ຍີນດີຕ້ອນຮັບເຂົ້າສູ່ເວັບໄຊພະ​ແນກ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງ​ເຊກອງ

ຖວທ ເຊກອງ ກຽມສ້າງ ແລະ ພັດທະນາເວບໄຊເປັນຂອງຕົນເອງ

0001

     ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ແຂວງເຊກອງ ອອກຂໍ້ຕົກລົງ ແຕ່ງຕັ້ງຄະນະຮັບຜິດຊອບການສ້າງເວັບໄຊຂອງພະແນກ ຊຶ່ງປະກອບດ້ວຍ ຫ້ອງການບໍລິຫານ, ຂະແໜງຖະ ແຫຼງຂ່າວ-ສື່ມວນຊົນ, ຂະແໜງວັດທະນະທຳ, ຂະແໜງ ທ່ອງທ່ຽວ ແລະ ກອງວິຊາການວິທະຍຸ-ໂທລະພາບ.

     ການເຄື່ອນໄຫວຫຼ້າກ່ຽວກັບວຽກງານນີ້ ມີຂຶ້ນໃນວັນທີ 31 ກໍລະກົດ 2017 ໂດຍຄະນະຮັບຜິດ ຊອບວຽກງານດັ່ງກ່າວ ໄດ້ມີການຈັດກອງປະຊຸມຝຶກອົບຮົມກ່ຽວກັບການສ້າງ ແລະ ການນຳເອົາ ຂໍ້ມູູນຕ່າງໆ ລົງໜ້າເວັບໄຊ ຊຶ່ງມີວິທະຍາກອນຈາກພະແນກວິທະຍາສາດ-ເຕັກໂນໂລຊີ ຂອງແຂວງ ແລະ ວິຊາການຈາກ ໂຄງການໄຈກ້າ (ປະເທດຍີປຸ່ນ) ເປັນຜູ້ໃຫ້ຄວາມຮູ້.

      ທ່ານ ສົມບູນ ສີສົມພອນ ຫົວໜ້າຂະແໜງຖະແຫຼງຂ່າວແຂວງເຊກອງກ່າວວ່າ: ຄະນະຮັບຜິດຊອບ ຊີ້ນຳການສ້າງເວັບໄຊຂອງພະແນກ ຖວທ ໂດຍແມ່ນທ່ານຮອງຫົວໜ້າພະແນກ ຜູ້ຊີ້ນຳວຽກງານຖະແຫຼງຂ່າວ, ຫົວໜ້າຂະແໜງຖະແຫຼງຂ່າວ ແລະ ຫ້ອງການບໍລິຫານ ເປັນຄະນະຊີ້ນຳລວມ ແລະ ຄະນະວິຊາການ ຊຶ່ງປະກອບດ້ວຍພະນັກງານວິຊາການຜູ້ທີ່ມີຄວາມຮູ້ດ້ານ IT ຊຶ່ງຈະເປັນຜູ້ສ້າງ ແລະ ພັດທະນາເວັບໄຊ ຕົວຈິງ, ການຝຶກອົບຮົມດັ່ງກ່າວ ຈະໃຊ້ເວລາ 15 ວັນ ເລີ່ມແຕ່ວັນທີ 31 ກໍລະກົດເປັນຕົ້ນໄປ. ຫຼັງຈາກນັ້ນ ຈະໄດ້ນຳສະເໜີຕໍ່ຄະນະຊີ້ນຳ ເພື່ອຄວາມເປັນເອກະພາບ ໃນການອອກແບບໂຄງສ້າງເມນູຕ່າງໆຂອງເວັບໄຊ ແລະ ລາຍງານໃຫ້ແກ່ການນຳຂອງພະແນກຮັບຮອງເອົາ. ພ້ອມທັງ ສະ ເໜີຂໍນໍາໃຊ້ບໍລິການລະຫັດຊື່ເວັບໄຊ ເພື່ອນໍາໃຊ້ຢ່າງເປັນທາງການ.

    ທ່ານ ສົມບູນ ສີສົມພອນ ກ່າວຕື່ມອີກວ່າ: ການສ້າງເວັບໄຊຂອງພະແນກ ຖວທ ນີ້ແມ່ນມີຄວາມ ໝາຍສຳຄັນຍິ່ງເພາະເປັນການນຳເອົາແຂວງເຊກອງ ກໍຄືພະແນກ ຖວທ ແຂວງກ້າວສູ່ຄວາມທັນສະໄໝ ອີກກ້າວໜຶ່ງ ໂດຍສະເພາະແມ່ນການສະເໜີຂໍ້ມູນ-ຂ່າວສານດ້ານຕ່າງໆອອກສູ່ສັງຄົມ ເພື່ອເປັນການດຶງດູດ ນັກທຸລະກິດເອກະຊົນທັງພາຍໃນ ແລະ ຕ່າງປະເທດເຂົ້າມາລົງທຶນພັດທະນາແຂວງເຊກອງໃຫ້ຈະເລີນກ້າວ ຂຶ້ນຢ່າງບໍ່ຢຸດຢັ້ງ.

ຂ່າວ-ພາບ : ສັນຍາ ແກ້ວໄຊຍະວົງ

0002 0003 0004

ສ້າງຂື້ນໃນ ປີ 2017. ສະຫງວນລິຂະສິດໂດຍ: ພະແນກຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແຂວງເຊກອງ, ຕັ້ງຢູ່ບ້ານ ໂນນ​ມີ​ໄຊ, ເມືອງ ລະມາມ, ແຂວງ ເຊກອງ, ໂທຣ:(+856)038 211024, ແຟກ:(+856)038 211024, ມືຖື: 020 55121635
Powered by Joomla 1.7 Templates