ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ສະເຫຼີມສະຫຼອງວັນສ້າງຕັ້ງເມືອງ ທ່າແຕງ ຄົບຮອບ 25 ປີ

0089

ຂ່າວ-ພາບ: ພອນ ບຸນອຸທິດ 020 5632 8844.

ພິທີສະເຫຼີມສະຫຼອງວັນສ້າງຕັ້ງເມືອງທ່າແຕງ ຄົບຮອບ 25 ປີ ໄດ້ຈັດຂື້ນໃນຕອນເຊົ້າວັນທີ່ 8 ມັງກອນ 2018 ນີ້ ຢູ່ທີ່ເດີ່ນກິລາຂອງເມືອງ ທ່າແຕງ ແຂວງ ເຊກອງ ໂດຍການເຂົ້າຮ່ວມຂອງທ່ານ ຄໍາເຜີຍ ບຸດດາວຽງ ກໍາມະການສູນກາງພັກ ເລຂາພັກແຂວງ-ເຈົ້າແຂວງ ເຊກອງ, ມີທ່ານ ຄຳສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ ທ່າແຕງ, ທ່ານ ຫງວຽນ ພິແທ໊ງ ຮອງເລຂາພັກເມືອງ ຟູນິງ ແຂວງ ກວາງນາມ ສສ ຫວຽດນາມ, ມີຄະນະປະຈໍາພັກແຂວງ, ຄະນະປະ ຈໍາພັກເມືອງ, ກໍາມະການພັກແຂວງ-ກຳມະການພັກເມືອງ, ອະດີດການນໍາແຕ່ລະສະໄໝ ແຂກຖືກເຊີນຈາກບັນດາ ເມືອງ ພາຍໃນແຂວງ ແລະບັນດາເມືອງທີ່ມີຊາຍແດນຕິດຈອດກັນຂອງແຂວງຈຳປາສັກ, ສາລະວັນ, ບໍລິສັດ, ລັດວິສາຫະກິດ ພ້ອມ ດ້ວຍພະນັກງານ-ລັດຖະກອນ, ທະຫານ-ຕຳຫຼວດ, ນັກຮຽນ-ນັກສຶກສາ ແລະພໍ່ແມ່ປະຊາຊົນບັນດາເຜົ່າເຂົ້າຮ່ວມຢ່າງພ້ອມ ພຽງ.

0090

ທ່ານ ຄຳສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ໄດ້ເລົ່າຄືນມູນເຊື້ອ ແລະ ຜົນງານຕະຫຼອດໄລຍະ 25 ປີຜ່ານມາວ່າ: ເມືອງທ່າແຕງເປັນດິນແດນອົງແກ້ວທີ່ອົງອາດກ້າຫານ ໂດຍຜ່ານຂະບວນການປະ ຕິວັດອັນດຸເດືອດຂ້ຽວຂາດ ບົນເສັ້ນທາງນໍ້າໃຈຍອມເສຍສະຫຼະທຸກສິ່ງທຸກຢ່າງຂອງປະຊາຊົນບັນດາເຜົ່າຊາວເມືອງທ່າແຕງ ແລະປະຊາຊົນຫວຽດນາມອ້າຍນ້ອງຮ່ວມຂຸ່ມຕະຄອງດຽວກັນປົດປ່ອຍທ່າແຕງ ໂດຍເລີ່ມແຕ່ປີ 1967 ຈົນເຖິງນາທີສຸດ ທ້າຍໃນວັນທີ 25 ເມສາ 1969 ຈິ່ງສາມາດປົດປ່ອຍທ່າແຕງຢ່າງສົມບູນ, ພາຍຫຼັງສໍາເລັດການປົດປ່ອຍທ່າແຕງອອກຈາກ ການກົດຂີ່ຂູດຮີດຂອງພວກຈັກກະພັດໃນປີ 1969, ທ່າແຕງໄລຍະນັ້ນ ແມ່ນຂຶ້ນກັບແຂວງສາລະວັນ, ຕໍ່ມາໄດ້ແຍກແຂວງ ສາລະວັນເປັນ 2 ແຂວງຄື: ສ້າງຕັ້ງແຂວງເຊກອງຂື້ນວັນທີ 14 ເມສາ 1984, ເວລານັ້ນທ່າແຕງເປັນພຽງແຕ່ກິ່ງເມືອງຂອງ ເມືອງລະມາມແຂວງເຊກອງ, ຈົນເຖິງວັນທີ 8 ມັງກອນ 1993 ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ອອກດໍາລັດສ້າງຕັ້ງເມືອງທ່າແຕງຂຶ້ນໃນວັນທີ 8 ມັງກອນ 1993 ຢ່າງເປັນທາງການ,ໃນເວລານັ້ນມີ 58 ບ້ານ,ມີພົນລະເມືອງ 12.746 ຄົນ,ມີຜູ້ນໍາໄລຍະນັ້ນ 5 ສະຫາຍ,ຈາກນັ້ນໄດ້ເປີດກອງປະຊຸມໃຫ່ຍຂອງອົງຄະນະພັກເມືອງມີ 5 ສະໄໝຄື: ສະໄໝທີ 1 ມີຄະນະບໍລິຫານງານພັກເມືອງມີ 13 ສະຫາຍ,ສະໄໝທີ 2 ມີ 17 ສະຫາຍ,ສະໄໝທີ 3 ມີ 17 ສະຫາຍ,ຍິງ 1 ສະຫາຍ,ສະໄໝທີ 4 ມີ21 ສະຫາຍ,ຍິງ 2 ສະຫາຍ,ສະໄໝທີ 5 ມີ 25 ສະຫາຍ,ຍິງ 3 ສະຫາຍ,ຕະຫຼອດໄລຍະ 25 ປີຜ່ານມາ ຄະນະບໍລິຫານງານພັກເມືອງທ່າແຕງ ໄດ້ປະເຊີນກັບສິ່ງທ້າທາຍທົດສອບ ຫຼາຍປະການ ແຕ່ພາຍໃຕ້ແສງສະຫວ່າງຂອງມະຕິກອງປະຊຸມໃຫ່ຍແຕ່ລະຄັ້ງຂອງສູນກາງພັກ,ກໍ່ຄືມະຕິກອງປະຊຸມໃຫ່ຍຂອງ ອົງຄະນະພັກແຂວງເຊກອງແລະຂອງເມືອງວາງອອກແຕ່ລະສະໄໝ ຈິ່ງສາມາດເຮັດໃຫ້ຊີວິດການເປັນຢູ່ຂອງປະຊາຊົນຫັນ ປ່ຽນແຕ່ລະບາດກ້າວຢ່າງຕັ້ງໜ້າ,ມາຮອດປະຈຸບັນເມືອງທ່າແຕງມີ 47 ບ້ານ,ມີ6.649 ຫຼັງຄາເຮືອນ,ມີ 7.990 ຄອບຄົວ, ມີພົນລະເມືອງທັງໝົດ 40.900 ຄົນ,ຍິງ 20.725 ຄົນ,ທຽບໃສ່ປີ 1993 ພົນລະເມືອງເພີ່ມຂື້ນ 27.897 ຄົນ,ເທົ່າກັບ 68 ກວ່າສ່ວນຮ້ອຍ,ມີ 8 ຊົນເຜົ່າຄື: ລາວລຸ່ມ,ຕະໂອ້ຍ,ອາຣັກ,ກະຕູ,ຕຣຽງ,ກະລຽງ,ຢຣຸ ແລະ ຊົນເຜົ່າສວຍ. ຈາກເງື່ອນໄຂ ທີ່ອໍານວຍຄວາມສະດວກ ຕິດພັນກັບແຕ່ລະຂົງເຂດວຽກງານພາຍໃນເມືອງ ຈິ່ງສາມາດເຮັດໃຫ້ເສດຖະກິດຂອງເມືອງມີການ ຂະຫຍາຍຕົວຢ່າງຕໍ່ເນື່ອງ 10%/ປີ,ລວມຍອດຜະລິດຕະພັນ GDP ປີ 2017 ໄດ້ 696.181,41 ລ້ານກີບ,ລາຍຮັບ ສະເລ່ຍໃສ່ຫົວຄົນໄດ້ 17 ລ້ານກວ່າກີບ,ເທົ່າກັບ 2,050 ໂດລາສະຫະລັດ/ຄົນ/ປີ,ທຽບໃສ່ປີ 1993 ເພີ່ມຂື້ນ 1.880 ໂດລາສະຫະລັດ,ທຽບໃສ່ມະຕິ X ຂອງພັກປະຕິບັດໄດ້ 81% ຂອງແຜ່ນການຂອງພັກວາງອອກ 2.520 ໂດລາສະຫະ ລັດ/ຄົນ/ປີ,ໃນນີ້ ຂະແໜງກະສິກໍາກວມເອົາ 43% ຂອງ GDP,ຂະແໜງອຸດສາຫະກໍາ ແລະ ການຄ້າກວມເອົາ 20,49% ຂອງ GDP,ຂະແໜງການບໍລິການກວມເອົາ 30,82% ຂອງ GDP.

ໂອກາດສະເຫຼີມສະຫຼອງວັນສ້າງຕັ້ງເມືອງທ່າແຕງຄົບຮອບ 25 ປີ ຍັງໄດ້ຮັບເງິນຊ່ວຍເຫຼືອຈາກການນໍາຂັ້ນສູງເມືອງ ຟູນິງ ແຂວງ ກວາງນາມ ສສ ຫວຽດນາມຈໍານວນ 50 ລ້ານດົ້ງ,ພ້ອມປະດັບຫຼຽນໄຊແຮງງານ,ໃບຍ້ອງຍໍຂັ້ນຕ່າງໆ ໃຫ້ແກ່ກົມກອງລວມໝູ່ ແລະ ບຸກຄົນທີ່ມີຜົນງານ,ຄຸນງາມຄວາມດີປະກອບສ່ວນເຂົ້າໃນການສ້າງສາພັດທະນາເມືອງ ທ່າແຕງຕະຫຼອດໄລຍະຜ່ານມາ ໃນນີ້ມອບຫຼຽນໄຊແຮງງານຊັ້ນ I ມີ 27 ທ່ານແລະ 1 ກົມກອງ,ຊັ້ນ II ມີ 29 ທ່ານ, ຊັ້ນIII ມີ 31ທ່ານ,ຫຼຽນກາແຮງງານ 15 ທ່ານ,ໃບຍ້ອງຍໍລັດຖະບານມີ 41 ທ່ານ ແລະ 56 ກົມກອງ. ເປັນກຽດມອບໂດຍແມ່ນ ການນຳຂັ້ນສູນກາງ,ຂັ້ນແຂວງ,ຂັ້ນເມືອງ ແລະ ພາກສ່ວນທີ່ກ່ຽວຂ້ອງຂື້ນຮັບຕາມລຳດັບ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates