ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ເຊີນທ່ຽວງານບຸນຊ່ວງເຮືອເມືອງລະມາມ ແຂວງເຊກອງ

0021

ງານບຸນຊ່ວງເຮືອເມືອງລະມາມ ແຂວງເຊກອງປະຈໍາປີນີ້ ແມ່ນຈະໄດ້ຈັດຂຶ້ນທີ່ທ່ານໍ້າເຊກອງບ້ານເພຍໃໝ່ຖືເປັນບຸນປະເພນີ ເພື່ອເປັນການອະນຸລັກ, ຮັກສາຮີດຄອງປະເພນີອັນດີງາມຂອງຊາດ, ຂອງເຜົ່າ ແລະ ເປັນການສ້າງກິດຈະກຳໜຶ່ງແກ່ຂະບວນການເປີດປີ ທ່ອງທ່ຽວ ລາວ ປີ 2018.

 

      ວັນທີ 15 ພະຈິກ 2017 ຜ່ານມາ ທ່ານ ຄຳໄລ ປັນຍາຄູນ ຮອງເຈົ້າເມືອງໆລະມາມ, ປະທານຈັດງານບຸນຊ່ວງເຮືອປະຈໍາປີ 2017 ໃຫ້ຮູ້ວ່າ: ງານບຸນຊ່ວງເຮືອເມືອງລະມາມແຂວງເຊກອງປີນີ້ ແມ່ນໄດ້ກຳນົດເອົາວັນທີ 3 ທັນວາ 2017 ຊຶ່ງມາຮອດປັດຈຸບັນການຫ້າງ ຫາກະກຽມຂອງອະນຸກໍາມະການ ຕ່າງໆເປັນຕົ້ນອະນຸກໍາມະການເນື້ອໃນ, ອະນຸກໍາມະການສະຖານທີ່, ອະນຸກຳມະການກີລາໜ້ານ້ຳ ແລະ ອະນຸກຳມະການອື່ນໆແມ່ນມີຄວາມພ້ອມແລ້ວ 60%.

        ໂດຍຈຸດປະສົງ ການຈັດ​ງານ​ດັ່ງກ່າວ ​ແມ່ນ​ມີ​ຂື້ນ​ທຸກໆປີ ທັງ​ນີ້ ກໍ່ເພື່ອເປັນການສົ່ງ​ເສີມ, ອະນຸລັກ, ຮັກສາຮີດຄອງ ປະເພນີອັນດີງາມຂອງຊາດ, ຂອງເຜົ່າ ທັງເພື່ອ​ເປັນ​ການສ້າງບັນຍາກາດຄວາມມ່ວນຊື່ນໃຫ້ແກ່ຊາວແຂວງເຊກອງ ກໍຄືປະຊາຊົນລາວ ແລະ ຕ່າງປະເທດທີ່ມາທ່ອງທ່ຽວຊົມໃຫ້ຮູ້ເຖິງວັດທະນະທຳອັນດີງາມ ແລະ ຈຸດປະສົງອີກຢ່າງກໍເພື່ອສ້າງກິດຈະກໍາໃຫ້ແກ່ ຂະບວນການເປີດປີທ່ອງທ່ຽວລາວປີ 2018 ​ໃຫ້​ເປັນ​ຂະ​ບວນຟົດ​ຟື້ນ.

0022

          ທ່ານ ຄຳໄລ ປັນຍາຄູນ ໃຫ້ຮູ້ຕື່ມວ່າ: ເຮືອຊ່ວງທີ່ຈະເຂົ້າຮ່ວມແຂ່ງຂັນມີ 4 ປະເພດຄື: ເຮືອປະເພນີ 19-22 ສີພາຍ (ຊາຍ-ຍິງ); ເຮືອເຄິ່ງສູດ-ເຄິ່ງປະເພນີ 19-22 ສີພາຍ (ຊາຍ-ຍິງ); ເຮືອສູດ 19-22 ສີພາຍ (ຊາຍ-ຍິງ) ແລະ ເຮືອສູດ 35-40 ສີພາຍ (ຊາຍ-ຍິງ). ສຳລັບລາງວັນຊະນະເລີດທີ 1 ເຮືອປະເພນີໄດ້ຮັບຂັນ 1 ໜ່ວຍ, ພ້ອມເງິນສົດ 8,5 ລ້ານກີບ; ເຮືອເຄິ່ງສູດ-ເຄິ່ງປະເພນີ ແລະ ເຮືອສູດ 19-22 ສີພາຍໄດ້ຮັບຂັນ 1 ໜ່ວຍ, ພ້ອມເງິນສົດ 8 ລ້ານກີບ ແລະ ເຮືອສູດໃຫຍ່ 35-40 ສີພາຍໄດ້ຮັບຂັນ 1 ໜ່ວຍພ້ອມເງິນສົດ 10 ລ້ານກີບ, ນອກນັ້ນ ຍັງມີລາງວັນຊົມເຊີຍ ແລະ ລາງວັນເຮືອງາມເງິນສົດ 1-1,3 ລ້ານກີບ.

          ແນວໃດກໍຕາມ ເພື່ອເຮັດໃຫ້ງານບຸນຊ່ວງເຮືອປີນີ້ ມີບັນຍາກາດເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີ ອັນ​ດີງາມ ຂອງ​ຊາດ ຂອງ​ເຜົ່າ, ທ່ານຮອງເຈົ້າເມືອງລະ​ມາ​ມ ໄດ້ຮຽກຮ້ອງມາຍັງພະນັກງານ-ລັດຖະກອນ, ທະຫານຕຳຫຼວດ ຕະຫຼອດຮອດ ປະຊາຊົນບັນດາເຜົ່າເອົາໃຈໃສ່ຮັກສາຄວາມສະຫງົບ ຄວາມເປັນລະບຽບຮຽບຮ້ອຍທາງສັງຄົມ, ເພື່ອສ້າງຄວາມປະທັບໃຈໃຫ້ແກ່ແຂກ ຕ່າງດ້າວທ້າວຕ່າງແດນທີ່ມາທ່ຽວຊົມ ​ແຂວງ​ເຊ​ກອງ ມາ​ທ່ຽວ​ແລ້ວ​ຢາກ​ມາ​ອີກ​ຄັ້ງ​ໃໝ່.

( ຂ່າວ-ພາບ : ສັນຍາ ແກ້ວໄຊຍະວົງ )

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates