ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊກອງ ຖະແຫຼງຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII

0030

#ຂ່າວ-ພາບ: ນາລີວັນ

          ທ່ານ ພອນເພັດ ຄິວລະວົງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16, ປະທານສະພາປະຊາຊົນແຂວງ ເຊກອງ ໄດ້ຖະແຫຼງຕໍ່ສື່ຂ່າວແຂວງເຊກອງ ໃນທ້າຍອາທິດແລ້ວນີ້ວ່າ: ພາຍຫຼັງທີ່ໄດ້ເຂົ້າຮ່ວມກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີVIIIທີ່ນະຄອນຫຼວງວຽງຈັນ ເຊິ່ງກອງປະຊຸມໄດ້ໄຂຂຶ້ນເປັນທາງການແຕ່ວັນທີ 16 ຕຸລາ ແລະປິດລົງໃນວັນທີ 17 ພະຈິກ 2017 ຜ່ານມາ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງ ສປປ ລາວ ແລະການໃຫ້ກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ບັນດາກໍາມະການກົມການເມືອງສູນກາງພັກ, ອະດີການນໍາຂັ້ນສູງຂອງພັກ-ລັດ, ສະມາຊິກສະພາແຫ່ງຊາດຊຸດທີ VIII, ຄະນະລັດຖະບານ, ຜູ້ຕາງໜ້າອົງການຈັດຕັ້ງສາກົນ, ທູດ ແລະທູຕານຸທູດເຂົ້າຮ່ວມ.

 

          ຕະຫຼອດໄລຍະດໍາເນີນກອງປະຊຸມເປັນເວລາ 25 ວັນ (ລັດຖະການ), ສະມາຊິກສະພາແຫ່ງຊາດໃນຖານະເປັນຕົວແທນແຫ່ງ ສິດ ແລະຜົນປະໂຫຍດຂອງປະຊາຊົນບັນດາເຜົ່າໄດ້ສຸມໃສ່ສະຕິປັນຍາ ແລະເສີມຂະຫຍາຍສິດປະຊາທິປະໄຕຂອງຕົນເຂົ້າໃນການຄົ້ນຄວ້າ ປະກອບຄໍາເຫັນ, ພິຈາລະນາເນື້ອໃນຂອງກອງປະຊຸມຢ່າງກົງໄປກົງມາ, ເລິກເຊິ່ງ, ຖີ່ຖ້ວນ ແລະດ້ວຍຄວາມຮັບຜິດຊອບສູງ ໃນນັ້ນ, ສະ ມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ກໍໄດ້ເອົາໃຈໃສ່ນໍາເອົາຄໍາຄິດຄໍາເຫັນຂອງປະຊາຊົນສະເໜີຕໍ່ກອງປະຊຸມຫຼາຍບັນຫາກ ວ່າ 24 ເທື່ອ/ຄົນ ເປັນຕົ້ນແມ່ນບັນຫາຈຸດດີ-ຈຸດອ່ອນ, ຂໍ້ຄົງຄ້າງທີ່ກີດຂວາງໃນການຄຸ້ມຄອງ-ບໍລິຫານລັດ, ວຽກງານການເງິນ-ເງິນຕາ, ເສດຖະກິດ-ສັງຄົມ, ການຜະລິດທຸລະກິດ, ແກ້ໄຂປະກົດການຫຍໍ້ທໍ້, ຈັດສັນ ແລະຄຸ້ມຄອງງົບປະມານຮັບໃຊ້ວຽກພັດທະນາຊົນນະບົດ ແກ້ໄຂຄວາມທຸກຍາກ, ການຄຸ້ມຄອງໜີ້ສິນສາທາລະນະເຫຼົ່ານີ້ເປັນຕົ້ນ. ທັງໝົດນັ້ນ ກໍເພື່ອແນໃສ່ການພັດທະນາເສດຖະກິດ-ສັງຄົມໃຫ້ ສືບຕໍ່ຂະຫຍາຍຕົວໄປໃນທາງທີ່ຖືກຕ້ອງ, ສ້າງພື້ນຖານອັນໜັກແໜ້ນໃຫ້ແກ່ການພັດທະນາປະເທດຊາດໃນຊຸມປີຕໍ່ໜ້າ.

          ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີVIIIໄດ້ຮັບຮອງເອົາ 6 ເນື້ອໃນພື້ນຖານສໍາຄັນດັ່ງນີ້: ໂດຍສະ ເພາະໄດ້ຮັບຮອງເອົາແຜນພັດທະນາເສດຖະກິດ-ສັງຄົມ, ແຜນເງິນຕາ, ແຜນງົບປະມານແຫ່ງລັດປີ 2018 ໂດຍໄດ້ຈັດແບ່ງງົບປະມານລະ ຫວ່າງຂະແໜງການ, ສູນກາງ ແລະທ້ອງຖິ່ນຢ່າງລະອຽດ; ຮັບຮອງເອົາແຜນການເຄື່ອນໄຫວວຽກງານ ປະຈໍາປີ 2018 ຂອງສານປະຊາຊົນ ແລະອົງການໄອຍະການປະຊາຊົນສູງສຸດ; ຮັບຮອງເອົາແຜນການກວດສອບ ປະຈໍາປີ 2018 ຂອງອົງການກວດສອບກ່ຽວກັບຜົນການ ກວດສອບບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ສົກປີ 2015-2016; ຮັບຮອງເອົາທິດທາງຄາດໝາຍການເຄື່ອນ ໄຫວວຽກງານຂອງຄະນະປະຈໍາສະພາແຫ່ງຊາດ ຊຸດທີVIII; ຮັບຮອງເອົາກົດໝາຍປັບປຸງໃໝ່ ແລະສ້າງໃໝ່ ຈໍານວນ 15 ສະບັບ (ເອົາເຂົ້າພິຈາລະນາຄົ້ນຄວ້າ 16 ສະບັບ) ແຕ່ເລື່ອນຮ່າງກົດໝາຍວ່າດ້ວຍໜີ້ສິນສາທາລະນະໄປພິຈາລະນາຮັບຮອງເອົາເຂົ້າໃນກອງປະຊຸມ ສະໄໝຕໍ່ໄປ; ກອງປະຊຸມໄດ້ຮັບຟັງການປະກອບຄໍາເຫັນຈາກຜູ້ຕາງໜ້າອົງການແນວລາວສ້າງຊາດ, ອົງການຈັດຕັ້ງມະຫາຊົນ ໂດຍທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ຕໍ່ການເຄື່ອນໄຫວວຽກງານຂອງຄະ ນະປະຈໍາສະພາແຫ່ງຊາດ ແລະບັນດາອົງການລັດຂັ້ນຕ່າງໆ.

          ໂອກາດດຽວກັນນີ້ ກອງປະຊຸມຍັງໄດ້ຮັບເອົາຄໍາສະເໜີ, ຄໍາເຫັນຂອງປະຊາຊົນບັນດາເຜົ່າໂດຍກົງຜ່ານໂທລະສັບສາຍດ່ວນ ຕໍ່ຂົງ ເຂດວຽກງານຕ່າງໆ ທັງຢູ່ສູນກາງ ແລະທ້ອງຖິ່ນ ທັງໝົດ 532 ເລື່ອງ. ໃນນັ້ນ, ແຂວງເຊກອງພວກເຮົາໄດ້ມີປະຊາຊົນສະເໜີ 5 ຂົງເຂດວຽກງານ ມີຈໍານວນ 7 ເລື່ອງ.

          ທ່ານ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16, ປະທານສະພາປະຊາຊົນແຂວງເຊກອງ ໄດ້ລາຍງານຕື່ມອີກວ່າ: ພາຍຫຼັງໄດ້ສໍາເລັດການເຂົ້າຮ່ວມກອງປະຊຸມໃນເທື່ອນີ້ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ກໍຄືສະພາປະຊາຊົນແຂວງເຊກອງ ກໍາລັງກະກຽມທຸກເງື່ອນໄຂ ເພື່ອດໍາເນີນກອງປະຊຸມຄົບຄະນະປະຈໍາປິ 2018 ຂອງຕົນ ແລະດໍາ ເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ I ຄາດຄະເນຈະໄດ້ດໍາເນີນໃນລະຫວ່າງທ້າຍເດືອນ ທັນວາ ປີ 2017 ນີ້ ໂດຍກອງປະຊຸມຈະໄດ້ສຸມໃສ່ພິຈາລະນາຕົກລົງຫຼາຍບັນຫາທີ່ເປັນພື້ນຖານຂອງທ້ອງຖິ່ນ ເຊິ່ງລາຍລະອຽດຈະໄດ້ແຈ້ງພາຍຫຼັງ ໃຫ້ບັນດາທ່ານໄດ້ຮັບຊາບ.

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates