ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ພະແນກການເງິນສອງແຂວງພົບປະແລກປ່ຽນບົດຮຽນ

0005

      ເພື່ອເຮັດໃຫ້ການຈັດຕັ້ງປະຕິບັດວຽກງານງົບປະມານ-ການເງິນໃຫ້ມີຜົນສໍາເລັດ ແລະ ມີຄຸນນະພາບດີຂື້ນ ກວ່າເກົ່າທັງເພື່ອເປັນການຮັດແໜ້ນຄວາມສາມັກຄີລະຫວ່າງສອງຊາດລາວ-ຫວຽດນາມເວົ້າລວມ ກໍຄືພະ ແນກການເງິນ ແຂວງເຊກອງ ກັບພະແນກການເງິນແຂວງກວາງນາມໃຫ້ນັບມື້ເພີ່ມພູນຄູນສ້າງຂຶ້ນເລື້ອຍໆ.

     ໃນລະຫວ່າງວັນທີ 26-29 ກໍລະກົດ 2017 ຜ່ານມານີ້ ພະແນກການເງິນແຂວງເຊກອງ ນຳໂດຍທ່ານ ທອນສົມມັກ ຈັນທະສີດາ ຫົວໜ້າພະແນກການເງິນແຂວງເຊກອງພ້ອມຄະນະ ໄດ້ເດີນທາງໄປຮ່ວມເຮັດວຽກ ແລະ ພົບປະແລກປ່ຽນບົດຮຽນກັບພະແນກການເງິນແຂວງກວາງນາມ ໂດຍແມ່ນທ່ານ ຟານວັນຈິ໋ນ ຫົວໜ້າ ພະແນກການເງິນແຂວງກວາງນາມພ້ອມຄະນະໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ.

     ໂດຍການປຶກສາຫາລືກັນໃນຄັ້ງນີ້ ສອງຝ່າຍເຫັນດີເປັນເອກະພາບເພີ່ມທະວີການແລກປ່ຽນບົດຮຽນໃນ ຂົງເຂດວຽກງານຕ່າງໆ ທີ່ນອນໃນຄວາມຮັບຜິດຊອບຂອງຕົນ ເປັນຕົ້ນວຽກງານຫ້ອງການບໍລິຫານ-ຈັດຕັ້ງ, ວຽກງານບັນຊີການເງິນ, ວຽກງານງົບປະມານ, ວຽກງານສ່ວຍສາອາກອນ, ວຽກງານຄຸ້ມຄອງຊັບສິນຂອງລັດ, ວຽກງານກວດກາການເງິນ, ວຽກງານຄັງເງິນ, ວຽກງານກອງກວດ ແລະ ດ່ານພາສີ, ໂດຍໄດ້ລົງນາມຮ່ວມມື ກັນທຸກໆປີມີການຈັດຕັ້ງທັດສະນະສຶກສາ ແລະ ແລກປ່ຽນບົດຮຽນທັງສອງຝ່າຍ ເພື່ອຍົກສູງຜົນສຳເລັດ ການຈັດຕັ້ງປະຕິບັດວຽກງານການຈັດເກັບລາຍຮັບ-ຄຸ້ມຄອງລາຍຈ່າຍຂອງສອງແຂວງໃຫ້ທັນສະໄໝວ່ອງໄວ, ໂປ່ງໃສ, ສາມາດກວດສອບໄດ້ທຸກເວລາ ເພື່ອພ້ອມກັນກ້າວສູ່ປະຊາຊົນເສດຖະກິດອາຊຽນ ແລະ ຂະແໜງການເງິນ ກໍແມ່ນຂະແໜງໜຶ່ງທີ່ມີຄວາມສຳຄັນຕໍ່ການພັດທະນາເສດຖະກິດ-ສັງຄົມໃຫ້ມີການຂະ ຫຍາຍຕົວດີຂຶ້ນເລື້ອຍໆ.

      ທ່ານ ທອນສົມມັກ ຈັນທະສີດາ ຫົວໜ້າພະແນກການເງິນແຂວງເຊກອງກ່າວວ່າ: ການເດີທາງໄປຮ່ວມ ເຮັດວຽກ ແລະ ແລກປ່ຽນບົດຮຽນຂອງຂະແໜງການເງິນໃນຄັ້ງນີ້ ແມ່ນສ່ວນໜຶ່ງຂອງການເພີ່ມທະວີ ກໍສ້າງພື້ນຖານສາຍພົວພັນມິດຕະພາບ, ການຮ່ວມມືແບບພິເສດລະຫວ່າງສອງພັກ, ສອງລັດ ແລະ ປະຊາຊົນ ສອງຊາດລາວ-ຫວຽດນາມ, ກໍຄືແຂວງເຊກອງ-ແຂວງກວາງນາມ ໂດຍສະເພາະແມ່ນສອງພະແນກການເງິນ ໃຫ້ໜັກແໜ້ນຂື້ນເລື້ອຍໆ.

     ນອກນັ້ນ ຍັງເປັນການຂຳນັບຮັບຕ້ອນ ແລະ ສະເຫຼີມສະຫຼອງ 2 ວັນສຳຄັນທາງປະຫວັດສາດຂອງ 2 ຊາດຄື: ວັນສ້າງຕັ້ງສາຍພົວພັນການທູດຄົບຮອບ 55 ປີ (5 ກັນຍາ 1962-5 ກັນຍາ 2017), ວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານຄົບຮອບ 40 ປີ (18 ກໍລະກົດ 1977- 18 ກໍລະກົດ 2017) ຕື່ມອີກ.

ຂ່າວ ແລະ ຮູບ​ພາບ : ສັນຍາ ແກ້ວໄຊຍະວົງ

0006  0007

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates