ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ພຜທ ເຊກອງ ຫວນຄືນມູນເຊື້ອ ວັນຊາດທີ 2 ທັນວາ ຄົບຮອບ 42 ປີ

0041

#ຂ່າວ-ພາບ: ນາລີວັນ

         ພິທີປາຖະກະຖາ ລະນຶກເຖີງ​ວັນ​ສ້າງ​ຕັ້ງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊ​າ​ຊົນ​ລາວ ຄົບ​ຮອບ 42 ປີ 02 ທັນ​ວາ 197502 ທັນ​ວາ 2017 ແລະ ວັນ​ຄ້າຍວັນ​ເກີດ​ປະ​ທານ ໄກ​ສອນ ພົມ​ວິ​ຫານ ຄົບ​ຮອບ 97 ປີ 13 ທັ​ນ​ວາ 192013 ທັນ​ວາ 2017 ຂຶ້ນໃນຕອນເຊົ້າວັນທີ 30 ພະຈິກ 2017 ນີ້ ຢູ່ທີ່ຫ້ອງປະຊຸມພະແນກດັ່ງກ່າວ ໃຫ້​ກຽດ​ປາ​ຖະ​ກະ​ຖາ​ໂດຍ​ທ່ານ ທອງຄໍາ ມະນີວົງ ຫົວໜ້າພະແນກ ແຜນການ ແລະການລົງທຶນ (ພຜທ) ແຂວງເຊກອງ ໂດຍມີບັນດາຄະນະພັກ-ຄະນະພະແນກ, ສະມາຊິກພັກ, ພະນັກງານ-ລັດຖະກອນເຂົ້າຮ່ວມຮັບຟັງ.

0042

          ເຊິ່ງທ່ານ ຫົວຫນ້າ ພຜທ ໄດ້​ຍົກ​ໃຫ້​ເຫັນ​ວ່າ: ໂດຍ​ສືບ​ທອດ​ມູນ​ເຊື້ອ​ອັນ​ອົງ​ອາດ, ກ້າ​ແກ່ນ​ບໍ່​ຍອມ​ຈຳ​ນົ​ນ, ນ້ຳ​ໃຈ​ຄຽດ​ແຄ້ນ​ອັນ​ສູງ​ສົ່ງ​ຂອງ​ປະ​ຊາ​ຊົນ​ລາວ​ບັນ​ດາ​ເຜົ່າ ພາຍ​ໃຕ້​ການ​ນຳ​ພາ​ຂອງ​ບັນ​ພະ​ບູ​ລຸດ​ລາວ​ໄດ້​ລຸກ​ຂຶ້ນ​ຕໍ່​ສູ້​ຕ້ານ​ກັບ​ພວກ​ສັກ​ດີ​ນາ​ຕ່າງ​ດ້າວ, ຈັກ​ກະ​ພັດ​ລ່າ​ເມືອງ​ຂຶ້ນ​ຢູ່​ຫຼາຍ​ທ້ອງ​ຖິ່ນ​ເຊັ່ນ: ຂະ​ບວນ​ການ​ຕໍ່​ສູ້​ຂອງ​ພໍ່​ກະ​ດວດ ​ປີ1901-1902, ອົງ​ແກ້ວ​ ແລະອົງ​ກົມ​ມະ​ດຳ ປີ1910-1937, ເຈົ້າ​ຟ້າ​ປັດ​ໄຈປີ1918-1922 ແລະ ຂະ​ບວນ​ການ​ຕໍ່​ສູ້​ອື່ນໆ ແຕ່​ກໍ່​ບໍ່​ໄດ້​ຮັບ​ໄຊ​ຊະ​ນະ ຍ້ອນ​ວ່າ​ບໍ່​ທັນ​ມີ​ພັກ​ນຳ​ພາ ແລະບໍ່​ມີ​ແນວ​ທາງ​ຕໍ່​ສູ້​ທີ່​ຖືກ​ຕ້ອງ, ນັບ​ແຕ່​ພັກ​ປະ​ຊາ​ຊົນ ​ປະ​ຕິ​ວັດ​ລາວໄດ້ສ້າງຕັ້ງຂື້ນ ໃນ​ວັນ​ທີ 22 ມີ​ນາ 1955, ພັກ​ໄດ້​ນຳ​ພາ​ປະ​ຊາ​ຊົນ​ບັນ​ດາ​ເຜົ່າ ສາ​ມັກ​ຄີ​ຕໍ່​ສູ້ຢ່າງ​ພິ​ລະ​ອາດ​ຫານ​ຕ້ານ​ການ​ຮຸກ​ຮານ, ແລະ ການ​ຄອບ​ຄອງ​ຂອງ​ພວກ​ຈັກ​ກະ​ພັດ​ລ່າ​ເມືອງ​ຂຶ້ນ​ແບບ​ເກົ່າ ແລະແບບ​ໃໝ່​ໄດ້​ຮັບ​ໄຊ​ຊະ​ນະ​ເປັນ​ກ້າວໆ​ມາ ຈົນ​ໄດ້​ຮັບ​ໄຊ​ຊະ​ນະ​ສົມ​ບູນ ແລະສ້າງ​ຕັ້ງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວຂຶ້ນ​ຢ່າງ​ສະ​ຫງ່າ​ຜ່າ​ເຜີຍ ໃນ​ວັນ​ທີ 2 ທັນ​ວາ 1975 ເຊິ່ງເປັນ​ລັດ​ປະ​ຊາ​ທິ​ປະ​ໄຕ ປະ​ຊາ​ຊົນ, ລັດ​ແຫ່ງ​ອຳ​ນາດ​ຂອງ​ປະ​ຊາ​ຊົນ ແລະເພື່ອ​ປະ​ຊາ​ຊົນ​ຢ່າງ​ແທ້​ຈິງ, ວັນ​ທີ 2 ທັນ​ວາ ແມ່ນ​ວັນ​ໄຊ​ຊະ​ນະ​ອັນ​ຍິ່ງ​ໃຫ​ຍ່​ໃນ​ປະ​ຫວັດ​ສາດ​ແຫ່ງ​ການ​ຕໍ່​ສູ້​ເປັນ​ພັນໆ​ປີ​ຂອງ​ຊາດ​ລາວ​ເຮົາ, ແມ່ນ​ວັນ​ທີ່​ປະ​ຊາ​ຊົນ​ລາວ​ບັນ​ດາ​ເຜົ່າ​ໄດ້​ມີ​ອິດ​ສະ​ຫຼະ​ພາບ ແລະໄດ້​ເປັນ​ເຈົ້າ​ຂອງ​ປະ​ເທດ​ຊາດ​ຢ່າງ​ແທ້​ຈິງ, ແມ່ນ​ວັນ​ທີ່​ປະ​ຊາ​ຊົນ​ລາວ​ມີ​ເອ​ກະ​ລາດ​ສົ​ມ​ບູນ, ມີ​ອະ​ທິ​ປະ​ໄຕ​ຄົບ​ຖ້ວນ, ມີ​ທີ່​ຕັ້ງ​ອັນ​ສົມ​ກຽດ, ຖາ​ນະ​ທຽບ​ເທົ່າ​ກັບ​ປະ​ເທດ​ອື່ນໆ​ໃນ​ເວ​ທີ​ປະ​ຊາ​ຄົມ​ໂລກ, ແມ່ນ​ວັນ​ແຫ່ງ​ສັນ​ຕິ​ພາບ ແລະວັນ​ແຫ່ງ​ການ​ກ້າວ​ຂຶ້ນ​ສູ້​ຍຸກ​ສະ​ໄໝ​ໃໝ່​ແຫ່ງ​ການ​ສ້າງ​ປະ​ເທດ​ລາວ ສັນ​ຕິ​ພາບ ເອ​ກະ​ລາດ ປະ​ຊາ​ທິ​ປະ​ໄຕ ເອ​ກະ​ພາບ ວັດ​ທະ​ນາ​ຖາ​ວອນ.0043

          ຈາກນັ້ນ, ກໍໄດ້ຮັບຟັງປະຫວັດການເຄື່ອນໄຫວອັນເດັດດຽ່ວອົງອາດກ້າຫານຂອງ ປະ​ທານ​ ໄກ​ສອນ ພົມ​ວິ​ຫານ ຜູ້ນໍາ ທີ່ແສນເຄົາລົບຮັກຂອງລາວເຮົາ ຈາກທ່ານ ວັນນະວົງ ພົນສາລາດ ຮອງຫົວໜ້າ ພຜທ ແຂວງ ເຊກອງ ເຊິ່ງທ່ານໄດ້ກ່າວວ່າ: ທ່ານ ໄກສອນ ພົມວິຫານ ເກີດ​ເມື່ອ​ວັນ​ທີ 13/12/1920 ທີ່​ບ້ານ​ ນາ​ເຊັງ, ເມືອງ ຄັນ​ທະ​ບູ​ລີ, ແຂວງ ສະ​ຫວັນ​ນະ​ເຂດ, ​ກຳ​ເນີດ​ໃນ​ຄອບ​ຄົວ​ທີ່ພໍ່​ເປັນ​ຂ້າ​ລາ​ຊະ​ການ ແລະແມ່​ເປັນ​ຊາວ​ນາ ທີ່​ຍຶດ​ໝັ້ນ​ໃນ​ຫຼັກ​ທຳ​ຄຳ​ສອນ​ຂອງ​ພຸດ​ທະ​ສາ​ສະ​ໜາ ແລະຮີດ​ຄອງ​ປະ​ເພ​ນີ​ລາວ, ເມື່ອ​ອາ​ຍຸ​ໄດ້ 7 ປີເພິ່ນ​ໄດ້​ເຂົ້າ​ຮຽນ​ຊັ້ນ​ປະ​ຖົມ​ພາ​ສາ​ລາວ ຕໍ່​ມາ​ຮຽນ​ພາ​ສາ​ຝ​ຣັ່ງ, ເພິ່ນ​ໄດ້​ຕັ້ງ​ໃຈ​ຮຽນ, ດຸ​ໝັ່ນ​ອ່ານ​ໜັງ​ສື, ເຄົາ​ລົບ​ຄູ, ຮັກ​ແພງ​ໝູ່​ຄູ່ ແລະຮຽນ​ໄດ້​ຄະ​ແນນ​ດີ, ພາຍ​ຫຼັງ​ຈົບ​ຊັ້ນ​ປະ​ຖົມ​ພາ​ສາ​ຝ​ຣັ່ງ​ທີ່​ສະ​ຫວັນ​ນະ​ເຂດ ເພິ່ນ​ໄດ້​ຮຽນ​ຕໍ່​ທີ່​ວິ​ທະ​ຍາ​ໄລ​ໂປ​ຣ​ເຕັກ​ໂຕ​ຣາ ( ອາ​ລັກ​ຂາ ) ທີ່​ຮ່າ​ໂນ້ຍ​ປະ​ເທດ​ຫວຽດ​ນາມ, ໃນ​ຊຸມ​ປີ 1936-1939 ເພິ່ນ​ໄດ້​ເຂົ້າ​ຮ່ວມ​ຂະ​ບວນ​ການ​ຕໍ່​ສູ້​ເລັ່ງ​ທວງ​ເອົາ​ສິດ​ເສ​ລີ​ພາບ ແລະປະ​ຊາ​ທິ​ປະ​ໄຕຢູ່​ນະ​ຄອນ​ຫຼວງ​ຮ່າ​ໂນ້ຍ, ເພິ່ນ​ມັກ​ຊອກ​ຮຽນ​ຮູ້​ສິ່ງ​ໃໝ່ໆ ໂດຍ​ສະ​ເພາະ​ມັກ​ອ່ານ​ໜັງ​ສື​ພິມ ເລິ​ຕ​ຣາ​ວາຍ ແຮງ​ງານ, ເຊິ່ງ​ເປັນ​ກະ​ບອກ​ສຽງ​ຂອງ​ພັກ​ກອມ​ມູ​ນິດ​ອິນ​ດູ​ຈີນ, ພ້ອມ​ນັ້ນ​ເພິ່ນ​ຍັງ​ໄດ້​ຮຽນ​ມວຍ​ຫວຽດ​ນາມ, ຈີນ, ຢູ​ໂດ​ເພື່ອ​ປ້ອງ​ກັນ​ໂຕ, ປີ 1944 ເພິ່ນ​ໄດ້​ເຂົ້າ​ຮ່ວມ​ເປັນ​ສະ​ມາ​ຊິກ​ສະ​ມາ​ຄົມ​ຊາວ​ໜຸ່ມ​ກູ້​ຊາດ​ຫວຽດ​ນາມ ເຊິ່ງ​ເປັນ​ບາດ​ກ້າວ​ທຳ​ອິດ​ຂອງ​ການ​ເຂົ້າ​ສູ່​ເສັ້ນ​ທາງ​ປະ​ຕິ​ວັດ, ຕໍ່​ມາ​ໄດ້​ເຂົ້າ​ຮ່ວມ​ຂະ​ບວນ​ການ​ຢຶດ​ອຳ​ນາດ​ການ​ປົກ​ຄອງ ຈາກ​ກຳ​ມື​ຂອງ​ພວກ​ຍີ່​ປຸ່ນ ຢູ່​ສະ​ຫວັນ​ນະ​ເຂດ ໃນ​ວັນ​ທີ 23 ສິງ​ຫາ 1945. ຍ້ອນເພິ່ນ​ໄດ້​ຮັບການ​ຝຶກ​ຝົນຢ່າງ​ລະ​ອິດ​ລະ​ອ້ຽວ ໃນ​ຂະ​ບວນ​ການ​ປະ​ຕິ​ວັດ, ໃນ​ວັນ​ທີ 6 ມັງ​ກອນ 1949 ໄດ້​ສະໝັກເຂົ້າເປັນສະມາຊິກພັກຄອມມູ ນິດອິນດູຈີນ ແລະ​ເປັ​ນ​ສະ​ມາ​ຊິກ​ພັກ ​ສົມ​ບູນ​ໃນ​ວັນ​ທີ 28 ກໍ​ລະ​ກົດ 1949 ຕັ້ງ​ແຕ່​ນັ້ນ​ມາ ປະ​ທານ​ ໄກ​ສອນ ໄດ້​ກ້າວ​ເດີນ​ບົນ​ເສັ້ນ​ທາງ​ອັນ​ສະ​ຫວ່າງ​ສະ​ໄຫວ​ຂອງ​ການ​ປະ​ຕິ​ວັດ​ຕາມ​ລັດ​ທິ​ມາກ-ເລ​ນິນ ດ້ວຍ​ຄວາມ​ເຊື່ອ​ໝັ້ນ​ອັນ​ໜັກ​ແໜ້ນ,ບໍ່​ຫວັ່ນ​ໄຫວ​ຄອນ​ແຄນ​ຕໍ່​ສິ່ງ​ທ້າ​ທາຍ​ທົດ​ສອບ​ໃດໆ ແລະບໍ່​ທໍ້​ຖອຍ, ບໍ່ຍອມ​ຈຳ​ນົນ​ຕໍ່​ຄວາມ​ຫ​ຍຸ້ງ​ຍາກ ແລະໄພ​ຂົ່ມ​ຂູ່​ໃດໆ​ທັງ​ຊິ້ນ. ນັບ​ແຕ່ກອງ​ປະ​ຊຸມ​ໃຫ​ຍ່​ຄັ້ງ​ທີ I – V ຂອງ​ພັກ ປະ​ທານ​ ໄກ​ສອນ ໄດ້​ຮັບ​ເລືອກ​ຕັ້ງ​ເປັນ​ເລ​ຂາ​ທິ​ການ​ໃຫ​ຍ່​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ຈົນ​ຕະ​ຫຼອດ​ຊີ​ວິດ​ຂອງ​ເພິ່ນ ແລະໃນ​ເດືອນ ສິງ​ຫາ ປີ 1991 ເລືອກ​ຕັ້ງ​ເປັນ ປະ​ທານ​ປະ​ເທດ​ແຫ່ງ ສ.ປ.ປ ລາວ.0044

          ໂອກາດດຽວກັນນີ້ ຜູ້ເຂົ້າຮ່ວມຍັງໄດ້ຮັບຟັງການປາຖະກະຖາກຽວກັບຊີວິດ ແລະການເຄື່ອນໄຫວປະຕິວັດຂອງທ່ານຟຣິກ ອັງແກນ ຄົບຮອບ 197 ປີ ແລະເອກະສານວັນມະຫາປະຕິວັດເດືອນຕຸລາ ຣັດເຊຍ ຄົບຮອບ 100 ປີ ຕື່ມອີກຈາກທ່ານ ເງິນສີ ຄຸມມະວົງ ຫົວໜ້າສູນສະຖິຕິປະຈໍາແຂວງເຊກອງ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates