟອງ ຮອງຫົວໜ້າ ພະແນກ ຖວທ ແຂວງ ເຊກອງ, ມີຄະນະພັກຄະນະພະແນກ, ຫົວໜ້າ-ຮອງຂະແໜງທີ່ຂຶ້ນກັບ ພ້ອມດ້ວຍພະນັກງານ-ລັດຖະກອນພາຍໃນພະແນກເຂົ້າຮ່ວມຢ່າງພ້ອມພຽງ.

0095

          ໃນການປາຖະກະຖາ ທ່ານ ສຸບັນ ເດສົມຟອງ ໄດ້ຍົກໃຫ້ເຫັນເຖິງສະພາບລວມ ແລະປະຫວັດຄວາມເປັນມາຂອງວັນຕ້ານ ການສໍ້ລາດບັງຫຼວງສາກົນ, ການຈັດຕັ້ງປະຕິບັດການສະກັດກັ້ນ ແລະຕ້ານການສໍ້ລາດບັງຫຼວງຢູ່ ສປປ ລາວ ໃນໜຶ່ງປີຜ່ານມາ ແລະວາງທິດທາງແຜນການໃນຕໍ່ໜ້າ. ການສໍ້ລາດບັງຫຼວງແມ່ນສະພາບຫຍໍ້ທໍ້ໜຶ່ງໃນກົງຈັກການຈັດຕັ້ງ, ເປັນໄພອັນຕະລາຍຮ້າຍແຮງ ເຊິ່ງມັນສົ່ງຜົນກະທົບ ແລະກົດໜ່ວງຖ່ວງດຶງເຖິງການພັດທະນາເສດຖະກິດ-ສັງຄົມຂອງແຕ່ລະປະເທດໃນໂລກ ບໍ່ວ່າຈະເປັນປະເທດ ນ້ອຍ ຫຼືໃຫຍ່, ທຸກຍາກ ຫຼືຮັ່ງມີ ກໍລ້ວນແຕ່ມີຜົນກະທົບເຊັ່ນດຽວກັນ, ການສໍ້ລາດບັງຫຼວງເປັນການຕັດຮອນເອົາລາຍໄດ້ຂອງຊາດ, ຂອງລວມໝູ່ ກໍ່ຄືຂອງພົນລະເມືອງດ້ວຍຫຼາຍຮູບຫຼາຍວິທີ, ສ້າງຄວາມເສຍຫາຍໃຫ້ແກ່ຊັບສິນເງິນຄໍາຂອງລັດ, ລວມໝູ່ ແລະປະຊາ ຊົນເປັນຈໍານວນມະຫານສານ, ການສໍ້ລາດບັງຫຼວງເປັນການສະແດງອອກຢ່າງເປີດແປນຂອງການຂາດຄຸນນະທໍາ, ຂາດຈັນຍາບັນຂອງ ຜູ້ດໍາເນີນງານໃນສັງຄົມ ກໍ່ໃຫ້ເກີດມີກຸ່ມກ້ອນຮ່ວມຜົນປະໂຫຍດທາງເສດຖະກິດ, ການເມືອງ ແລະນໍາໄປສູ່ຄວາມບໍ່ເປັນເອກະພາບ, ເກີດມີຄວາມແຕກແຍກ ແລະອື່ນໆ. ຍ້ອນເຫັນໄດ້ຜົນຮ້າຍ ແລະໄພອັນຕະລາຍຂອງການສໍ້ລາດບັງຫຼວງຄືດັ່ງກ່າວ ປະຊາຄົມໂລກຈິ່ງໄດ້ ມີການຄິດຄົ້ນສ້າງຂອບເຂດ, ກໍານົດໝາຍສາກົນເປັນບ່ອນອີງໃຫ້ມີການພົວພັນຮ່ວມມືລະຫວ່າງປະເທດຕ່າງໆ ນັບທັງຢູ່ໃນຂອບເຂດ ພາກພື້ນ ແລະໃນໂລກ ເພື່ອພ້ອມກັນສະກັດກັ້ນ ແລະຕໍ່ສູ້ຢ່າງມີປະສິດທິພາບ ປະສິດທິຜົນຕໍ່ກັບບັນດາການກະທໍາ ກໍ່ຄືພຶດຕິກໍາທີ່ເປັນ ການສໍ້ລາດບັງຫຼວງ. ດັ່ງນັ້ນກອງປະຊຸມໃຫຍ່ສະຫະປະຊາຊາດຈຶ່ງໄດ້ມີມະຕິ ເລກທີ 55/6, ລົງວັນທີ 14/12/200 ໄດ້ກໍານົດເອົາ ຄວາມຈໍາເປັນຕ້ອງມີກົດໝາຍສາກົນທີ່ມີຜົນສັກສິດໃນການສະກັດກັ້ນ ແລະຕ້ານການສໍ້ລາດບັງຫຼວງຢູ່ໃນໂລກ, ຈາກນັ້ນສົນທິສັນຍາ ສະຫະປະຊາຊາດວ່າດ້ວຍການຕ້ານການ ສໍ້ລາດບັງຫຼວງໄດ້ຮັບຮອງເປັນເອກະສັນໃນວັນທີ 18 ທັນວາ 2002 ທີ່ນິວຢອກ ສະຫະລັດອາເມລິກາ ແລະໄດ້ເປີດໃຫ້ບັນດາລັດພາຄີລົງນາມເຂົ້າເປັນສະມາຊິກ ໃນວັນທີ 9 ທັນວາ 2003 ທີ່ເມລິດາ ປະເທດແມ໊ກຊິໂກ, ສປປ ລາວ ໄດ້ລົງນາມສົນທິສັນຍາວ່າດ້ວຍການຕ້ານການສໍ້ລາດບັງຫຼວງ ໃນວັນທີ 10 ທັນວາ 2003 ແລະໃຫ້ສັດຕະຍາບັນ ໃນວັນທີ 25 ກັນຍາ 2009 ຂະນະທີ່ກອງປະຊຸມສະມັດຊາໃຫຍ່ສະຫະປະຊາຊາດ ໃນປີ 2003 ໄດ້ອອກຍັດຕິ ສະບັບເລກທີ 58/4 ໂດຍກໍານົດເອົາວັນທີ 9 ທັນວາ ຂອງທຸກໆປີ ເປັນວັນຕ້ານການສໍ້ລາດບັງຫຼວງສາກົນ. ນັບແຕ່ນັ້ນມາ ວັນທີ 9 ທັນວາ ໄດ້ກາຍເປັນວັນທີ່ມີຄວາມໝາຍສໍາຄັນ ເປັນວັນແຫ່ງຄວາມສາມັກຄີ ແລະບັນດາປະຊາຊາດ ໃນທົ່ວໂລກ ເຊິ່ງການສະເຫຼີມສະຫຼອງວັນຕ້ານການສໍ້ລາດບັງຫຼວງສາກົນ ປີນີ້ແມ່ນພາຍໃຕ້ຄໍາຂັວນ "ຮ່ວມແຮງ ຮ່ວມໃຈ ຕ້ານການສໍ້ລາດບັງຫຼວງ ເພື່ອພັດທະນາ, ສະຫງົບສຸກ ແລະຄວາມໝັ້ນຄົງ".

       ການຈັດຕັ້ງປາຖະກະຖາຂຶ້ນໃນຄັ້ງນີ້, ກໍເພື່ອເປັນການເພີ່ມທະວີຄວາມຮັບຜິດຊອບຂອງພະນັກງານ-ລັດຖະກອນທົ່ວພະແນກ ຖວທ ແຂວງເຊກອງ ໃຫ້ມີຄວາມໜັກແໜ້ານເຂັ້ມແຂງ, ກໍາແໜ້ນ, ເຊື່ອມຊຶມ, ເຂົ້າໃຈແຈ້ງຕໍ່ໄພອັນ ຕະລາຍຮ້າຍແຮງຂອງການສໍ້ລາດ ບັງຫຼວງ ແລະທັງເປັນການທົບທວນຄືນການສ້າງຕັ້ງວັນຕ້ານການສໍ້ລາດບັງຫຼວງສາກົນ, ກໍາແໜ້ນ, ເຊື່ອມຊຶມ, ເຂົ້າໃຈແຈ້ງຕໍ່ໄພອັນ ຕະລາຍຮ້າຍແຮງຂອງການສໍ້ລາດບັງຫຼວງ ຄຽງຄູ່ກັບການເຮັດໃຫ້ວຽກງານສະກັດກັ້ນ ແລະຕ້ານການສໍ້ລາດບັງຫຼວງ ໄດ້ກາຍເປັນໜ້າທີ່ ແລະຄວາມຮັບຜິດຊອບຂອງທົ່ວປວງຊົນໃນການຕິດຕາມ, ກວດກາ, ແກ້ໄຂພຶດຕິກໍາທີ່ເປັນການສໍ້ລາດບັງຫຼວງຮ່ວມກັນຢ່າງກວ້າງ ຂວາງ, ເລິກເຊິ່ງ ເພື່ອເຮັດໃຫ້ປະກົດການ ການສໍ້ລາດບັງຫຼວງຄ່ອຍໆໝົດໄປຈາກສັງຄົມເທື່ອລະນ້ອຍ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates