ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ທ່າແຕງ ເປີດໂຄງການສະໜັບສະໜູນການມີສ່ວນຮ່ວມຂອງປະຊາຊົນຜ່ານວິທະຍຸຊຸຸມຊົນ

0031

#ຂ່າວ-ພາບ: ພຸດທະສອນ

       ພິທີເປີດໂຄງການສະໜັບສະໜູນການມີສ່ວນຮ່ວມຂອງປະຊາຊົນຜ່ານວິທະຍຸຊຸມຊົນ ທີ່່ສະຖານີວິທະຍຸຊຸມຊົນ ເມືອງທ່າແຕງ ແຂວງເຊກອງ ໄດ້ມີຂຶ້ນໃນວັນທີ 24 ພະຈິກ 2017 ນີ້ ໂດຍການເຂົ້າຮ່ວມຂອງທ່ານ ປິ່ນປາດຖະໜາ ພັນທະມາລີ ຫົວໜ້າກົມສື່ ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມຄະນະ, ທ່ານ ຮາວລຽງ ຊູ, ຜູ້ຊ່ວຍເລຂາທິການໃຫຍ່ ສປຊ , ຜູ່ຊ່ວຍຜູ້ບໍລິຫານອົງການ UNDP ສຳລັບພາກພື້ນອາຊີ ແລະ ປາຊີຟິກ ພ້ອມຄະນະ, ທ່ານ ນາງ ຄາຣິນາ ອິມໂມເນັນ ຜູ້ຕາງໜ້າອົງການ ສປຊ ເພື່ອການພັດທະນາປະຈໍາ ສປປ ລາວ , ມີທ່ານ ຄຳໄພ ສິມມາວັດ ຮອງເຈົ້າເມືອງທ່າແຕງ ປະທານຄະນະຮັບຜິດຊອບວິທະຍຸຊຸມ ຊົນບັນດາເຜົ່າເພື່ອການພັດທະນາເມືອງ ທ່າແຕງ ພ້ອມດ້ວຍຂະແໜງການອ້ອມຂ້າງເມືອງ ແລະ ອາສາສະໝັກສະຖານີດັ່ງກ່າວເຂົ້າ ຮ່ວມ.

 

       ທ່ານ ບຸນຫາບ ສຸລິໂຍ ຮອງຫົວໜ້າກົມສື່ມວນຊົນ, ຜູຈັດການແຜນງານສະໜັບສະໜູນການມີສ່ວນຮ່ວມຂອງປະ ຊາຊົນໃນການພັດທະນາຜ່ານວິທະຍຸຊຸມຊົນ ໄດ້ລາຍງານການຈັດຕັ້ງປະຕິບັດວຽກງານພັດທະນາວິທະຍຸຊຸມຊົນໃນ ສປປ ລາວ ຊຶ່ງ ປະກອບມີ 3 ໄລຍະຄື: ໄລຍະທີ 1 ແຕ່ປີ 2006-2010 ແມ່ນສາມາດສ້າງສະຖານີວິທະຍຸຊຸມຊົນໄດ້ 2 ແຫ່ງຄື: ສະຖານີວິທະຍຸ ຊຸມຊົນເພື່ອການພັດທະນາເມືອງຄູນ ແຂວງຊຽງຂວາງ ແລະ ເມືອງທ່າແຕງ ແຂວງເຊກອງ ໂດຍໄດ້ຮັບທຶນສະໜັບສະໜູນຈາກ ໂຄງການບູລະນະການປົກຄອງ GPAR, ໄລຍະທີ 2 ແຕ່ປີ 2011-2014 ແມ່ນ ມີສັນຍາຮ່ວມມືລະຫວ່າງກະຊວງ ຖວທ ກັບອົງການ ສປຊ ເພື່ອການພັດທະນາປະຈໍາລາວ ເອີ້່ນວ່າ ແຜນງານສະໜັບສະໜູນໂຄງການມີສ່ວນຮ່ວມ ແລະ ສື່ຊູມຊົນ ຊຶ່ງສາມາດສ້າງ ສະຖານີວິທະຍຸຊຸມຊົນເພື່ອການພັດທະນາໄດ້ 2 ແຫ່ງຄື: ສະຖານີວິທະຍຸຊຸມຊົນເພື່ອການພັດທະນາເມືອງດາກຈຶງ ແຂວງເຊກອງ ແລະ ເມືອງໜອງແຮດ ແຂວງຊຽງຂວາງ, ໄລຍະທີ 3 ແຕ່ປີ 2014-2017 ໄລຍະຕໍ່ໂຄງການ ສາມາດສ້າງສະຖານີວິທະຍຸຊຸມຊົນ ໄດ້ 4 ແຫ່ງຄື: ສະຖານີວິທະຍຸຊຸມຊົນເພື່ອການພັດທະນາເມືອງຮຸນ, ເມືອງນາໝໍ້ ແຂວງອຸດົມໄຊ, ເມືອງລະຄອນເພັງ, ແຂວງສາລະວັນ; ​ເມືອງຄອບແຂວງໄຊຍະບູລີ, ມາຮອດປະຈຸບັນສະຖານີວິທະຍຸເຫຼົ່ານີ້ໄດ້ກາຍເປັນເຄື່ອງມືຮັບໃຊ້ໃຫ້ແກ່ການໂຄສະນາແນວທາງນະ ໂຍບາຍຂອງພັກ ແລະ ລັດຖະບານ ເປັນເວທີແລກປ່ຽນຂໍ້ມູນຂ່າວສານ ແນວຄວາມຄິດ ເຮັດໃຫ້ຄົນໃນຊຸມຊົນສາມາດຕິດຕາມ ການເຄື່ອນໄຫວຂອງສັງຄົມ, ການຫັນປ່ຽນແນວທາງນະໂຍບາຍຂອງພັກເຮົາ, ການພັດທະນາເສດຖະກິດ-ສັງຄົມ, ວັດທະນະທຳ, ການຫັນປ່ຽນຂອງດິນຟ້າອາກາດ ແລະອື່ນໆ;

0032

ສະຖານີວິທະຍຸຊຸມຊົນທັງໝົດນີ້ແມ່ນດໍາເນີນອອກອາກາດໂດຍອາສາສະໝັກຈາກຊຸມຊົນ ເຊິ່ງໄດ້ລາຍງານກ່ຽວກັບສະພາບດິນຟ້າ ອາກາດ, ກະສິກຳ, ການກະກຽມຮັບມືກັບໄພພິບັດ, ສຸຂະພາບ, ບົດບາດຍິງ-ຊາຍ ແລະ ການເຄື່ອນຍ້າຍຖິ່ນຖານ, ສໍາລັບສະຖານີວິທະຍຸຊຸມຊົນເມືອງທ່າແຕງ ແຂວງເຊກອງ ແມ່ນ 1 ໃນສະຖານີວິທະຍຸຊຸມຊົນທັງໝົດ 8 ແຫ່ງ ໃນທົ່ວປະເທດ ທີ່ໄດ້ຮັບການສະໜັບສະໜູນຈາກອົການສະຫະປະຊາຊາດ ເພື່ອການພັດທະນາ ເຊິ່ງສາມາດເຂົ້າເຖິງຜູ້ຟັງຫຼາຍກວ່າ 3 ແສນຄົນ ແລະ ອອກອາກາດເປັນພາສາທ້ອງຖິ່ນເຖິງ 11 ພາສາ.

0033

     ໃນໂອກາດເຄື່ອນໄຫວຢ້ຽມຢາມສະຖານີວິທະຍຸຊຸມຊົນດັ່ງກ່າວ ທ່ານ ຮາວ ລຽງ ຊູ ໄດ້ເນັ້ນຄວາມສໍາຄັນຂອງການ ເປັນຄູ່ຮ່ວມງານທີ່ດີ ສະເໝີີມາ ລະຫວ່າງລັດຖະບານ​ແຫ່ງ ສປປ ລາວ ແລະ ອົງການສະຫະປະຊາຊາດເພື່ອການພັດທະນາ ແລະ ໄດ້ຮັບຮູ້ຄໍາໝັ້ນສັນຍາຂອງລັດຖະບານໃນການພັດທະນາປະເທດຊາດໄປສູ່ຄວາມຍືນຍົງ ແລະ ຄວາມສະເໝີພາບ ໂດຍຜ່ານການປັບປຸງ ການເຂົ້າເຖິງຂໍ້ມູນ-ຂ່າວສານ ແລະ ໃນລະຫວ່າງນີ້ ທ່ານ ຮາວ ລຽງ ຊູ ກໍໄດ້ຮ່ວມອອກອາກາດສົດ ແລະ ສົນທະນາກັບອາສາ ສະໝັກວິທະຍຸຊຸມຊົນດັ່ງກ່າວອີກດ້ວຍ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates